ޞުލްޙައިގެ މަޝްވަރާތަކަށް ޔޫކްރެއިނަށް ވަޑައިގެންނެވި އެމެރިކާގެ މަންދޫބުން އެ ޤައުމުން ފުރައިވަޑައިގެންނެވިތާ ކުޑައިރުކޮޅެއްގެ ތެރޭގައި، ރަޝިއާއިން ޔޫކްރެއިންގެ ވެރިރަށް ކީވަށް އަލުން ވައިގެ ހަމަލާތައް ދޭން ފަށައިފިއެވެ. ސެޕްޓެންބަރު 8 ވަނަ ދުވަހުގެ ފަތިހު ބެލިސްޓިކް މިސައިލް ބޭނުންކޮށްގެން ދިން މި ހަމަލާތަކުގައި ހަ މީހަކު ޒަޚަމްވި ކަމަށް އެ ސިޓީގެ މޭޔަރު ވިޓާލީ ކްލިޗްކޯ ވިދާޅުވިއެވެ. މީގެއިތުރުން، މި ހަމަލާތަކާ ގުޅިގެން މީހުން ދިރިއުޅޭ އިމާރާތެއްގެ ތެރޭގައި ބަޔަކު ތާށިވި ކަމަށާއި، ކީވްގެ އެކި ސަރަޙައްދުތަކުގައި އަލިފާން ރޯވި ކަމުގައި އޭނާ ވިދާޅުވިއެވެ.
ވެއްޓުނު މިސައިލްގެ ބައިތަކުގެ ސަބަބުން ފަސް ފަންގިފިލައަށް އިމާރާތްކޮށްފައި ހުރި އިމާރާތަކަށާއި ތިން ފަންގިފިލާގައި މީހުން ދިރިއުޅޭ އިމާރާތަކަށް ގެއްލުން ލިބުނު ކަމުގައި ކީވްގެ އަސްކަރީ އިދާރާއިން ވެސް ބުންޏެވެ. ހަމަލާތައް ދީފައިވާ ވަގުތު ރައްކާތެރިކަން ހޯދުމަށް ޝެލްޓަރތަކަށް ނުވަތަ ރައްކާތެރި ބިންގަރާސްފަދަ ތަންތަނަށް ވަނުމަށް އިދާރާތަކުން ވަނީ ޢާންމުންނަށް އަންގާފައެވެ. ކީވުން ގޮވުންތަކުގެ އަޑު އިވެމުންދިޔަ ވަގުތު، ހުޅަނގުގެ ދިފާޢީ އިއްތިޙާދުގެ (ނޭޓޯ) އަދި ވިލާތުގެ އިއްތިޙާދުގެ (އީޔޫ) މެންބަރެއް ކަމުގައިވާ އަވަށްޓެރި ޕޮލެންޑުގެ ވައިގެ ސަރަޙައްދު ހިމާޔަތްކުރުމަށް އަސްކަރީ މަތިންދާބޯޓުތަކުން ޚާއްޞަ އޮޕަރޭޝަނެއް ފެށި ކަމުގައި އެ ޤައުމުގެ އަސްކަރިއްޔާއިން ބުންޏެވެ. މިއީ، ވައިގެ ސަރަޙައްދަށް ނުރައްކަލެއް ކުރިމަތިވެދާނެތީ އެޅި ފިޔަވަޅެއް ކަމުގައި ވެސް ޕޮލެންޑުގެ އަސްކަރިއްޔާއިން ބުންޏެވެ.
މި ހަމަލާތައް އަލުން ފެށުނީ، ޔޫކްރެއިނުގެ ރައީސް ވޮލޮޑޮމީރް ޒެލެންސްކީއާ އާދީއްތަ ދުވަހު ބައްދަލުކުރެއްވުމަށްފަހު، އެމެރިކާގެ މަންދޫބުން ކަމުގައިވާ ޖެރަޑް ކުޝްނަރ އަދި ސްޓީވް ވިޓްކޮފް ފުރައިވަޑައިގަތުމާ ގުޅިގެންނެވެ. މިއީ، ހަތަރު އަހަރާއި ހަ މަހަށް ދެމިގެން ގޮސްފައިވާ ހަނގުރާމަ ނިންމުމަށް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ކުރަމުންދާ މަސައްކަތުގެ ދަށުން ކުޝްނަރއާއި ވިޓްކޮފް ކުރެއްވި ދަތުރުފުޅެކެވެ. ރަޝިއާގެ ވެރިރަށް މޮސްކޯގައި ބޭއްވި މަޝްވަރާތަކަށްފަހު އެ ބޭފުޅުން ޔޫކްރެއިންގެ ވެރިރަށަށް ވަޑައިގެންނެވިއިރު، އެމެރިކާއިން މެދުވެރިވެގެން ރަޝިއާއާއި ޔޫކްރެއިނާ ދެމެދު އަލުން ޞުލްޙައިގެ މަޝްވަރާތައް ފެށުމުގެ ފުރުޞަތު އޮތް ކަމުގައި ކްރެމްލިނުން ބުންޏެވެ.
އަނެއްކޮޅުން، މޮސްކޯގެ އިރުދެކުނުން 730 ކިލޯމީޓަރު ދުރުގައިވާ ސަރަޓޯވްގެ ޢާންމު އުމްރާނީ ވަސީލަތްތަކަށް ޔޫކްރެއިނުގެ ޑްރޯން ހަމަލާތަކެއް އަރައި، މީހުން ޒަޚަމްވި ކަމަށް އެ ސަރަޙައްދުގެ ގަވަރުނަރު ވިދާޅުވިއެވެ. ވޮލްގާ ކޯރު ކައިރީގައި އޮންނަ މި ރަށަކީ ރަޝިއާގެ ދައުލަތުގެ ތެޔޮ ކުންފުނި ރޮސްނެފްޓުން ހިންގާ ބޮޑު ތެޔޮ ސާފުކުރާ ކާރުޚާނާއަކާއި، އަސްކަރީ އަދި ސިނާޢީ އެތައް މަރުކަޒެއް ހުންނަ ރަށެކެވެ.