އޭޝިއަން ގޭމްސް: 3ވަނަ ބުރުގައި ޔަސިންގެ މައްޗަށް ޗައިނާ ކުރިހޯދައިފި
-
ދިވެހި ޓީމުން 3ވަނަ ބުރަށް ދިޔައީ ޔަސިން އެކަން
-
ޔަސިން ވަނީ 8.44 ޕޮއިންޓް
-
ވާދަކުރި ޗައިނާގެ ޝީޑޮންގް ވު ވަނީ 10.93 ޕޮއިންޓް ހޯދާފައި
އޭޝިއަން ގޭމްސް އައިޗީ-ނަގޯޔާ 2026ގައި ދިވެހި ސާފިންގް ޓީމުންގެ ޒުވާން އެތުލީޓު ޔަސިން އަޙްމަދު ނާޝިދު ވާދަކުރި ތިންވަނަ ބުރުގެ ހީޓުގައި ޔަސިންގެ މައްޗަށް ޗައިނާގެ ސާފަރު ކުރިހޯދައިފިއެވެ.
އައިޗީ ޓަހާރާ ލޯންގް ބީޗްގައި ކުރިއަށްދާ އޭޝިއަން ގޭމްސްގެ ސާފިންގް އިވެންޓްތަކުގައި ދިވެހި ޓީމުން ފިރިހެނުންގެ ޝޯޓްބޯޑް ތިންވަނަ ބުރަށް ދިޔައީ ޔަސިން އެކަންޏެވެ. މި އިވެންޓުގެ ހީޓު 3ގައި ޔަސިން ވަނީ 8.44 ޕޮއިންޓް ހޯދާފައިއެވެ. މި ހީޓުގައި ޔަސިންއާއި ވާދަކުރި ޗައިނާގެ ޝީޑޮންގް ވު ވަނީ 10.93 ޕޮއިންޓް ހޯދާފައެވެ.
އުމުރުން 16 އަހަރުގެ ޔަސިން ވަނީ އޭޝިއަން ގޭމްސްގައި ވާދަކުރިން ހުރިހާ ހީޓެއްގައިވެސް 8 ޕޮއިންޓަށްވުރެ މަތީ ސްކޯތަކެއް ހޯދާފައެވެ. އެގޮތުން ފުރަތަމަ ބުރުގައި 8.50 އަދި ދެވަނަ ބުރުގައި 8.13 ޕޮއިންޓް އޭނާ ހޯދިއެވެ.
މިއަދުގެ މި އިވެންޓާއެކު ދިވެހި ސާފިންގް ޓީމުން 20 ވަނަ އެޝިއަންގޭމްސްގައި ވާދަކުރަންޖެހޭ އިވެންޓުތައް ނިމުނީއެވެ.