އީރާނަށް ދެވަނަ ބަލި، އޮސްޓްރޭލިއާއަށް ދެވަނަ މޮޅު

އޭއެފްސީ ވިމެންސް އޭޝިއަން ކަޕުގެ ގުރޫޕު ސްޓޭޖުގައި ކުޅުނު ދެވަނަ މެޗުން ވެސް އީރާން ބަލިވިއިރު، އޮސްޓްރޭލިއާއިން ދެވަނަ މޮޅު ހޯދައިފިއެވެ.

މުބާރާތުގައި މި ދެ ޓީމުގެ ދެވަނަ މެޗަކަށްވީ މި ދެ ޓީމުގެ ކުރިމަތިލުމަކަށެވެ. އޮސްޓްރޭލިއާގައި ކުޅުނު މި މެޗުން އެ ޤައުމު މޮޅުވީ 0-4 ގެ ފަރަގު ބޮޑު ނަތީޖާއަކުންނެވެ.

މެޗު ފަށައިގެން އަށް މިނެޓުގެ ތެރޭގައި އޮސްޓްރޭލިއާއިން ލަނޑެއް ޖަހައި ލީޑުނެގިއެވެ. މި ލަނޑު އެ ޓީމަށް ކާމިޔާބުކޮށްދިނީ އެމީ ސަޔާއެވެ. މި ހާފުގައި އިތުރު ދެ ލަނޑު އޮސްޓްރޭލިއާއިން ކާމިޔާބުކުރިއެވެ. އެގޮތުން 27 ވަނަ މިނެޓުގައި މެރީ ފައުލާ ވަނީ ދެވަނަ ލަނޑު ކާމިޔާބުކޮށްދީ އޮސްޓްރޭލިއާއަށް ލީޑު ފުޅާކޮށްދީފައެވެ.

މި ހާފުގައި އެ ޓީމުން ޖެހި ތިންވަނަ ލަނޑު، 35 ވަނަ މިނެޓުގައި ކާމިޔާބުކޮށްދިނީ އެލާނާ ކެނެޑީއެވެ. ތިން ލަނޑުގެ ލީޑެއްގައި އޮވެ އޮސްޓްރޭލިއާއިން ދެވަނަ ހާފު ފެށިއިރު، މި ހާފު ފަށައިގެން 13 ވަނަ މިނެޓުގައި އެލާނާ ވަނީ އޮސްޓްރޭލިއާގެ ހަތަރުވަނަ ލަނޑު ޖަހައިދީފައެވެ.

މި މޮޅާއެކު އޮސްޓްރޭލިއާއިން މުބާރާތުގައި ކުޅުނު ދެ މެޗުން ވެސް މޮޅުވެ ހަ ޕޮއިންޓު ހޯދާފައިވާއިރު އެ ޤައުމު ހިމެނޭ ގްރޫޕް އޭ ގައި ލިބެނީ ދެވަނައެވެ. އެ ގުރޫޕުގެ އެއްވަނަ ލިބެނީ ހަ ޕޮއިންޓާއި ފައިދާ ގޯލުން ކުރިލިބޭ ސައުތު ކޮރެއާ އަށެވެ.

ފުލުގައި އީރާން އޮތީ ޕޮއިންޓެއް ނުލިބި، ގެއްލުން ހަތް ގޯލާއެކުއެވެ. ތިންވަނައިގައި ފިލިޕީންސް އޮތީ ގެއްލުން ހަތަރު ލަނޑާއެކުއެވެ.