މޯލްޑިވިއަންގެ އައު ސީޕްލޭން ޓާމިނަލާއެކު ޚިދުމަތަށް އިންގިލާބީ ބަދަލެއް

ދިވެހިރާއްޖޭގެ ފަތުރުވެރިކަމުގެ ޗާލު މަންޒަރުތަކާއި ޖަޒީރާވަންތަ ޤުދުރަތީ ރީތިކަން ދުނިޔޭގެ އެކި ކަންކޮޅުތަކުން އަންނަ ދަތުރުވެރިންނާ ގުޅުވައިދޭ މައިގަނޑު އެއް ނާރެހަކީ ސީޕްލޭންގެ ޚިދުމަތެވެ. މި ޚިދުމަތަށް ޒަމާނީ އައު ދިރުމަކާއި ފުރިހަމަ ލަގްޒަރީ ތަޖުރިބާއެއް ގެނެސްދެމުން، ޤައުމީ އެއަރލައިން މޯލްޑިވިއަންގެ މުޅިން އައު ސީޕްލޭން ޓާމިނަލް މިދިޔަ އަންގާރަ ދުވަހު ރަސްމީކޮށް ހުޅުވިގެން ދިޔައީ ދިވެހި ވައިގެ ދަތުރުފަތުރުގެ ސަފްހާގައި ރަން އަކުރުން ފަވާލެވޭނެ އައު ބާބެއް ފަށައިދެމުންނެވެ.

ގައުމީ އެއަރލައިންގެ ސީޕްލޭންގެ ޚިދުމަތުގެ ތާރީޚަށް ނަޒަރެއް

މޯލްޑިވިއަންގެ ސީޕްލޭން ދަތުރުގެ ފެށީ 2014 ވަނަ އަހަރުގެ އޭޕްރީލް މަހު އެންމެ ދެ ބޯޓާއެކުއެވެ. ވެލާނާ އިންޓަރނޭޝަނަލް އެއަރޕޯޓާއި ދުރު ރަށްތަކާއި ރިސޯޓުތައް ގުޅުވާލުމަށް އެޅުނު އެ ބިންގަލަކީ، މުޅި ރާއްޖެ އެއް ވިއުގައަކުން ގުޅާލުމަށް ކޮށުނު އަގުހުރި މަގެކެވެ. އެއަށްފަހު 2015 ވަނަ އަހަރު ރަސްމީކޮށް ޓާމިނަލް ހުޅުވައި، ފާއިތުވި އަހަރުތަކުގައި ހޯދި ކުރިއެރުންތަކާއެކު، މިއަދު އެ ކުންފުނިން ވަނީ 1.2 މިލިޔަނަށްވުރެ ގިނަ ފަސިންޖަރުން މަންޒިލްތަކަށް އުފުލައިދީފައެވެ.

ކުޑަ ގޮތަކަށް ފެށި މި ޚިދުމަތް، ތަޖުރިބާކާރު މުވައްޒަފުންނާއި ވަރުގަދަ ވަސީލަތްތަކާއެކު މިއަދު މިވަނީ 11 ޓުވިން އޮޓަރ މަތިންދާ ބޯޓުގެ ފްލީޓަކަށް ބަދަލުވެފައެވެ. އަދި މީގެ ކުރިން ހަމައެކަނި ރިސޯޓުތަކަށް ފަތުރުވެރިން އުފުލުމަށް ބޭނުންކުރަމުންދިޔަ މި ޚިދުމަތް ފުޅާކުރުމަށް ކުރެވިގެންދިޔަ މަސައްކަތްތަކުގެ ދަށުން ލޯކަލް ޓޫރިޒަމް އެންމެ ބޮޑަށް ފުޅާވެފައިވާ ރަށްތަކަށް މި ޚިދުމަތް ވަނީ ފުޅާކޮށްފައެވެ. އެގޮތުން މީހުން ދިރިއުޅޭ 4 ރަށަކަށް އޮޕަރޭޝަންތައް ހިންގަމުންދާއިރު، ފްލީޓް ބޮޑުކުރުމަށްޓަކައިވެސް ގިނަ މަސައްކަތްތަކެއް އަންނަނީ ކުރަމުންނެވެ.

