ހުޅުމާލޭގެ ކެފޭއެއްގެ ބަދިގޭގައި އަލިފާނުގެ ޙާދިސާއެއް

ހުޅުމާލޭގެ ފޭސް 1 ގައި ހުންނަ ކްލީން ޕްލޭޓް ނަމަކަށް ކިޔާ ކެފޭގެ ބަދިގޭގައި ރޯވި އަލިފާން، ހުޅުމާލޭ ފަޔަރ ސްޓޭޝަންގެ ފަޔަރ ފައިޓަރުން ނިއްވާލައިފިކަމަށް އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ހާމަކުރާގޮތުގައި މި ހާދިސާގެ މަޢުލޫމާތު އެމްއެންޑީއެފަށް ލިބުނީ ރޭ މެންދަމު 02:20 ހާއިރުއެވެ. އަލިފާން ރޯވިކަމުގެ މައުލޫމާތު ހުޅުމާލޭ ފަޔަރ ސްޓޭޝަނަށް ލިބުމާއެކު، އެ ފަޔަރ ސްޓޭޝަނުގެ ފަޔަރފައިޓަރުން ވަނީ އެ ސަރަހައްދަށް ގޮސްފައެވެ. ފަޔަރފައިޓަރުން ކުރި މަސައްކަތުން ބަދިގޭގައި ރޯވި އަލިފާން ނިއްވާލެވުނީ ރޭ މެންދަމު 02:34 ހާއިރުކަމަށްވެސް އެމްއެންޑީއެފުން ވިދާޅުވެއެވެ.

އެމްއެންޑީއެފުން މައުލޫމަތުދޭގޮތުގައި މި ހާދިސާގައި އަލިފާން ރޯވެފައިވަނީ ކެފޭގެ ބަދިގޭގައި ބޭނުންކުރަމުންދިޔަ ގޭސްފުޅީގައެވެ. މި ހާދިސާގައި ކެފޭގެ ބަދިގޭގެ އެކިބައިތަކަށް ގެއްލުން ލިބިފައިވާކަމަށް އެމްއެންޑީއެފުން ވިދާޅުވެއެވެ.

މިހާދިސާގައި އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފާނުވާކަމަށް އެމްއެންޑީއެފުން ވިދާޅުވެއެވެ.