އޭޝިއަން ގޭމްސްގައި އެންމެ ބޮޑު ކުރިއެރުމެއް ހޯދީ ސާފިންގް އިން

އޭޝިއަން ގޭމްސް އައިޗީ-ނަގޯޔާ 2026ގައި ރާއްޖެއިން ބައިވެރިވި ކުޅިވަރުތަކުގެ ތެރެއިން އެންމެ ބޮޑު ކުރިއެރުމެއް ހޯދި ކުޅިވަރަކަށް ސާފިން ވެއްޖެއެވެ.

އައިޗީ ޓަހާރާ ލޯންގް ބީޗުގައި ކުރިއަށްދާ އޭޝިއަން ގޭމްސްގެ ސާފިންގެ އިވެންޓުތަކުގައި ރާއްޖެއިން ވަނީ ތިންވަނަ ބުރުގެ ހީޓުގައި ވާދަކޮށްފައެވެ. ސާފިންގް ޓީމުންގެ ޒުވާން އެތުލީޓު ޔަސިން އަޙްމަދު ނާޝިދު ވަނީ ތިންވަނަ ބުރުގެ ހީޓުގައި ވާދަކޮށްފައެވެ. ތިންވަނަ ބުރުގެ ހީޓުގައި ޔަސިންގެ މައްޗަށް، ޗައިނާގެ ޝީޑޮންގް ވު ވަނީ ކުރިހޯދާފައެވެ. ދިވެހި ޓީމުން ފިރިހެނުންގެ ޝޯޓްބޯޑް ތިންވަނަ ބުރަށް ދިޔައީ ޔަސިން އެކަންޏެވެ.

އުމުރުން 16 އަހަރުގެ ޔަސިން ވަނީ އޭޝިއަން ގޭމްސްގައި ވާދަކުރިން ހުރިހާ ހީޓެއްގައިވެސް 8 ޕޮއިންޓަށްވުރެ މަތީ ސްކޯތަކެއް ހޯދާފައެވެ. އެގޮތުން ފުރަތަމަ ބުރުގައި 8.50 އަދި ދެވަނަ ބުރުގައި 8.13 ޕޮއިންޓް އޭނާ ހޯދިއެވެ.

ސާފިންއަކީ މިފަހަރުގެ އޭޝިއަން ގޭމްސްގައި ކޮލިފައި ވެގެން ރާއްޖެއިން ވާދަކުރި ހަމައެކަނި ކުޅިވަރެވެ.

ސާފިންގެ އިތުރުން، އެހެން ބައެއް ކުޅިވަރުތަކުން ވެސް ރާއްޖެ ވަނީ ކުރިއެރުންތަކެއް ހޯދާފައެވެ. އެގޮތުން އޭޝިއަން ގޭމްސްގެ ތާރީޚުގައި ވެސް ފުރަތަމަ ފަހަރަށް، ދިވެހިރާއްޖެއިން ޓޭބަލް ޓެނިހުގެ މިކްސްޑް ޑަބަލްސް އިވެންޓުގެ ގަދަ 16 ނުވަތަ ރައުންޑް އޮފް 16 ބުރުގައި މިފަހަރު ވާދަކޮށްފައިވެއެވެ. މި ތާރީޚީ ކާމިޔާބީ ހޯދީ ގޭމްސްގެ މި އިވެންޓުގައި ރާއްޖެ ތަމްޞީލުކުރާ މޫސާ މުންސިފް އަޙްމަދާއި ޢާއިޝަތު ރަފާ ނާޒިމްގެ ޕެއާ އިންނެވެ.

މީގެއިތުރުން، މިފަހަރުގެ ގޭމްސްގައި ޝޫޓިންގާއި ސްވިމިންއިން ގިނަ ގައުމީ ރެކޯޑުތަކެއް ރާއްޖޭގެ އެތުލީޓުން ވަނީ އައުކޮށްފައެވެ.