ގައުމީ ޓީމަށް ވަރުގަދަ ގިނަ މެޗުތަކެއް ބޭނުންވޭ: އުރުބާނީ

ޤައުމީ ފުޓުބޯޅަ ޓީމަށް ވަރުގަދަ ގިނަ މެޗުތަކެއް ލިބިއްޖެނަމަ އޭގެ ފައިދާ ކުރާނެ ކަމަށް ޤައުމީ ޓީމުގެ ކޯޗު ހަންގޭރީގެ އިސްތަވާން އުރުބާނީ ބުނެފިއެވެ.

ސާފް ޗެމްޕިއަންޝިޕަށް ތައްޔާރުވުމުގެ ގޮތުން ޤައުމީ ޓީމުން ޗައިނާގައި އެ ގައުމާ ދެކޮޅަށް ނުކުތްއިރު، އެ މެޗުން ޤައުމީ ޓީމު 3-0 ގެ ނަތީޖާއަކުން ވަނީ ބަލިވެފައެވެ. އަދި މިދިޔަ ހޯމަ ދުވަހު ޤައުމީ ޓީމު ވަނީ ކިރިގިސްތާނުގައި އެ ގައުމާ ދެކޮޅަށް ވެސް ކުޅެފައެވެ. އެ މެޗުން ރާއްޖެ ބަލިވީ 5-0 ގެ ނަތީޖާއަކުންނެވެ.

ޗައިނާއާ ކިރިގިސްތާނަކީ ރާއްޖެއާ އަޅާބަލާއިރު، ފީފާ ރޭންކިން މަތި ދެ ގައުމެވެ. އެގޮތުން ފީފާ ރޭންކިންގައި ޗައިނާ އޮތީ 93 ވަނައިގައެވެ. އަދި ކިރިގިސްތާން އޮތީ 106 ވަނައިގައެވެ.

ކިރިގިސްތާން މެޗަށްފަހު ވާހަކަ ދައްކަމުން އުރުބާނީ ބުނީ، ރާއްޖެއަށް މިކަހަލަ ވަރުގަދަ ގިނަ މެޗުތަކެއް ބޭނުންވާ ކަމަށެވެ. އަދި ޗައިނާ މެޗާއި، ކިރިގިސްތާން މެޗުގައި ވެސް ރާއްޖޭގެ ކުޅުން ގޯސް ނޫން ކަމަށް އުރުބާނީ ފާހަގަކުރިއެވެ.

އުރުބާނީ ބުނީ ކިރިގިސްތާން މެޗުގެ ނަތީޖާގެ ފަރަގު ބޮޑުވީ ފުރަތަމަ ހާފުގައި ހެދުނު ގޯސްތަކުގެ ސަބަބުން ކަމަށެވެ. އަދި ބައިކޮޅަށް 5 ލަނޑު ވަދެފައިވަނިކޮށް ނަތީޖާ ބަދަލުކޮށްލުމަކީ އުނދަގޫ ކަމެއް ކަމަށް އުރުބާނީ ފާހަގަކުރިއެވެ.

އުރުބާނީ ބުނީ ރާއްޖެއިން ތައްޔާރުވަމުން އަންނަނީ ސާފް ޗެމްޕިއަންޝިޕަށް ކަމަށާއި، މިހާރު މި ކުޅޭ އެކުވެރިކަމުގެ މެޗުތަކާއެކު ޓީމު އެކުލަވާލަން ފަސޭހަވާނެ ކަމަށް އުރުބާނީ ފާހަގަކުރިއެވެ.

މިފަހަރުގެ ފީފާ އިންޓަނޭޝަނަލް ބްރޭކުގައި ރާއްޖެއިން ތިން މެޗެއް ކުޅޭނެއެވެ. ރާއްޖެއަށް ބާކީ ދެން އޮތީ ކިރިގިސްތާނުގައި ލެބަނަންއާ ދެކޮޅަށް ކުޅޭ މެޗެވެ. ލެބަނަން އޮތީ ފީފާ ރޭންކިންގެ 114 ވަނައިގައެވެ.