ބްރެޒިލްގެ މިޑްފީލްޑަރު ކަސެމީރޯ އެމެރިކާގެ އިންޓަ މިއާމީ އަށް ކުޅެން ސޮއިކޮށްފި އެވެ.
އުމުރުން 34 އަހަރުގެ މެންޗެސްޓާ ޔުނައިޓެޑްގެ މިޑްފީލްޑަރު މިއާމީ އަށް ސޮއިކުރުމުން ދެން އޭނާ ފެނިގެންދާނީ އާޖެންޓީނާގެ ކެޕްޓަން ލަޔޮނަލް މެސީއާ އެކުގަ އެވެ.
މެސީ އާއި އުރުގުއޭގެ ފޯވަޑް ލުއިސް ސުއަރޭޒް ބާސެލޯނާ އަށް ކުޅުނު ދުވަސްވަރު ކަސެމީރޯ އަކީ އެންމެ ވާދަވެރި ރެއާލް މެޑްރިޑްގެ މުހިންމު ކުޅުންތެރިއެކެވެ. މި ބަދަލަށް މީހުންގެ ޝައުގުވެރިކަން ހުއްޓިފައިވާ މައިގަނޑު ސަބަބަކީ ވެސް ބާސެލޯނާ އާއި ރެއާލް މެޑްރިޑްގެ ވާދަވެރިކަމެވެ.
މަޝްހޫރު ޑޭވިޑް ބެކަމް ހިންގާ މިއާމީ އަށް ކަސެމީރޯ ސޮއިކުރީ ދެ އަހަރު ދުވަހަށެވެ. އެއީ ބޭނުންވެއްޖެނަމަ ތިން ވަނަ އަހަރަކަށް ކޮންޓްރެކްޓް ދަންމާލެވޭ ގޮތަށެވެ.
އެންމެ ފަހުގެ ވޯލްޑް ކަޕުގައި ބްރެޒިލް ޓީމަށް ކުޅުނު ކަސެމީރޯ ވަނީ ގައުމީ ޓީމަށް މިހާތަނަށް 91 މެޗުން 10 ލަނޑު ޖަހައިދީފަ އެވެ. އޭނާ މިއާމީ އަށް ބަދަލުވާން ޖެހުނީ މެންޗެސްޓާ ޔުނައިޓެޑްގެ އައު ސީޒަނުގެ ޕްލޭނުގައި ނުހިމެނޭތީ އެވެ.
"އަހަރެންނަށް މިކުލަބުގެ ޕްރޮޖެކްޓް ވަރަށް ކަމުދޭ. މިހެންވެ މިއާމީ އަށް ސޮއިކުރީ. ކޮންމެ ކުޅުންތެރިއަކު ވެސް ބޭނުންވަނީ ކުރިއަރައިދާން. މި ޕްރޮޖެކްޓުން އެ ފުރުސަތު ލިބޭ،" ކަސެމީރޯ ބުންޏެވެ.
"އަހަރެން ވަރަށް ކުރިއްސުރެ ބޭނުންވާ ކުޅުންތެރިއެއް ކަސެމީރޯ އަކީ. އަހަރެން މިހުރީ ވަރަށް ފަހުރުވެރިވެފައި އޭނާ މި ކުލަބާ ގުޅުމުން. އޭނާ އަކީ ކާމިޔާބު ހޯދާ މީހެއް. ވަރަށް ގިނަ ކުލަބުތަލުގައި އޭނާ ވަނީ ޗެމްޕިއަނެއްކަން ސާބިތު ކޮށްދީފައި،" ބެކަމް ބުންޏެވެ.
ނަމަވެސް ކަސެމީރޯގެ އިމޭޖް ރައިޓްގެ މައްސަލަ މޭޖް ސޮކާ ލީގުން މިހާރު ވަނީ ބަލަން ފަށައިފަ އެވެ. ސަބަބަކީ މިއާމީ އަށް އޭނާ ސޮއިކުރިއިރު އެލްއޭ ގެލެކްސީއާ މަސްލަހަތު ފުށުއަރާ ކަންކަންތައް ހިމެނޭ ކަމަށް ތުހުމަތު ކުރެވޭތީ އެވެ.