"މޯލްޑިވިއަން ސީޕްލޭން ޓާމިނަލަށް މަތިންދާ ބޯޓުތައް އިތުރުކުރުމަށްޓަކައި މުޅިން އަލަަށް އުފައްދާފައިވާ އެންމެ ފަހުގެ ޖީލުގެ 2 ޓުވިން އޮޓާ ކްލާސިކް 300ޖީ މަތިންދާ ބޯޓަށް ވަނީ މިއަހަރުގެ އޮގަސްޓު މަހު އޯޑަރ ދެވިފައި. މި ދެ މަތިންދާ ބޯޓު އަންނަ އަހަރުގެ ތެރޭގައި ރާއްޖެ ގެނެވި، އޮޕަރޭޝަނުގައި ބޭނުންކުރެވެން ފެށޭނެ،" މޯލްޑިވިއަން ހިންގާ އައިލެންޑް އޭވިއޭޝަން ސަރވިސަސް ލިމިޓެޑްގެ މެނޭޖިންގ ޑިރެކްޓަރ އިބްރާހީމް އިޔާސް ވިދާޅުވިއެވެ.

ޒަމާނީ ފެންވަރަށް ތަރައްގީކޮށްފައިވާ ޓާމިނަލް

ސަރުކާރުން މި ދާއިރާއަށް ދެއްވާ ޚާއްޞަ އަހައްމިއްޔަތުކަމުގެ ދަށުން، މިދިޔަ އަހަރު ޢަމަލީ މަސައްކަތް ފެށި ޓާމިނަލާއެކު ޖާގައިގެ ގޮތުންނާއި ފެންވަރުގެ ގޮތުން ވަނީ ބޮޑެތި ކުރިއެރުންތަކެއް ހާސިލްކޮށްފައެވެ. ކުރިން ބޭނުންކުރަމުން އައި 10،000 އަކަފޫޓުގެ ސަރަޙައްދު ދެގުނައަށް ބޮޑުކޮށް، މުޅި އިމާރާތުގެ އެތެރެއާއި ބޭރުގެ ޑިޒައިނަށް ވަނީ ޒަމާނީ ފުރިހަމަކަމެއް ގެނެސްދީފައެވެ. މުޅި ޓާމިނަލަކީ އޭސީކުރެވިފައިވާ ހިތްގައިމު ތަނަކަށްވާއިރު، ބޯޑިން ގޭޓްތަކުގެ އަދަދު އިތުރުކުރެވި، ދަތުރުވެރިންގެ އިންތިޒާރުގެ ވަގުތުތައް އަރާމުކޮށްލުމަށްޓަކައި އެންމެ ޒަމާނީ އަދި ފަސޭހަ ފަރުނީޗަރުން ވަނީ މުޅި ތަން ޒީނަތްތެރިކޮށްފައެވެ.

ފަތުރުވެރިކަމުގެ ސިނާޢަތުގެ ބައިވެރިންނާއި ރިސޯޓުތަކާ މަޝްވަރާކޮށްގެން ފަރުމާކޮށްފައިވާ މި ޓާމިނަލަކީ ދިވެހިވަންތަ ސަގާފަތާއި ޤުދުރަތީ ރީތިކަން ދައްކުވައިދޭ ޚާއްޞަ ތީމަކަށް ބިނާކޮށްފައިވާ ތަނެކެވެ. މި ތަނަށް ވަދެގެންދާ ކޮންމެ ދަތުރުވެރިއަކަށްވެސް ދިވެހިރާއްޖޭގެ މެހެމާންދާރީ އިޙްސާސްކޮށްދިނުމުގެ ގޮތުން ޚާއްޞަ ޔުނީކް އޯޑިއޯ ތީމެއް ބޭނުންކުރާއިރު، ޓާމިނަލުގެ އެތެރޭގައި އެއްފަހަރާ 90 މީހުންނަށް އަދި ބޭރުގައި 40 މީހުންނަށް ޚިދުމަތް ދިނުމުގެ ޖާގަ ވަނީ ތަނަވަސްކޮށްފައެވެ.

