ރާއްޖޭގެ ސްކޫލްތަކުގައި މިއަހަރު އެންމެ އިސްކަމެއް ދެއްވާނީ ޓެކްނޮލޮޖީ ބޭނުންކުރައްވައިގެން ތަޢުލީމީ އިތުރު ފުރުޞަތުތައް ދަރިވަރުންނަށް ފަހިކޮށްދެއްވުމަށް ކަމަށް އެޑިއުކޭޝަން މިނިސްޓަރ ޑރ.ޢާއިޝަތު ޝިހާމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ އައްޑޫސިޓީއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ޕީއެސްއެމަށް ދެއްވި ޚާއްޞަ އިންޓަރވިއުއެއްގައެވެ.
އެޑިއުކޭޝަން މިނިސްޓަރ ޑރ. ޢާއިޝަތު ޝިހާމް އައްޑޫސިޓީއަށް ކުރައްވާ ދަތުރުފުޅަކީ މި ސިޓީގެ ސްކޫލްތަކުގެ ޕްރިންސިޕަލުންނާއި ބައްދަލުކުރެއްވުމަށް ކުރައްވާ ދަތުރުފުޅެކެވެ. އައްޑޫސިޓީގައި ހުރި 11 ސްކޫލްގެ ޕްރިންސިޕަލުންނާއެކު ބޭއްވެވި މަޝްވަރާ ބައްދަލުވުމަށްފަހު އެޑިއުކޭޝަން މިނިސްޓަރ ޑރ.ޢާއިޝަތު ޝިހާމް ވިދާޅުވީ، އެކަމަނާގެ މިދަތުރުފުޅުގެ މަޤްޞަދަކީ އައްޑޫ ސްކޫލްތަކުގެ ތަޢުލީމީ ކަންކަމާ ގުޅޭގޮތުން މަޝްވަރާ ކުރެއްވުން ކަމަށެވެ. އައްޑޫ ސިޓީއަކީ ތަޢުލީމީގޮތުން ފަޚުރުވެރި ތާރީޚެއް އޮތް ސިޓީއެއްކަން ފާހަގަކުރައްވައި މިނިސްޓަރ ވިދާޅުވީ، އައްޑޫ ސިޓީތަކުގެ ސްކޫލްތަކުގެ ބެލެނިވެރިންނާއި، ސްކޫލްތައް ހިންގަވަން ތިއްބެވި ބޭފުޅުން، ތަޢުލީމަށް ޚާއްޞަ އަހަމިއްޔަތުކަމެއް ދެއްވާ ކަމަށެވެ. އެކަން 3 އަހަރުދުވަހުގެ ތެރޭގައި މިސިޓީން ފެނިގެން ގޮސްފައިވާކަމަށް ވިދާޅުވިއެވެ. ރާއްޖޭގެ ހުރިހާ ސްކޫލްތަކުން ކޮންމެ ދަރިވަރަކު ފަސް މާއްދައިން 2016 ވަނަ ފާސްވުމަށް ކަނޑައެޅުއްވި ލަނޑުދަނޑި ޙާޞިލްވެފައިވާކަން ފާހަގަކުރައްވައި މިނިސްޓަރ ވިދާޅުވީ، މިއަހަރު އެންމެ އިސްކަމެއް ދެއްވާނީ، ސްކޫލްތަކަށް ވަންނަ ކުދިންނަށް ކަމުދާ އިތުރު ފުރުޞަތުތަކެއް ދެއްވުމަށް ކަމަށެވެ. ޚާއްޞަކޮށް ޓެކްނޮލޮޖީ ބޭނުންކުރައްވައިގެން ތަޢުލީމް ދެއްވުމަށް މިއަހަރު ޚާއްޞަ އަހަމިއްޔަތެއް ދެއްވާނެކަމަށް ވިދާޅުވިއެވެ.
މި މަޝްވަރާ ބައްދަލުވުމުގައި މަޝްވަރާކުރެއްވި ކަންކަމުން ވަކިވަކި ދަރިވަރުންގެ ކުރިއެރުމަށް މަސައްކަތްކުރައްވައި ވޭތުވެދިޔަ އަހަރަށްވުރެ ރަނަގަޅު ކާމިޔާބެއް ހޯދޭނެ ގޮތްތައް ދެނެގަނެވިއްޖެކަން ޕްރިންސިޕަލުން ފާހަގަކުރެއްވިއެވެ. އެޑިއުކޭޝަން މިނިސްޓްރީގެ ޕޮލިސީތައް ވަރަށް ކާމިޔާބުކަމާއެކު އައްޑޫސިޓީގައި ހިންގާފައިވާކަމަށް އެޑިއުކޭޝަން މިނިސްޓަރ ފާހަގަކުރެއްވިއެވެ.