އެމެރިކާގެ ރައީސް ބަރާކް އޮބާމާ، އޭނާގެ ވަދާއީ ތަޤްރީރު ދެއްވައިފިއެވެ.
ޝިކާގޯގައި ދެއްވި މި ތަޤްރީރުގައި އޮބާމާ ވަނީ، ޖެނުއަރީމަހުގެ 20 ވަނަ ދުވަހު ޑޮނަލްޑް ޓްރަމްޕް ވެރިކަމާއި ޙަވާލުވެވަޑައިގަތުމުގެ މަރުޙަލާ ވަރަށް ޞުލްޙަވެރިކަމާއެކު ކުރިޔަށް ގެންދެވުމަށް ގޮވާލައްވާފައެވެ.
އޮބާމާގެ ތަޤްރީރުގައި އޭނާގެ ސަޕޯޓަރުންނާއި މުޚާޠަބް ކުރައްވާ ވާހަކަފުޅު ދައްކަވަމުން ވިދާޅުވީ، ޑިމޮކްރަސީއަށް މަސައްކަތް ކުރުމަކީ އަބަދުވެސް ދަތިކަމެއް ކަމަށާއި، ބައެއް ޙާލަތްތަކުގައި ވަރަށް ދަތި އުނދަގޫތަކާއި ދިމާވިކަމަށެވެ. އެމެރިކާގެ ރައްޔިތުންގެ ސަބަބުން، ތެދުވެރި އަދި ހަރުދަނާ މީހެއްގެ ގޮތުގައި ދެމިހުރުމަށް ބާރަކަށްވީކަމަށް ވިދާޅުވެ، އެމެރިކާގެ ރައްޔިތުންނަށް އޮބާމާ ވަނީ ޝުކުރު އަދާކުރައްވާފައެވެ. ވަދާއީ ތަޤުރީރުގައި ވެރިކަމުގެ 8 އަހަރުގައި ކުރެއްވި މަސައްކަތަށްވެސް އޮބާމާ ބައްލަވާލައްވާފައިވެއެވެ.
މިދިޔަ ނޮވެމްބަރު މަހު ބޭއްވި ރިޔާސީ އިންތިޚާބް ކާމިޔާބުކުރެއްވި، ޑޮނަލްޑް ޓްރަމްޕާއި ވައިޓްހައުސް ޙަވާލު ކުރެއްވުމަށްފަހު، އޮބާމާއާއި އޭނާގެ ޢާއިލާ މިމަހުގެ 20 ވަނަ ދުވަހު ވައިޓް ހައުސް ދޫކުރައްވާނެއެވެ. އޮބާމާގެ ވަދާއީ ތަޤްރީރު ދެއްވުމަށް ބޭއްވި ޙަފްލާގައި އަނބިކަނބަލުން މިޝެލް އޮބާމާއާއި ނައިބު ރައީސް ޖޯ ބައިޑެންގެ ދެކަނބަލުންނާއި ވައިޓްހައުސްގެ މުވައްޒަފުންގެ އިތުރުން އޮބާމާގެ ކެމްޕޭން ޓީމުން ބައިވެރިވަޑައިގެންނެވިއެވެ.
ބަރާކް އޮބާމާ ނުވަތަ ބަރާކް ޙުސައިން އޮބާމާއަކީ އެމެރިކާގެ 44 ވަނަ ރައީސްއެވެ. 2008 ވަނަ ވެރިކަމާއި ޙަވާލުވެވަޑައިގެންނެވުމަށްފަހު ވެރިކަމުގެ ދެ ދައުރު އޮބާމާވަނީ ފުރިހަމަ ކުރައްވާފައެވެ. އޭނާ ވެގެންގޮސްފައިވަނީ އެފްރިކަން - އެމެރިކަން ދަރިކޮޅުގެ ފުރަތަމަ ރައީސަށެވެ.