ރޮނާލްޑޯ ނެތި ޕޯޗުގަލް އަށް ފަސޭހަ މޮޅެއް

ރޮނަލްޑޯ ޓީމް ދޫކޮށްލި ފަހުން ކުޅުނު ފުރަތަމަ މެޗުގައި ޑެންމާކު އަތުން ޕޯޗްގަލް މޮޅުވެއްޖެއެވެ. ޔުއެފާ ނޭޝަންސް ލީގުގައި ޑެންމާކާ ދެކޮޅަށް ނިކުތުމުގެ ކުރިން ދުނިޔޭގެ ސުރުޚީތަކުން ޖާގަ ހޯދީ ޕޯޗްގަލް ކެޕްޓަން ކްރިސްޓިއާނޯ ރޮނަލްޑޯ ޓީމުގެ ކޭމްޕް ދޫކޮށް ދިޔަ ޚަބަރެވެ. އެއީ އޭގެކުރިން ނޯވޭ އަތުން މޮޅުވި މެޗުންވެސް ފުރުޞަތު ނުލިބި, އޭގެފަހުން ކޯޗު ދެއްކި ވާހަކަތަކާމެދުވެސް ހިތްހަމަނުޖެހި ރޮނަލްޑޯ ޓީމު ދޫކޮށް ދިއުމުން އޭނާ ނެތި ކުޅުނު މެޗު ޕޯޗްގަލް ކާމިޔާބުކުރީ 4-2 ނެވެ.

ޑެންމާކްގައި ކުޅުނު މެޗުގައި ދެފަހަރެއްގެ މަތީން ޑެންމާކުން ނަތީޖާ ހަމަހަމަވެސް ކުރިއެވެ. މެޗު ފަށައިގެން 13 ވަނަ މިނިޓުގައި ކަންސޭލޯ ޕޯޗްގަލްއަށް ކުރި ހޯދައިދީފައި ވަނިކޮށް, ޑަމްސްގާޑް 23 ވަނަ މިނިޓުގައި ނަތީޖާ ހަމަހަމަކުރިއެވެ. ޕޯޗްގަލްއިން ދެވަނަ ފަހަރަށް ލީޑް ނެގީ އޭގެ މިނިޓެއް ފަހުން ގޮންކާލޯ ރާމޯސްގެ ލަނޑުންނެވެ. ރޮނަލްޑޯގެ ބަދަލުގައި ކޯޗު ފުރުޞަތު ދެނީ ރާމޯސް އަށެވެ. އެކަމަކު ޑެންމާކުގެ ރަސްމުސް ހޮއިލުންޑް ދެވަނަ ފަހަރަށް ނަތީޖާ ހަމަހަމަ ކޮށްދިނެވެ. އޭނާ ނަތީޖާ ހަމަހަމަކޮށްދިނީ ދެވަނަ ހާފް ފަށައިގެން 8 ވަނަ މިނިޓުގައެވެ.

މެޗުގައި ޕޯޗްގަލް އިން ތިންވަނަ ފަހަރަށް ކުރިހޯދީ ވިޓީނިއާގެ ލަނޑުންނެވެ. އަދި މެޗުގެ ފުރިހަމަ ވަގުތު ހަމަވެ، ނިމެން ތިން މިނިޓަށް ވެފައި ވަނިކޮށް ޔާއޯ ފެލިކްސް ލަނޑު ޖަހާ ޕޯޗްގަލްއަށް މޮޅު ޔަގީންކޮށްދިނެވެ. ފެލިކްސް ކުޅެން ނިކުތީ ބަދަލަކަށެވެ. ޑެންމާކު އަތުން ޕޯޗްގަލް މޮޅުވި މެޗުގައި ރޮނަލްޑޯގެ އައިކޮނިކް ނަމްބަރު 7 އަށް ކުޅުނީ ރަފެއަލް ލެއާއޯއެވެ. އޭނާ ފުރަތަމަ އެގާރައިގަ ހިމެނުނެވެ.

މެޗަށްފަހު ކޯޗު ޖީސޫސް ބުނީ މޮޅުވީ އެންމެ މަތީފަންތީގައި ކުޅެގެން ކަމަށެވެ. ހަތަރު ގޯލު ޖަހާ ޕޯޗްގަލްއިން ޓީމުގެ ފެންވަރު ދެއްކިކަމަށް ކޯޗު ބުންޏެވެ. ރޮނަލްޑޯއާ ގުޅޭގޮތުން އަމާޒުވި ސުވާލުތަކަށް ޖަވާބުދެމުން ކޯޗު ބުނީ އޭނާގެ ކޯޗިންގ ކެރިއަރުގައި ވަކި ކުޅުންތެރިއަކަށް ވަކިގޮތެއް ނޯންނަ ކަމަށެވެ.
ކޯޗު ޖީސޫސް ޕޯޗްގަލްއާ ހަވާލުވެ ކުޅުނު ތިން މެޗުވެސް ވަނީ ކާމިޔާބުކޮށްފައެވެ. އޭނާ ޕޯޗްގަލް ގައުމީ ޓީމާ ހަވާލުވީ ފާއިތުވި ސީޒަންގައި ރޮނަލްޑޯ ކުޅެމުން އަންނަ އަލް-ނަސްރަށް ސައުދީ ޕްރޯ ލީގު ހޯދައިދިނުމަށްފަހުއެވެ.