އިނގިރޭސިވިލާތުގައި ވެރިކަންކުރާ ލޭބަރ ޕާޓީގެ އެތެރޭގެ ފިއްތުންތައް ބޮޑުވުމާ ގުޅިގެން، ޕާޓީގެ އިސްވާރުގެ މަޤާމުން ބޮޑުވަޒީރު ކީރް ސްޓާމަރ އިސްތިޢުފާ ދެއްވާނެކަން އިޢުލާން ކުރައްވައިފިއެވެ. އޭނާ މި ކަން އިޢުލާނު ކުރައްވާފައި ވަނީ ޓީވީ މެދުވެރިކޮށް ޤައުމާ މުޚާޠަބު ކުރައްވައި ވާހަކަފުޅު ދައްކަވަމުންނެވެ.
ސްޓާމަރ ވިދާޅުވީ، ކުރިއަށް އޮތް ޢާންމު އިންތިޚާބުގައި ޕާޓީއަށް ކާމިޔާބީ ހޯދައިދިނުމަށް އޭނާއަށްވުރެ ބޮޑަށް އެކަށީގެންވާ އެހެން އިސްވާރަކު ހޮވުމަށް ޕާޓީގެ ގިނަ މެންބަރުން ބޭނުންވާ ކަމުގައެވެ. އަދި، ޕާޓީގެ އެ ނިންމުން ހެޔޮ ހިތުން ޤަބޫލުކުރައްވާ ކަމުގައެވެ. ސްޓާމަރ އިސްތިޢުފާ ދެއްވަން ނިންމެވި މައިގަނޑު ސަބަބަކީ، އިނގިރޭސިވިލާތުގެ އެއް ބައި ކަމުގައިވާ އިންގްލެންޑުގެ އުތުރުގެ ސަރަޙައްދެއްގެ ބައި-އިލެކްޝަން އޭނާގެ ވާދަވެރިޔާ އެންޑީ ބަރނަމް ބޮޑު އަޣުލަބިއްޔަތަކުން ކާމިޔާބު ކުރެއްވުމެވެ.
އުމުރުފުޅުން 63 އަހަރުގެ ސްޓާމަރއަކީ ކުރިން ޤާނޫނީ ވަކީލެއްގެ ގޮތުގައި މަސައްކަތް ކުރެއްވި ބޭފުޅެކެވެ. ސިޔާސީ ގޮތުން ނިންމެވި ބައެއް ނިންމެވުންތަކުގައި ހެއްދެވިފައިވާ ގޯސްތަކާއި އެކި މައްސަލަތަކުގެ ސަބަބުން، ވޯޓުލާ މީހުންގެ މެދުގައި އޭނާގެ މަޤުބޫލުކަން ވަނީ ވަރަށް ބޮޑަށް ދަށަށް ގޮސްފައެވެ. 2024 ވަނަ އަހަރު އިނގިރޭސިވިލާތުގެ ބޮޑުވަޒީރުކަމުގެ މަޤާމާ ސްޓާމަރ ޙަވާލުވެވަޑައިގެންނެވުމާއެކު ކޮންޒަރވެޓިވް ޕާޓީގެ 14 އަހަރުވީ ދިގު ވެރިކަމަށް ވަނީ ނިމުމެއް އައިސްފައެވެ. އަދި، އެއީ 1997 ވަނަ އަހަރަށް ފަހު ލޭބަރ ޕާޓީއަށް ލިބުނު އެންމެ ބޮޑު ކާމިޔާބީއެވެ.
ސްޓާމަރ މިހާރު ވަނީ އިސްތިޢުފާ ދެއްވުމުގެ ނިންމެވުން ރަސްގެފާނު ޗާލްސްއާ ޙިއްޞާކުރައްވާފައެވެ. އަދި، ލޭބަރ ޕާޓީގެ އައު އިސްވާރު އިންތިޚާބުކުރުމުގެ އިންތިޒާމުތައް ހަމަޖެއްސުމަށް ޕާޓީގެ އިންތިޚާބުތަކާ ބެހޭ ކޮމިޓީގެ ކިބައިން އެދިވަޑައިގަންނަވާފައެވެ. އެ މަޤާމަށް ކުރިމަތިލުމުގެ ފުރުޞަތު ޖުލައި 9 ވަނަ ދުވަހު ހުޅުވައިލެވޭނެ ކަމުގައި ރިޕޯޓުތައް ބުނެއެވެ.
އިނގިރޭސިވިލާތުގެ ވެރިކަމުގެ ނިޒާމު އޮންނަ ގޮތުން، ބޮޑުވަޒީރު ކަމުގެ މަޤާމު ފުރުއްވާނީ، ޤާނޫނުހަދާ މަޖިލީހުގައި އަޣުލަބިއްޔަތު ބޮޑު ޕާޓީއެއްގެ ވެރިޔާއެވެ. ލޭބަރ ޕާޓީގެ ބޮޑު އަޣްލަބިއްޔަތެއް މި ވަގުތު ހައުސް އޮފް ކޮމަންސްގައި އޮތުމުގެ ސަބަބުން، ބޮޑުވަޒީރުކަމުގެ މަޤާމާ ދެން ޙަވާލުވެވަޑައިގަންނަވާނީ އެ ޕާޓީގެ އިސްވާރުކަމުގެ މަޤާމަށް އިންތިޚާބުކުރެވޭ ބޭފުޅެކެވެ.
ސްޓާމަރ ވިދާޅުވީ، ލޭބަރއަށް އައު އިސްވާރަކު އިންތިޚާބު ކުރެވެންދެން އެ މަޤާމުގެ ޒިންމާތައް ފުރިހަމަ ކުރައްވާނެ ކަމުގައެވެ. އަދި، ސެޕްޓެންބަރު މަހު ޤާނޫނުހަދާ މަޖިލީހުގެ ޖަލްސާތައް ފެށުމުގެ ކުރިން ބޮޑުވަޒީރުކަމުގެ މަޤާމަށް އައު ބޭފުޅަކު ޢައްޔަންކުރެވޭނެ ކަމުގައެވެ. އަދި، އޮމާންކަމާއެކު ވެރިކަން ބަދަލުކުރުމަށް ފުރިހަމަ އެއްބާރުލުން ދެއްވާނެ ކަމުގެ ޔަޤީންކަން ވެސް އޭނާ ދެއްވިއެވެ.