ކުރިކެޓް ބޯޑް އޮފް މޯލްޑިވްސް (ސީބީއެމް)އިން އިންތިޒާމުކޮށްގެން ކުރިއަށްދާ މައިލޯ ރަމަޟާން ކުރިކެޓު ކާނިވަލުގެ ދެވަނަ މުބާރާތް ކަމަށްވާ އޮފީސް ޓޭޕްބޯލް މުބާރާތުގެ ކުޅުނު ފުރަތަމަ މެޗުތަކުން ދިވެހި ސިފައިންގެ ކުލަބާއި، ޕޮލިސް ކުލަބު މޮޅުވެއްޖެއެވެ. މިއަހަރު އޮފީސް މުބާރާތުގައި ހަ ޓީމެއް ދެ ގުރޫޕެއްގައި ވާދަކުރާނެއެވެ.
މާފަންނު ކުޅިވަރު އެކުވެނީގެ އެއް ނަންބަރު ކުރިކެޓް ދަނޑުގައި ކުޅުނު ފުރަތަމަ މެޗު ޕޮލިސް ކުލަބުން ކާމިޔާބުކުރީ ކަސްޓަމްސް ރެކްރިއޭޝަން ކުލަބާ ވާދަކޮށް 10 ވިކެޓުން މެޗު ކާމިޔާބުކޮއްގެންނެވެ.
ގުރުދިމާވުމުން ކަސްޓަމްސް ޓީމުން ކުޅެންއަރާ 8 އޯވަރުގެ ތެރޭގައި އެއްވެސް ކުޅުންތެރިއަކު ނުބައިނުވެ ވަނީ 80 ލަނޑު ހަދާފައެވެ. ކަސްޓަމްސްއ ޓީމުން އެންމެ ރަނގަޅަށް ކުޅީ 16 ބޯޅައިން 33 ލަނޑު ހެދި ހައިކަލްއެވެ.
\
ޖަވާބުގައި ޕޮލިސް ޓީމުން ކުޅުންއަރާ މެޗު ކާމިޔާބު ކުރީ 4.2 އޯވަރުގެ ތެރޭގައި ކުޅުންތެރިއަކު ނުބައިނުވެ 81 ހަދައިގެންނެވެ. އެޓީމުން އެންމެ ރަނގަޅަށް ކުޅުނީ 14 ބޯޅައިން 31 ލަނޑު ހެދި އޮލިއުލް އިސްލާމެވެ.
މުބާރާތުގައި އިއްޔެ ކުޅުނު ދެވަނަ މެޗު ސިފައިންގެ ޓީމުން ކާމިޔާބުކުރީ ކުޅިވަރު ވުޒާރާއާ ވާދަކޮށް 19 ލަނޑުންނެވެ. ގުރުދިމާވުމުން ސިފައިންގެ ޓީމުން ކުޅެންއަރާ 8 އޯވަރުގެތެރޭގައި 2 ކުޅުންތެރިން ނުބައިވެގެން ވަނީ 141 ލަނޑު ހަދާފައެވެ. އެޓީމުން އެންމެ ރަނގަޅަށް ކުޅުނީ 9 ބޯޅައިން 33 ލަނޑު ހެދި އަބްދުﷲ ޝާހިދެވެ.
ޖަވާބުގައި ކުޅިވަރު ވުޒާރާއިން ކުޅެންއަރާ 8 އޯވަރުގެ ތެރޭގައި ކުޅުންތެރިއަކު ނުބައިނުވެ ހެދުނީ 122 ލަނޑެވެ. އެޓީމުން އެންމެ ރަނގަޅަށް ކުޅުނީ 14 ބޯޅައިން 34 ލަނޑު ހެދި ސައިފުލް އިސްލާމްއެވެ.
މުބާރާތުގެ ކުޅުން ކުރިއަށްދާނީ މިމަހުގެ 8 ވަނަ ދުވަހުގެ ނިޔަލަށެވެ.