ފަހު 10ގައި ބީއެމްއެލް ހުޅުވާނީ 2 ދުވަހު، އޮންލައިންކޮށް ޚިދުމަތް ލިބޭނެ

ރަމަޟާންމަހުގެ ފަހު 10ގައި ބޭންކް އޮފް މޯލްޑިވްސް، ބީއެމްއެލްގެ ބްރާންޗްތަކުން ޚިދުމަތް ދޭނީ 2 ދުވަހު ކަމަށް އެ ބޭންކުން ވިދާޅުވެއްޖެއެވެ.

ބީއެމްއެލްއިން ކުރި އިއުލާނެއްގައި ބުނެފައިވަނީ ރަމަޟާންމަހުގެ ފަހު 10ގައި އެ ބޭންކުގެ ބްރާންޗުތައް ހުޅުވާފައި ހުންނާނީ މާރިޗު 11 އަދި 18 ވަނަ ދުވަހު ކަމަށެވެ. އަދި އެ 2 ދުވަހުގެ ހެނދުނު 9:30 އިން 12:30 އަށް ބްރާންޗު ހުޅުވައި ޚިދުމަތް ދޭނެ ކަމަށެވެ.

ބޭންކްގެ ބްރާންޗުތައް ބަންދުވި ނަމަވެސް ބޭންކުގެ ހުރިހައި ޚިދުމަތެއް އޮންލައިންކޮށް ލިބޭނެ ކަމަށް ބީއެމްއެލްއިން ވަނީ ބުނެފައެވެ. އަދި ޝައްވާލް މަހުގެ ފުރަތަމަ 7 ދުވަހުގެ މުއްދަތުގައި ބޭންކުގެ ބްރާންޗުތައް ހުޅުވާނީ 9:30 އިން 12:30 އަށް ކަމަށެވެ.

ރަމަޟާން މަހު ފަހު ދިހައެއް ބަންދުވުމާއި ގުޅިގެން އާންމުންނަށާއި، ބޭންކުތަކަށް ޚިދުމަތް ދިނުމަށް 2 ދުވަހަކު މޯލްޑިވްސް މަނިޓަރީ އޮތޯރިޓީ، އެމްއެމްއޭ ހުޅުވާނެ ކަމަށް އެ އިދާރާއިންވެސް ވަނީ މީގެކުރިން ބުނެފައެވެ.

އެމްއެމްއޭއިން ރަމަޟާން މަހުގެ ފަހު ދިހައެއްގައި ޚިދުމަތް ދިނުމަށް ހަމަޖެހިފައިވަނީ، މާރިޗު މަހު 11 ވަނަ ދުވަހާއި 18 ވަނަ ދުވަހު ހެނދުނު 9:00 އިން މެންދުރުފަހު 01:00 އަށް ކަމަށްވެސް އެ އިދާރާއިން ވިދާޅުވިއެވެ.

ރަމަޟާން މަހުގެ ފަހު ދިހައެއް ސަރުކާރު ބަންދު ނަމަވެސް، އެކިއެކި އިދާރާތަކުން ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، އެ އިދާރާތަކުން ކަނޑައަޅުއްވާ ގޮތެއްގެ މަތިން ފޯރުކޮށްދިނުމުގެ އިންތިޒާމު ކޮންމެ އަހަރަކުވެސް ދަނީ ކުރައްވަމުންނެވެ.