89 ވަނަ އެކަޑެމީ އެވޯޑްސް ނުވަތަ އޮސްކާ އެވޯޑްސް ހަފްލާ ރޭ ބާއްވާފައިވާއިރު، ހަފްލާ ފެށުމުގެ ކުރިން ބެލުންތެރިންގެ ޝައުޤުވެރިކަން އެންމެ ބޮޑަށް ހުއްޓިފައި އޮތީ އެވޯޑް ހަފްލާގައި ދޭ އެންމެ ޚާއްސަ އެވޯޑްތައްކަމަށްވާ އެންމެ މޮޅު އެކްޓަރުގެ އެވޯޑާއި، އެންމެ މޮޅު އެކްޓްރެސްގެ އެވޯޑާއި އެންމެ މޮޅު ފިލްމުގެ އެވޯޑް ލިބޭ ފަރާތްތައް ބެލުމަށެވެ. މިއަހަރުގެ އެންމެ މޮޅު ފިލްމުގެ އެވޯޑް ލިބޭނީ ރަޔަން ގޮސްލިން އަދި އެމާ ސްޓޯން ލީޑް ރޯލުން ފެނިގެން ދިޔަ ލާ.ލާ.ލޭންޑަށްކަމަށް ގިނަ ބަޔަކު ދެކުނެވެ. އަދި އެވޯޑް ދިނުމަށް ސްޓޭޖަށް އެރި ފަރާތުން ފުރަތަމަ އިއުލާންކުރީވެސް އެގޮތަށެވެ.
ނަމަވެސް ލާލާލޭންޑުގެ ކާސްޓް އަދި ކްރޫ ސްޓޭޖް މައްޗަށް އަރާ އެވޯޑާ ހަވާލުވެ، ޝުކުރުގެ ސަނާ ކިޔުމުގެ ތެރޭގައި އުޅެނިކޮށް ކުއްލިއަކަށް ހުރިހާ ބެލުންތެރިންނާ އެވޯޑް ޝޯއަށް ހާޒިރުވެފައި ތިބި މީހުންނަށް ބޮޑު ޝޮކެއް ލިބިގެންދާފަދަ ކަމެއް ލާ.ލާ.ލޭންޑުގެ ޕްރޮޑިއުސަރެއް އިއުލާންކުރިއެވެ. ލާ.ލާ.ލޭންޑަށް އެވޯޑް ދެވުނީ އޮޅުމަކުން ކަމަށާ، އެންމެ މޮޅު ފިލްމުގެ ހައްޤުވެރިއަކީ މޫންލައިޓް ފިލްމް ކަމަށް އެނާ ވަނީ ސްޓޭޖު މަތީގައި އިއުލާންކޮށްފައެވެ.
img:http://s2.psmnews.mv/images/660x400/14882039336922.jpg|އެންމެ މޮޅު ފިލްމުގެ އެވޯޑް ދިނުމުގެ ބައިގެ ތެރެއިން
އޮޅުމަކުން ނުބައި ނަން އިއުލާންކުރި ޕްރެޒެންޓަރުންގެ ތެރެއިން އެކަކުކަމަށްވާ އެކްޓަރ، ޑިރެކްޓަރ ވެރަން ބީޓީ ބުނިގޮތުގައި އޭނާގެ ކޯ-ޕްރެޒެންޓަރ ފަޔެ ޑަނަވޭއަށް ނުބައި ނަމެއް އިއުލާންކުރެވުނީ ވަނަ ލިބޭ ފަރާތްތަކުގެ ނަން ހާމަކޮށްފައި އޮންނަ ސިޓީ އުރައިގެ ނުބައި އުރައެއް ލިބިފައިވުމުންކަމަށެވެ.
މޫންލައިޓްގެ ކާސްޓުންނާ ކްރިއޭޓިވް ޓީމުގެ ފަރާތުން ވާހަކަ ދެއްކި ފިލްމްގެ ރައިޓަރ ޑިރެކްޓަރ ބެރީ ޖެންކިންސް މެންބަރުން ބުނީ އެންމެ މޮޅު ފިލްމުގެ އެވޯޑު ލިބޭނެކަމަށް ޤަބޫލުވެސް ނުކުރެވޭކަމަށާއި ނަމަވެސް އެމީހުންނަށް މިއޮތީ މިކާމިޔާބީ ހޯދިފައި ކަމަށެވެ. ލާ.ލާ.ލޭންޑްގެ ކްރިއޭޓިވް ޓީމުން ވަނީ މޫންލައިޓްގެ ޓީމަށް މަރުހަބާ ކިޔާފައެވެ.
ހޮލީވުޑްގެ ފިލްމުތަކަށް ދެވޭ އެންމެ ޝަރަފްވެރި އެވޯޑްކަމަށްވާ އެކަޑަމީ އެވޯޑްސް ނުވަތަ އޮސްކާގެ އަށްޑިހަ ނުވަވަނަ ޝޯވ ލޮސްއެންޖަލަސްގެ ޑޮލްބީ ތިއެޓަރގައި ބާއްވާފައިވާއިރު މިއަހަރުގެ ޝޯއަކީ ބެލުންތެރިން ހަދާން ނުނެތޭވަރުގެ ޝޯއަކަށް ވަނީ ވެގެން ގޮސްފައެވެ.
img:http://s3.psmnews.mv/images/660x400/14882038965806.jpg|އެންމެ މޮޅު ފިލްމުގެ އެވޯޑް ހޯދި މޫންލައިޓް ޓީމުގެ މެމްބަރުން ސްޓޭޖްމަތީގައި
އެވޯޑް ޝޯގައި ލިބުނު ބައެއް އެހެން އެވޯޑްތަކަށް ބަލާލާއިރު، އޮސްކާގެ ބެސްޓް އެކްޓްރެސްގެ މަޤާމު ހާސިލްކޮށްފައިވަނީ ފިލްމް ލާ.ލާ.ލޭންޑްއިން އެމާ ސްޓޯން އަދި ބެސްޓް އެކްޓަރުގެ މަޤާމު ހޯދީ މެންޗެސްޓަރ ބައި ސީގެ އެކްޓަރ ކެސީ އެފްލެކްއެވެ. މީގެ އިތުރުން މުސްލިމް އެކްޓަރެއް ކަމަށްވާ މަހެރްޝަލާ އަލީއަށް ވަނީ މޫންލައިޓް ފިލްމުން ބެސްޓް ސަޕޯޓިން އެކްޓަރުގެ އެވޯޑް ލިބިފައެވެ. އަދި ފެންސަސް ޕިލްމުގައި އަދާކުރި ރޯލަށް ވަޔޯލާ ޑޭވިސްއަށް ވަނީ ބެސްޓް ސަޕޯޓިން އެކްޓްރަސްގެ އެވޯޑް ލިބިފައެވެ.
މިހަފްލާގައި ބެސްޓް އެނިމޭޝަން ފިލްމްގެ އެވޯޑް ހޯދި ޒޫޓޯޕިއާއިންނެވެ. އެންމެ މޮޅު ޑޮކިއުމެންޓަރީގެ އެވޯޑް ހޯދި ސޫރިޔާގެ ހަނގުރާމައިގައި ހާލުގައި ޖެހިފައިވާ ފަރާތްތަކަށް އެހީވުމަށް ހަރަކާތްތެރިވަމުންދާ ވައިޓް ހެލްމެޓްގެ މައްޗަށް ބިނާކޮށް ތައްޔާރުކޮށްފައިވާ ޑޮކިއުމެންޓަރީއަށެވެ.