އަޔަލެންޑުން އިޒްރާއީލް ބަލިކުރި މެޗުގައި, ދެޓީމްގެ ކުޅުންތެރިން ސަލާމް ވެސް ނުކުރި!

ޔުއެފާ ނޭޝަންސް ލީގުގައި ރިޕަބްލިކް އޮފް އަޔަލެންޑުން އިޒްރާއީލް ބަލިކުރި މެޗުގެ ކުރިންވެސް އަދި ފަހުންވެސް ދެޓީމްގެ ކުޅުންތެރިން ސަލާމް ކުރަން ދެކޮޅު ހަދައިފިއެވެ. އެކަން އެގޮތަށް ހިނގާނެކަން މެޗުގެ ކުރިންވެސް އޮތީ ޔަގީންކުރެވިފައެވެ.

ނިއުޓްރަލް ދަނޑެއްގައި ކުޅުމަށް ހަންގޭރީގައި މެޗު ފެށުމުގެ ކުރިން ދެޓީމްގެ ކެޕްޓަނުންވެސް ސަލާމް ނުކުރެއެވެ. އަދި ޕެނަންޓް ބަދަލުކުރުމެއްވެސް ނެތެވެ. އަދި 3-0 ން އަޔަލެންޑުން މެޗު ކާމިޔާބުކުރުމަށްފަހުވެސް ސަލާމެއް ނުކުރެއެވެ. މެޗުގެ ކުރިން އިޒްރާއީލްގެ ގައުމީ ސަލާމް ކިޔަމުން ދިޔަވަގުތުވެސް އަޔަލެންޑްގެ ކުޅުންތެރިން ތިބީ އިސްދަށަށް ޖަހައިގެންނެވެ.

މެޗު އަޔަލެންޑުން ކުޅުނީވެސް ކަޅު ބޭންޑާ އެކުއެވެ. އެއީ އިޒްރާއީލުން ޝަހީދުކުރަމުންދާ ފަލަސްތީނު ރައްޔިތުންގެ ހަނދާނުގައެވެ. މެޗުގައި އަޔަލެންޑްގެ ތިންވަނަ ލަނޑު ޖެހުމަށްފަހު ޖެކް މޮޔިލަން ޓީމްގެ ބެޖަށް ބޮސް ދިނުމުގެ ބަދަލުގައި އެންމެ ފުރަތަމަ ބޮސްދިނީ އަތުގައި އަޅާފައި އޮތް ކަޅު ބޭންޑް ނެގުމަށްފަހު ބޭންޑަށެވެ. ފުރަތަމަ 25 މިނިޓްގެ ތެރޭގައި އަޔަލެންޑުން ވަނީ ތިން ލަނޑުގެ ލީޑެއް ނަގާފައެވެ.

މެޗު އަޔަލެންޑުން ކުޅުނީ އެމެޗު ނުކުޅެންވެސް ޕްރެޝަރ ގްރޫޕުން ދިޔައީ ޕްރެޝަރ ކުރަމުންނެވެ. 'ސްޓޮޕް ދަ ގޭމް ކެމްޕެއިން' ގެ ދަށުން މެޗު ނުކުޅެން ޕްރެޝަރު ކުރިޔަސް އަޔަލެންޑުން މެޗު ކުޅުނީ ޓީމްގެ ގިނަ ކުޅުންތެރިން ކުޅެން ނިންމުމުންނެވެ. އެނިންމުން ނިންމީ ދިގުލައިގެންދިޔަ ބައްދަލުވުމަކަށްފަހު ކުޅުންތެރިންގެ ވޯޓުން, މެޖޯރިޓީ ލިބުމުންނެވެ. އެކަމަކު އަޔަލެންޑްގެ އެއްވަނަ ކީޕަރު ބަޒޫނޫ ވަނީ މެޗު ކުޅެން އުނދަގޫކަމަށް ބުނެ, އިޒްރާއީލް މެޗު ނުކުޅެ ޓީމާ ވަކިވެފައެވެ. އެކަމަކު އެއީ ހަމައެކަނި އިޒްރާއީލް މެޗަށް ނިންމި ނިންމުމެކެވެ. ކުރިއަށް އޮތް މެޗަށް އޭނާ ޓީމާ ގުޅޭނެކަން ކޯޗު ހޯލްގްރިމްސަން ވަނީ ޔަގީންކޮށްދީފައެވެ. އަދި އޭނާގެ ކީޕަރުގެ އެނިންމުމާމެދު އެއްވެސް މީހަކު ސުވާލުވެސް ނުއުފައްދާކަމަށް ބުންޏެވެ. އަދި މެޗުން މޮޅުވުމުން ކީޕަރު ބަޒޫނާވެސް އުފާވާނެ ކަމަށް ބުންޏެވެ.

އަޔަލެންޑުން އިޒްރާއީލާ ދެކޮޅަށް މެޗު ކުޅުނީ އެމީހުންގެ ސަޕޯޓަރުންވެސް ނުވައްދައެވެ. އިޒްރާއީލުންވެސް ތިބީ މަދުއަދަދެއްގެ ސަޕޯޓަރުންނެވެ. މެޗަށްފަހު އަޔަލެންޑްގެ ކޯޗު ބުނީ އޭނާގެ ކުޅުންތެރިން ދުނިޔެއަށް ދިނީ މެސެޖެއް ކަމަށެވެ. އެއީ ހަމައެކަނި އަޔަލެންޑްގެ ރައްޔިތުންނަށް ދިން މެސެޖެއް ނޫންކަމަށް އޭނާ ބުންޏެވެ. މެޗު ކުޅުނަސް ގިނަ ކުޅޫންތެރިންނަށް މެޗު ކުޅެން އުނދަގޫވިކަންވެސް ކޯޗު ފާހަގަކުރިއެވެ.