އެކުވެރިކަމުގެ ފަހު މެޗުގައި ރާއްޖެއިން މިއަދު ލުބުނާނާ ދެކޮޅަށް

ކުރިއަށްދާ ފުޓުބޯޅައިގެ ބައިނަލްއަޤްވާމީ ބްރޭކުގައި ދިވެހިރާއްޖެއިން ކުޅޭ ތިންވަނަ މެޗުގައި މިއަދު ލުބުނާނާ ދެކޮޅަށް ނުކުންނާނެއެވެ.

އަންނަ ނޮވެމްބަރު މަހު ބަންގްލަދޭޝްގައި ފަށާ ސާފް ޗެމްޕިއަންޝިޕަށް ތައްޔާރުވުމަށް އަދި އެ މުބާރާތުގެ ކުރިން ބައިނަލްއަޤްވާމީ ވަރުގަދަ މެޗުތަކެއް ކުޅެ ތަޖުރިބާ ހޯދުމަށް ކުޅޭ އެކުވެރިކަމުގެ ތިންވަނަ މެޗުގައި ރާއްޖެއިން މިއަދު ލުބުނާނާ ދެކޮޅަށް ނުކުންނަ މެޗު ކުޅޭނީ ކިރްޤިސްޠާނުގައެވެ.

ލުބުނާނާއި ރާއްޖެއިން ވަނީ ބައިނަލްއަޤްވާމީ މައިދާނުގައި މީގެކުރިން ފަސް ފަހަރަށް ބައްދަލުކޮށްފައެވެ. މިއިން އެއްވެސް މެޗަކުން ރާއްޖެ މޮޅުވެފައެއް ނުވެއެވެ.

ރާއްޖެއާއި ލުބުނާނުން އެންމެފުރަތަމަ މެޗެއް ކުޅުނީ ވޯލްޑް ކަޕް ކޮލިފައިންގައި 2004ވަނަ އަހަރުއެވެ. ލުބުނާނުގައި ކުޅުނު އެމެޗުން ރާއްޖެ ބަލިވީ 0-3ގެ ނަތީޖާއަކުންނެވެ. ހަމަ އެ އަހަރު ކުޅުނު ކޮލިފައިންގެ ހޯމް މެޗުގައި ރާއްޖޭގައި ކުޅެ ދިވެހި ޓީމު ބަލިވީ 2-5 ގެ ނަތީޖާއަކުންނެވެ.

އެފަހުން މި ދެ ޤައުމު ފުޓުބޯޅައިގައި ކުރިމަތިލީ 2008ވަނަ އަހަރުއެވެ. އެ އަހަރު ބައިނަލްއަޤްވާމީ އެކުވެރިކަމުގެ ދެމެޗުގައި މި ދެ ޤައުމު ކުރިމަތިލިއިރު ކުޅުނު ފުރަތަމަ މެޗުން ލުބުނާން މޮޅުވީ 0-4ގެ ނަތީޖާއަކުންނެވެ. އަދި ދެވަނަ މެޗުން ރާއްޖެ ބަލިވީ 1-2ގެ ނަތީޖާއަކުންނެވެ.

އެފަހުން ގިނަ އަހަރުތަކެއް ވަންދެން މި ދެޓީމުގެ ކުރިމަތިލުމެއް ފެނިގެންނުދާއިރު މި ދެ ޤައުމުން ފުޓުބޯޅައިގައި ކުރިމަތިލި ފަސްވަނަ ފަހަރަކީ 2023 ވަނަ އަހަރުގެ ސާފް ޗެމްޕިއަންޝިޕުގައި ފެނިގެންދިޔަ ކުރިމަތިލުމެކެވެ. އިންޑިއާގައި އެފަހަރު ބޭއްވި ސާފް ޗެމްޕިއަންޝިޕުގައި ދެކުނު އޭޝިއާއިން ބޭރު ދެ ޤައުމަކަށް ފުރުސަތު ދީފައިވެއެވެ. މުބާރާތުގެ ފެންވަރު މަތިކޮށް، ވާދަވެރިކަން ބޮޑުކުރުމުގެ ބޭނުމުގައި އެފަހަރު ފުރުސަތު ދިނީ ލުބުނާނުގެ އިތުރުން ކުވެއިތަށެވެ.

ކުވެއިތުން ރަނަރަޕްކަން ހޯދި އެ މުބާރާތުގައި ރާއްޖެއާއި ލުބުނާން ބައްދަލުކުރި މެޗުން ލުބުނާން މޮޅުވީ 0-1ގެ ނަތީޖާއަކުންނެވެ.

ފުޓުބޯޅައިގައި ރާއްޖެއާއި ލުބުނާނުގެ ހަވަނަ ކުރިމަތިލުން ފެނިގެންދާ މެޗު ފަށާނީ މިއަދު ރާއްޖެ ގަޑިން 19:00 ގައެވެ.

ފީފާ ރޭންކިންއަށް ބަލާއިރު ލުބުނާން އޮތީ 107 ވަނައިގައެވެ. އޭޝިއާ ސަރަހައްދުގެ ރޭންކިންގައި ލުބުނާނަކީ 20ވަނައެވެ. ރާއްޖެއަކީ ދުނިޔޭގެ ފުޓުބޯޅަ ރޭންކިންގެ 173 ވަނައެވެ.