3 ރަށެއްގެ ނަރުދަމާ ނިޒާމު ޤާއިމުކުރެއްވުމުގެ ޢަމަލީ މަސައްކަތްކުރާނެ ފަރާތެއް ހޯދުމަށް އިޢުލާންކުރައްވައިފިއެވެ.
ނަރުދަމާ ނިޒާމު ޤާއިމުކުރެއްވުމަށް ހަމަޖެހިފައިވަނީ 3 ރަށަކީ ކ. ހިންމަފުށި، ކ. ތުލުސްދޫ އަދި ހދ. ނޮޅިވަރަންފަރެވެ. އެންވަޔަރްމަންޓް މިނިސްޓްރީން ވިދާޅުވީ، މި 3 ރަށަކީ އައިޑީބީ ލޯންގެ އެހީއާއި ސަރުކާރުގެ ޕީއެސްއައިޕީ ބަޖެޓްގެ ދަށުން ނަރުދަމާ ޤާއިމުކުރެއްވުމަށް ހަމަޖެހިފައިވާ 5 ރަށުގެ ތެރޭގައި ހިމެނޭ 3 ރަށްކަމަށެވެ.
މި ތިންރަށުގެ ޢަމަލީ މަސައްކަތް ފެއްޓެވުމަށްޓަކައި މިކަމާގުޅޭ ސާވޭގެ މަސައްކަތާއި ޑިޒައިން މަސައްކަތްތައް ނިމިފައިވާކަމަށް އެމިނިސްޓްރީން ވިދާޅުވެއެވެ. މިމަޝްރޫޢަށް ޝައުޤުވެރިވާ ފަރާތްތަކުން ބިޑް ހުށަހެޅުމަށް ހަމަޖެހިފައިވަނީ ފެބްރުއަރީ މަހުގެ 14 ވަނަ ދުވަހުއެވެ.
މިމަޝްރޫޢުގެ ދަށުން ނަރުދަމާ ޤާއިމުކުރުމަށް ހަމަޖެހިފައިވާ ޅ.ނައިފަރާއި ތ.ވޭމަންޑޫގެ ޢަމަލީ މަސައްކަތް ކުރާނެ ފަރާތެއް ހޯއްދެވުމަށް މީގެ ކުރިން ވަނީ އިޢުލާންކުރައްވާފައެވެ. ނަރުދަމާ ޤާއިމުކުރެއްވުމުގެ މަޝްރޫޢުގެ ދަށުން މިފަސް ރަށުގައި ނަރުދަމާ ވިއުގައެއް ޤާއިމުކުރައްވައި ރަށުގެ ގޭބިސީތަކަށާއި އެހެނިހެން ޢިމާރާތްތަކަށް ޚިދުމަތް ގުޅައިދެއްވާނެއެވެ.