ސޮފްޓް ޓޯއީސް އުފައްދާ ފެކްޓަރީ އަންނަ އަހަރުގެ ކުރީކޮޅު ހުޅުވަނީ

ސްފޮޓް ޓޯއީސްފަދަ ތަކެތި އުފައްދާ ފެކްޓަރީ އަންނަ އަހަރުގެ ކުރީކޮޅު ހުޅުއްވާނެކަމަށް އިކޮނޮމިކް މިނިސްޓްރީން ހާމަކުރައްވައިފިއެވެ.

ފެކްޓަރީ ތަރައްޤީކުރެއްވުމަށް ހުޅުމާލެއިން 5000 އަކަފޫޓުގެ ބިމެއް ލިބިވަޑައިގެންފައިވާ ކަމަށާއި، ފެކްޓަރީ ޢިމާރާތުގެ ކުރެހުމުގެ މަސައްކަތް ކުރިއަށް އެބަގެންދަވާކަމަށް އެމިނިސްޓްރީން ހާމަކުރައްވައެވެ.

ޢާންމު ދިވެހިންނާއި ދަރިވަރުންނާއި އަދި ފަތުރުވެރިންވެސް ޝައުގުވެރިވާ ބާވަތުގެ ސޮފްޓް ޓޯއީސް ރާއްޖޭގައި އުފެއްދެވުމަށާއި އަދި އެފަދަ އުފެއްދުންތައް ބާޒާރަށް ނެރެ އިޤްތިޞާދަށް ފައިދާ ލިބޭނެ އިންތިޒާމް ހަމަޖެއްސެވުމަށް ކުރިއަށްގެންދަވަން ރާއްވަވާފައިވާ މި މަޝްރޫއުގެ ފުރުތަމަ ފިޔަވަހީގެ ދަށުން ސަތޭކައަށް ވުރެ ގިނަ ވަތްތަރުގެ ތަކެތި ބާޒާރަށް ނެރުމަށް ހަމަޖެހިފައިވެއެވެ.

ޕީއެސްއެމްއަށް ދެއްވި ޙާއްސަ އިންޓަރވިއުއެއްގައި އިކޮނޮމިކް މިނިސްޓަރުގެ، ނާއިބް ޢަބްދުﷲ މުޙައްމަދު ވިދާޅުވީ ފެކްޓަރީގައި އުފައްދާނެ ތަކެތި ފަރުމާ ކުރުމުގެ މަސައްކަތް މިހާރު ކުރެވެމުންދާ ކަމަށާއި، އެކަމުގައި ދިވެހި ޑިޒައިނަރުންނާއި ބޭރުގެ ޑިޒައިނުން ހަރަކާތްތެރިވަމުން އަންނަ ކަމަށެވެ.

ފުރަތަމަ ފިޔަވަހީގައި ކަނޑުގެ ދިރުމާއި، ބާލީހުގެ އެކި ވަތްތަރުތަކުގެ އިތުރުން ކުޑަކުދިންނަށް ހާއްސަ ދަބަސްވެސް ހިމެނޭ ކަމަށް ޢަބްދުﷲ މުޙައްމަދު ވިދާޅުވިއެވެ.

ފެކްޓަރީއަށް ބޭނުންވާ ބިން މިހާރު ހަމަޖެހިފައިވާ އިރު، އެތަނަށް ބޭނުންވާ މުވައްޒަފުން ހޯދުމުގެ މަސައްކަތް ޑިސެމްބަރ މަސްތެރޭ ފެށިގެންދާނެ ކަމަށް ޢަބްދުﷲ މުޙައްމަދު ވިދާޅުވިއެވެ.

މި މަޝްރޫއުގެ ފުރަތަމަ ފިޔަވަހީގެ މަސައްކަތަށް 7 މިލިއަން ރުފިޔާ ހޭދަވާނެ ކަމަށާއި، މުޅި ފެކްޓަރީގެ މަސައްކަތް ނިމިގެންދާ އިރު އެ މަޝްރޫއަށް 50 މިލިއަނެއްހާ ރުފިޔާ ހަރަދު ވާނެ ކަމަށް ޢަބްދުﷲ މުޙައްމަދު ވިދާޅުވިއެވެ.

މީގެ އިތުރުން ޢަބްދުﷲ މުޙައްމަދު ވިދާޅުވީ ޑިސެމްބަރ މަހު ބާއްވާ އެކްސްޕޯ މޯލްޑިވްސްގައި ފެކްޓަރީއިން އުފައްދާ ތަކެތީގެ ނަމޫނާތައް ދައްކަވާލެއްވުމަށް ހަމަޖެހިފައިވާ ކަމަށާއި، އެކްސްޕޯގައި ސާޅީހަކަށް އައިޓަމް ދައްކާލެވިގެންދާކަމަށެވެ.

އިކޮނޮމިކް މިނިސްޓްރީގެ އަމާޒަކީ ފެކްޓަރީގެ އުފެއްދުންތައް އިންޓަރނޭޝަނަލް ބުރޭންޑަކަށް ހެދުން ކަމަށްވާ އިރު، މި ސޮފްޓު ޓޯއީސް ފެކްޓަރީއަށް ކިޔާނެ ނަމެއް ހޯދުމަށްޓަކައި ދިވެހި ބަހުގެ އެކަޑަމީއާއެކު މަޝްވަރާކުރަމުން އަންނަ ކަމަށާއި ބޭނުންވަނީ ދިވެހި ވަންތަ ނަމެއް ކިޔުން ކަމަށް އިކޮނޮމިކް މިނިސްޓްރީން ހާމަކުރައްވައެވެ.