އަންނަ އާދީއްތަ ދުވަހަކީ 2016 ވަނަ އަހަރު މާޒީވެ، 2017 ވަނަ އަހަރު ފެށޭ ދުވަހެވެ. އެ ދުވަހަކީ، ހުޅުލޭގައި އޮންނަ އިންޓަނޭޝަނަލް އެއަރޕޯޓަށް ކިޔަމުން މިއަންނަ އިބްރާހީމް ނާޞިރު އިންޓަރނޭޝަނަލް އެއަރޕޯޓް މިނަން ކިޔުން ނިމުމަކަށް ގެނެވި، އައު ނަން ބޭނުންކުރަން ފެށޭ ތާރީޚީ ދުވަސްވެސްމެއެވެ. އާ ނަމަކީ ވެލާނާ އިންޓަރނޭޝަނަލް އެއަރޕޯޓެވެ.
ދިވެހިސަރުކާރުން ރާއްޖޭގައި އެއަރޕޯޓެއް ޤާއިމުކުރެއްވުމަށް ނިންމަވައި، 1964 މެއި 1 ވަނަ ދުވަހު ފެއްޓެވި މަސައްކަތަކީ، ދިވެހިރާއްޖެއިން އިޤްތިޞާދީ ދާއިރާއިންނާއި، ޚާރިޖީ ދާއިރާއިން ތަރައްޤީގެ މަގުގައި އެޅި އެންމެ މުހިންމު އެއް ފިޔަވަޅެވެ. އަދި އޭރުގެ ބޮޑުވަޒީރު ސުމުއްވުލް އަމީރު އިބްރާހީމް ނާޞިރު ރަންނަބަނޑޭރި ކިލެގެފާނު، މި މުހިންމު މަސައްކަތް ކުރައްވަން ނިންމެވި ނިންމެވުން ތަންފީޒު ކުރެއްވުމުގައި ގިނަ ދިވެހި ރައްޔިތުން ޢަމަލީ ގޮތުން ބައިވެރިވެ، ބުރަ މަސައްކަތްތައް ކުރައްވާފައިވެއެވެ.
އެންމެ ފުރަތަމަ އެއަރޕޯޓު ހުޅުވިގެންދިޔައީ "ހުޅުލޭ އެއަރޕޯޓު" ގެ ނަމުގައެވެ. 1981 ގައި، އެއަރޕޯޓުގެ ނަން މާލޭ އިންޓަރނޭޝަނަލް އެއަރޕޯޓަށް ބަދަލުކުރެވިގެންދިޔައެވެ. އެއަށްފަހު ރައީސް ނަޝީދުގެ ސަރުކާރުން 2011 ވަނަ އަހަރު އެއަރޕޯޓަށް، އިބްރާހީމް ނާޞީރު އިންޓަރނޭޝަނަލް އެއަރޕޯޓުގެ ނަން ދެވިގެންދިޔައެވެ.
މާލޭ ވައިގެ ބަދަރުގެ ބެލެނިވެރި ފަރާތްކަމުގައިވާ މޯލްޑިވްސް އެއަރޕޯޓްސް ކޮމްޕެނީން ހާމަކުރައްވާގޮތުގައި އެއަރޕޯޓުގެ ނަން ވެލާނާ އިންޓަރނޭޝަނަލް އެއަރޕޯޓުގެ ނަމަށް ބަދަލުވެގެން ދިޔުމުން އެއަރޕޯޓަށް ގިނަ ކުރިއެރުންތަކެއް އަންނާނެއެވެ. އަދި އެއަރޕޯޓު ބޭރުގެ ޤައުމުތަކުގައި މާރކެޓްކުރުމަށްވެސް ފަސޭހަވެގެންދާނެ ކަމަށް މޯލްޑިވްސް އެއަރޕޯޓްސް ކޮމްޕެނީގެ އެސޯސިއޭޓު ޖެނެރަލް މެނޭޖަރ، ކޯރޕަރޭޓު ކޮމިއުނިކޭޝަން ޙަސަން ޢަރީފް ވިދާޅުވިއެވެ.