މީގެ އިތުރުން، "ހުވަނދު" ލައުންޖަކާއި، ވީއައިޕީ ފަތުރުވެރިންނަށް ޚާއްޞަކޮށް މަތީ ފަންގިފިލާގައި 2 ޕްރައިވެޓް ލައުންޖާއި، ޢާއިލާތަކާއެކު ދަތުރުކުރާ ކުޑަކުދިންނަށް ޚާއްޞަ ކުޅޭ ސަރަޙައްދަކާއި، މޯލްޑިވިއަންގެ އަމިއްލަ ބްރޭންޑުގެ ހަދިޔާއާއި ލުއިކާނާ ލިބޭނެ ކިއޮސްކުތައް ވަނީ ޤާއިމުކޮށްފައެވެ.

އެހެން އެއްވެސް ޓާމިނަލަކުން ފެންނަން ނެތް ފަދަ ޚާއްޞަ ސިފަތަކުގެ ތެރޭގައި، އައުޓްޑޯ ގާޑަން އޭރިއާއާއި، ސީޕްލޭން ދަތުރުކުރާ ވޯޓާވޭ ފެންނަ ގޮތަށް ހަދާފައިވާ ވިއުއިންގ ޑެކު ފާހަގަކޮށްލެވެއެވެ. ހަމައެއާއެކު، ތިމާވެށި ރައްކާތެރިކުރުމުގެ ދަށުން، ކަނޑަށް ޕްލާސްޓިކް އެޅުން ހުއްޓުވުމަށް ޚާއްޞަ ރީސައިކްލިންގ ނިޒާމެއް ވަނީ ޓާމިނަލުގައި ހަމަޖައްސާފައެވެ. ދަތުރުވެރިން އުފުލުމަށް ބީވައިޑީގެ އިލެކްޓްރިކް ބެޓެރި ވެހިކަލްތައް ބޭނުންކުރަން ފަށާފައިވާއިރު، ޚިދުމަތްދޭ މުވައްޒަފުންގެ ފެންވަރު ރަނގަޅުކުރުމަށް އައު ތަމްރީނުތަކާއި މުވައްޒަފުންނަށް ޚާއްޞަ ޒަމާނީ ކެންޓީނެއްގެ ޚިދުމަތްވެސް ވަނީ ފަށާފައެވެ.

މޯލްޑިވިއަންގެ މި އައު ސީޕްލޭން ޓާމިނަލަކީ ހަމައެކަނި އިމާރާތަކަށް ގެނެވުނު ބަދަލެއް ނޫނެވެ. މިއީ ދިވެހިރާއްޖޭގެ ފަތުރުވެރިކަމުގެ ލަގްޒަރީ ބްރޭންޑް އިތުރަށް ވިދާލުވައިދީ، ދިވެހި ފަސްގަނޑަށް ފައިބާ ކޮންމެ މެހެމާނަކަށްވެސް އެއަރޕޯޓުން ފެށިގެން ދަތުރުގެ އެންމެ ފަހު މަންޒިލާ ހަމައަށް ފުރިހަމަ، އަރާމު އަދި ފަސޭހަ ޚިދުމަތެއް ކަށަވަރުކޮށްދިނުމަށްޓަކައި ޤައުމީ އެއަރލައިނުން އެޅި ވަރަށް ކާމިޔާބު އަދި ފަޚުރުވެރި ފިޔަވަޅެކެވެ. އަދި މިއީ ރާއްޖޭގެ ދަތުރުފަތުރުގެ ނިޒާމަށް އިންގިލާބީ ބަދަލެއް ގެނުވާނެ ކަމެއް ކަމަށް ދާއިރާގެ މާހިރުން ގަބޫލުކުރައްވައެވެ.