ރައްކާ ރޯޑް ސޭފްޓީ ކެމްޕެއިންގައި 3 ކުންފުންޏަކުން ބައިވެރިވެއްޖެ

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ކުރިއަށްގެންދާ "ރައްކާ ރޯޑް ސޭފްޓީ ޕާޓްނަޝިޕް" އެއްބަސްވުމުގައި 3 ކުންފުންޏަކާއެކު ދިވެހި ފުލުހުންގެ ޚިދުމަތުން ސޮއިކޮށްފިއެވެ.

މިއެއްބަސްވުމުގައި ފުލުހުންނާއެކު ސޮއިކުރީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއި ޝީޝާ ޕްރައިވެޓް ލިމިޓެޑާއި އަވަސް އެންޓަރޕްރައިސަސް ޕްރައިވެޓް ލިމިޓެޑެވެ.

ރައްކާ ކެމްޕެއިނަކީ މަގުމަތީގެ ސަލާމަތާއި ރައްކާތެރި ކަމަށް ޢާއްމުން ހޭލުންތެރިކުރުމަށް ސިލްސިލާކޮށް ބާއްވަމުން އަންނަ ކެމްޕެއިނެކެވެ.

މި އެއްބަސްވުމުގައި ފުލުހުންގެ ފަރާތުން ސޮއިކުރެއްވީ ކޮމިޝަނަރ އޮފް ޕޮލިސް އަޙްމަދު މުޙައްމަދެވެ. އެމްޓީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ އަހުމަދު ސައުދީއެވެ. ޝީޝާގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ ސީއީއޯ އިބްރާހިމް ހުޝާމްއެވެ. އަދި އަވަސް އެންޓަޕްރައިސަސްގެ ފަރާތުން ސޮއިކުރެއްވީ، މެނޭޖިންގ ޑިރެކްޓަރ މުޙައްމަދު ޔާނު ރަމީޒްއެވެ.

The Maldives Police Service joined hands with @MTCCPlc, Sheesha Pvt. Ltd., and Avas Enterprises Pvt. Ltd. for the Rakka Road Safety Campaign.

On behalf of the police, @PoliceMvCP Ahmed Mohamed signed the MoU. The agreement was also signed by Deputy Commissioner of Police… pic.twitter.com/zmfzmBxb3H

— Maldives Police (@PoliceMv) April 9, 2026

މި ކެމްޕެއިންގެ ހަރަކާތްތައް މާލެއާއި އަތޮޅުތެރޭގައި ކުރިއަށް ގެންދިއުމަށް ހަމަޖެހިފައިވާއިރު، ކެމްޕެއިންގެ ތެރެއިން މަގުމަތީގެ ގަވާއިދުތަކަށް ހޭލުންތެރިކުރުމުގެ ވީޑިއޯ ކްލިޕާއި، އެކްސިޑެންޓް ރޯލްޕްލޭތަކާއި، ޓީވީ ޕްރޮގްރާމާއި އާއްމުން ގިނައިން އެއްވެ އުޅޭ ތަންތަނުގައި ބިލް ބޯޑު ބަހައްޓައިގެން ހޭލުންތެރިކަން އިތުރުކުރުމުގެ މެސެޖުތައް ފޯރުވައިދޭނެއެވެ.

މި އެއްބަސްވުމުގެ ސަބަބުން ފުލުހުން ކުރިއަށްގެންދާ ރައްކާ ރޯޑްޝޯގައި މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ގުޅިގެން މަސައްކަތްކުރެވޭނެކަމަށް ދިވެހި ފުލުހުންގެ ޚިދުމަތުން ވިދާޅުވެއެވެ.

"ރައްކާ ކެމްޕެއިން" ފުރަތަމަ ބާއްވާފައިވަނީ 2014ވަނަ އަހަރުއެވެ.