"ހުޅުލޭގައި އޮންނަ އިންޓަރނޭޝަނަލް އެއަރޕޯޓްގެ ބޭނުންކުރުމާއި އެކަމާގުޅޭ މުޢާމާލަތުތައް ބޭރުގެ ފަރާތްތަކާ އެންމެ ގިނައިން ކުރަމުން އަންނަ އެއްބަޔަކީ އެއަރލައިންތައް. އެއަރލައިންތަކުން ދެކޭގޮތުގައި މި ބަދަލާއެކު މާލޭ ވައިގެ ބަނދަރަށް ބޭރުގެ ޤައުމުތަކުން އަންނަ ފަތުރުވެރިންނަށް ފައްސޭހަތަކެއް ލިބިގެންދާނެ. ސަބަބަކީ "ވެލާނާ" މިއީ ކިޔާލަން ފައްސޭހަ ކުރު ނަމަކަށްވުން." ޙަސަން ޢަރީފް ވިދާޅުވިއެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯޓް ރީބްރޭންޑް ކުރައްވައި، އެއަރޕޯޓުގެ ނަން ވެލާނާ އިންޓަރނޭޝަނަލް އެއަރޕޯޓަށް ބަދަލުކުރެއްވުމަށް، ސަރުކާރުން ނިންމެވީ ދިވެހިރާއްޖެ ދެކެމުން އަންނަ ތަރައްޤީއާއި، ސަރުކާރުން ކުރިޔަށް ރާއްވަވާފައިވާ އިޤްތިޞާދީ އެޖެންޑާއާ ފައިހަމަކުރެވޭ ގޮތަށް، އަދި ތަރައްޤީއަށް މަގުފަހިކޮށްދޭ ތަނަކަށް އެއަރޕޯޓް ބަދަލު ކުރެއްވުމަށްޓަކައެވެ
އެއަރޕޯޓުގެ ނަމެއްގެ ގޮތުގައި ވެލާނާ އިންޓަރނޭޝަނަލް އެއަރޕޯޓް ހަމަޖެއްސެވީ، އެއަރޕޯޓަށް މިހާރު ގެނެވެމުންދާ ޢުމްރާނީ ތަރައްޤީއާއި، ދިވެހިރާއްޖޭގެ ބްރޭންޑް އިމޭޖް ރަމްޒުކޮށްދޭ، ފަސޭހަ، އަދި ކުރިއެރުމާއި ތަރައްޤީގެ ވިސްނުމަށް މަގުފަހިކޮށްދޭ ނަމަކަށް ބަދަލު ކުރެއްވުމަށްޓަކައެވެ. ހަމައެއާއެކު، އެއަރޕޯޓުގެ ނަން މިހާރު އެ ބޭފުޅަކަށް ނިސްބަތްވެވަޑައިގަންނަވާ ސުމުއްވުލް އަމީރު އިބްރާހީމް ނާޞިރު ރަންނަބަނޑޭރި ކިލެގެފާނަކީ، ދިވެހިރާއްޖެއަށް ޚާރިޖީ މިނިވަންކަން ހޯއްދަވައި ދެއްވުމަށް ބުރަ މަސައްކަތްޕުޅުތަކެއް ކުރައްވާފައިވާ، އަދި ރާއްޖޭގެ ތަރައްޤީއަށްވެސް ގިނަގުނަ ޚިދުމަތްތަކެއް ކުރައްވާފައިވާ ބޭފުޅަކަށްވާތީއާއި، "ވެލާނާ" މި ނަމަކީ އެމަނިކުފާނަށް ނިސްބަތްވާ ނަމަކަށްވުމާއެކު، އެ މަނިކުފާނުގެ ނަންފުޅަށް ނިސްބަތްވާގޮތަށް އެއަރޕޯޓުގެ ނަން ބޭއްވެވުމަކީ ރައީސުލްޖުމްހޫރިއްޔާއަށާއި ވަޒީރުންގެ މަޖިލީހަށް ފެނިވަޑައިގަންނަވާ ކަމަކަށްވާތީއެވެ.
ހުޅުލޭގައި އޮންނަ ދިވެހިރާއްޖޭގެ އެންމެ ހަލަބޮލި އެއަރޕޯޓްގެ ނަމަކީ، އެއަރޕޯޓާއި ވައިގެ ދަތުރުފަތުރާ ގުޅުންހުރި މީހުންނަށް ކިޔަން ފަސޭހަ ނަމަކަށް ވާންޖެހެއެވެ. އަދި ރައްޓެހިވާން ފަސޭހަ ނަމަކަށްވެސް ވާންޖެހެއެވެ. އަދި ދިވެހިވަންތަ ނަމަކަށްވުންވެސް މުހިންމެވެ. މިކަންކަމަށް މި އައު ނަމުން ބާރު ލިބެއެވެ.