ފަހު 10ގައި، ޢާއްމުންނާއި ވިޔަފާރިތަކަށް އިޤްތިޞާދީ ވުޒާރާގެ ޚިދުމަތް

ރަމަޟާންމަހުގެ ފަހުގެ ދިހައިގެ ދުވަސްތަކުގައިވެސް އާންމުންނާ ވިޔަފާރިތަކަށް ދެމުންގެންދާ ޚިދުމަތް މެދުނުކެނޑި ލިބޭނެކަމަށް އިޤްތިސާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވެއްޖެއެވެ.

ރަމަޟާންމަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކަށް ވީނަމަވެސް އިޤްތިސާދީ ތަރައްޤީއާ ވިޔަފާރިއާބެހޭ ވުޒާރާއިން އާންމުންނާ ވިޔަފާރިތަކަށް ދެމުންގެންދާ ޚިދުމަތް މެދުނުކެނޑި ލިބޭނެގޮތަށް ހަމަޖއްސަވާކަން އެ ވުޒާރާއިން ވަނީ އިއުލާނުކުރައްވާފައެވެ.

އެގޮތުން، ވިޔަފާރިއާބެހޭ ޚިދުމަތްތަކަށް، ވަންގަވް އަދި ބިޒްނަސް ޕޯޓަލް މެދުވެރިކޮށް ހުށަހަޅާ އެޕްލިކޭޝަންތައް ޕްރޮސެސްކުރެވޭނީ ހުކުރު އަދި ހޮނިހިރު ފިޔަވައި ކޮންމެ ދުވަހެއްގެ ހެނދުނު 9:30އިން 11:30އަށް ކަމަށް އެ ވުޒާރާއިން ވިދާޅުވެއެވެ.

ނަމަވެސް އެ މުއްދަތުގެ ތެރޭގައި ޚިދުމަތަށް އެދެމުންދާ މިންވަރު އިތުރުވާނަމަ، ޕްރޮސެސިން ގަޑިތަކަށް ބަދަލު އަންނާނެކަމަށް އެ ވުޒާރާއިން ވިދާޅުވެއެވެ. އަދި އެ ވުޒާރާގެ ވިޔަފާރިއާބެހޭ ޚިދުމަތްތަކަށް އެދެވޭނީ ވަންގަވް ނުވަތަ ބިޒްނަސް ޕޯޓަލް މެދުވެރިކޮށްކަން އެ ވުޒާރާއިން ވިދާޅުވެއެވެ.

މީގެއިތުރުން، ފޮރިން އިންވެސްޓްމަންޓް އެޕްލިކޭޝަން ފޯމު ހުށަހެޅުއްވުމަށް އީމެއިލް ކުރެއްވުމަށާއި، ފޮރިން އިންވެސްޓްމަންޓާ ބެހޭ މަޢުލޫމާތު ހޯދުމަށް ނުވަތަ ހުށަހަޅާފައިވާ އެޕްލިކޭޝަނަކާއި ބެހޭގޮތުން މަޢުލޫމާތު ހޯދުމަށް ހުކުރު އަދި ހޮނިހިރު ފިޔަވައި ކޮންމެ ދުވަހެއްގެ ހެނދުނު 9:30އިން 11:30އަށް 3333181 ނުވަތަ 3333182އަށް ގުޅުއްވުމަށް އެ ވުޒާރާއިންވަނީ އެދިފައެވެ.