ޖަރުމަނުގެ ގައުމީ ފުޓްބޯޅަ ޓީމުގެ ކޯޗު ކަމާއި ދާދި ފަހުން ހަވާލުވި ޔާގެން ކްލޮޕްގެ އިރުޝާދުގެ ދަށުން އެ ޓީމު ފުރަތަމަ ފަހަރަށް މޮޅުވެއްޖެއެވެ.
ޖަރުމަން މޮޅުވެފައިވަނީ ޔޫއެފާ ނޭޝަންސް ލީގުގެ ގްރޫޕް 2 ގައި ރޭ ސާބިޔާ އާއި ދެކޮޅަށް ކުޅުނު މެޗުން 2-0 ގެ ނަތީޖާއަކުންނެވެ. މިއީ ކްލޮޕްގެ އިރުޝާދުގެ ދަށުން ޖަރުމަން ކުޅުނު ތިންވަނަ މެޗެވެ.
މިއުނިކްގެ އެލިއަންޒް އެރީނާގައި 68 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ޖަރުމަނުން ވަނީ އެހެން މެޗުތަކާއި ހިލާފަށް ގިނައިރު ބޯޅަ ހިފަހައްޓައިގެން ކުޅެ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މުޅި މެޗުގައި ޖުމްލަ 32 ހަމަލާ ޖަރުމަނުން ސާބިޔާގެ ކޮޅަށް ފޮނުވާލާފައިވާއިރު އޭގެ ތެރެއިން 8 ހަމަލާއަކީ ގޯލަށް އަމާޒުކޮށް ފޮނުވާލާފައިވާ ހަމަލާތަކެކެވެ.
ޖަރުމަނުން މި މެޗުގައި ލީޑު ނަގާފައިވަނީ މެޗުގެ 39 ވަނަ މިނިޓުގައި ޓޮމް ބިޝޮފް ކާމިޔާބުކޮށްދީފައިވާ ލަނޑެކެވެ.
އަދި މެޗުގެ 61 ވަނަ މިނިޓުގައި ފްލޯރިއަން ވާޓްޒް ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފައެވެ. އޭނާ މި ލަނޑު ޖެހުމުގެ ކުރިން ފޮނުވާލި ހަމަލައެއް ވަނީ ގޯލުގެ ދަނޑީގައިވެސް ޖެހިފައެވެ.
މި ގްރޫޕްގައި މިހާތަނަށް ކޮންމެ ޓީމަކުންވެސް 3 މެޗު ކުޅެފައިވާއިރު ގްރީސް އަށް ލިބިފައިވާ 7 ޕޮއިންޓާއެކު އެ ޓީމު އޮތީ ގްރޫޕްގެ އެއްވަނަ މަގާމުގައެވެ. ދެވަނައިގައި އޮތް ނެދަލޭންޑްސްއަށް 5 ޕޮއިންޓް ލިބިފައިވާއިރު ޖަރުމަނަށް 3 މެޗުން ލިބިފައިވާ 4 ޕޮއިންޓާއެކު އޮތީ ތިންވަނައިގައެވެ.
މި މުބާރާތުގައި ޖަރުމަން ކުޅުނު ފުރަތަމަ މެޗުން 1-0 ގެ ނަތީޖާއަކުން ގްރީސް އަތުން ބަލިވެފައިވާއިރު ދެވަނަ މެޗުގައި ނެދަލޭންޑްސް އާއި ދެކޮޅަށް ކުޅުނު މެޗު ނިމިފައިވަނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.