ދުނިޔޭގެ ޗެމްޕިއަނުންނާއެކު ޤައުމީ ކެރަމް މުބާރާތް ފަށައިފި

35 ވަނަ ޤައުމީ ކެރަމް މުބާރާތުގެ ކުޅުން ފަށައިފިއެވެ.

ހުޅުމާލޭ ކެރަމް އެރީނާގައި މިމުބާރާތް ކުރިއަށްދާއިރު މުބާރާތުގެ ކުޅުން ފެށީ ދެވަނަ ޑިވިޝަނުގެ މެޗުތަކުންނެވެ. އެގޮތުން ދެވަނަ ޑިވިޝަނުގެ މެޗުތައް މިމަހުގެ 3 އިން 8 އަށް ކުރިއަށްދާއިރު، އަންހެން ސިންގަލްސް 28 ކުޅުންތެރިންނާއި 52 ފިރިހެން ކުޅުންތެރިން ވާދަކުރާނެއެވެ.

އަދި ޑަބަލްސް އިވެންޓުގައި 13 ޕެއާ ވާދަކުރާއިރު، ފިރިހެން ޑަބަލްސްގައި 28 ޕެއާއެއް ވާދަކުރާނެއެވެ. އަދި މިކްސްޑް ޑަބަލްސް އިވެންޓްގައި 16 ޕެއާއެއް ދެވަނަ ޑިވިޝަނުގައި ވާދަކުރާނެއެވެ.

މުބާރާތާ ގުޅޭގޮތުން ޕީއެސްއެމް ނިއުސްއަށް އިތުރަށް މައުލޫމާތުދެއްވަމުން ކެރަމް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓެރީ ހުސައިން ރައުޝާން ވިދާޅުވީ މިއަހަރަކީ މިމުބާރާތުގައި އެންމެ ގިނަ އަދަދަކަށް ބައިނަލްއަޤްވާމީ ކުޅުންތެރިން ވާދަކުރާ އަހަރުކަމަށެވެ.

ޓީމު އިވެންޓްތަކުގައި ކޮންމެ ކުލަބަކުންވެސް އޭ ކެޓަގަރީން ބިދޭސީ ދެ ކުޅުންތެރިޔަކަށް ޓީމުން ފުރުސަތު ދެވޭގޮތަށް މުބާރާތުގެ ގަވާއިދު ހަމަޖެހިފައިވުމުން ގާތްގަނޑަކަށް ހަތް ވަރަކަށް ބިދޭސީ ކުޅުންތެރިން މުބާރާތުގައި ފެނިގެންދާނެކަމަށް ރައުޝާން ވިދާޅުވިއެވެ. މީގެ ތެރޭގައި ދުނިޔޭގެ ޗެމްޕިއަނުންވެސް ހިމެނޭކަމަށާ މިއީ ރާއްޖޭގެ ކުޅުންތެރިންނަށް ލިބިގެންދާނެ ރަނގަޅު ތަޖުރިބާއަކަށްވާނެކަމަށް ރައުޝާން ހާމަކުރެއްވިއެވެ.

"އަލަށް މި ބައިވެރިވަނީ ޤައުމީ މުބާރާތުގައި (ބިދޭސީ ކުޅުންތެރިން). ކުރިންވެސް އެބަހުރި ކުލަބުތަކަށް ބޭރުގެ މީހުން ކުޅެފަ. އެހެންނަމަވެސް ޤައުމީ މުބާރާތުގެ ތާރީޚުގައި އެންމެ ގިނަ އިންޓަނޭޝަނަލް ކުޅުންތެރިން ކުޅޭނެ މުބާރާތް މިއީ. މީގެ ތެރޭގައި މިފަހަރު ކުލަބުތަކުން އެބަގެނޭ ދުނިޔޭގެ ޗެމްޕިއަނުންވެސް. އަދި ދުނިޔޭގެ ރޭންކިންގެ އެންމެ ގަދަ އަށެއްގައި އުޅޭ ހަތަރުވަރަކަށް ކުޅުންތެރިން މިމުބާރާތުގަ ކުޅޭނެ" ރައުޝާން ވިދާޅުވިއެވެ.

ޤައުމީ ކެރަމް މުބާރާތުގެ ފުރަތަމަ ޑިވިޝަނުގެ މެޗުތައް ފަށާނީ 8 ވަނަ ދުވަހަށްފަހުއެވެ. މުބާރާތުގެ ކުޅުން ކުރިއަށްދަނީ ހުޅުމާލޭ ސްޕޯޓްސް ކޮމްޕްލެކްސްގައެވެ.