ކުދި ވިޔަފާރިތަކަށް އަންނަ ހަފުތާގައި އެކަނިވެސް 200 މިލިޔަން ރުފިޔާ ދޫކުރާނެ: ރައީސް

ސަރުކާރުން ފައިސާ ދޭންޖެހޭ އަމިއްލަ ކުދި ވިޔަފާރި ކުންފުނިތަކުގެ ތެރެއިން 1 މިލިޔަން ރުފިޔާއަށްވުރެ މަދުން ފައިސާ ދޭންހުރި ކުންފުނިތަކަށް އަންނަ ހަފުތާގައި އެކަނިވެސް 200 މިލިޔަން ރުފިޔާ ސަރުކާރުން ދައްކާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ކުދި ވިޔަފާރިތަކަށް 15 ދުވަހުގެ ތެރޭގައި ޕޭމަންޓުތައް ހެދުމަކީ އަމާޒެއް ކަމަށް ސަރުކާރުން ވަނީ މީގެކުރިން ވިދާޅުވެފައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، ރާއްޖޭގެ އިޤްތިޞާދީ ހާލަތު އޮތީ ރަނގަޅަށްކަމަށެވެ. ރާއްޖޭގެ އިޤްތިޞާދީ ހާލަތު މެނޭޖްކުރަމުންދަނީ ރާއްޖެއިން ބޭރަށް ދައްކަން ހުރި ދަރަނި ދެއްކޭގޮތައްކަމަށެވެ. ދަރަނި ދެއްކުމުގައި އެއްވެސް ދަތިކަމެއް ނެތްކަމަށާއި ދަރަނި ދައްކަމުންވެސް ސަރުކާރުން އެކިއެކި ފަރާތްތަކަށް ދޭންޖެހޭ ފައިސާވެސް ދެމުންދާކަމަށެވެ.

ރައީސް ވިދާޅުވީ، ކުދި ވިޔަފާރިތަކަށް ސަރުކާރުން ދޭންހުރި ފައިސާގެ ކޮންމެވެސް މިންވަރެއް ކޮންމެ ހަފުތާއެއްގައި ދެމުންދާކަމަށެވެ. އެގޮތުން ކުރިއަށްއޮތް ހަފުތާގެ ތެރޭގައިވެސް ކުދި ވިޔަފާރިތަކަށް 200 މިލިޔަން ރުފިޔާ ދޭނެކަމަށެވެ.

"ކުރިއަށްއޮތް ހަފުތާއަކީވެސް މިގޮތުން ކުދި ވިޔަފާރިތަކަށް ރާއްޖޭގައި މަސައްކަތްކުރާ ކުދި ވިޔަފާރިތަކުން ނުވަތަ ކުންފުނިތަކުން ސަރުކާރުން ކޮށްފައި ހުރި މަސައްކަތްތަކަށް ދޭންހުރި ފައިސާގެ މަދުވެގެން 200 މިލިޔަން ރުފިޔާ ދޭނެ ހަފުތާއެއް. ކޮންމެ ހަފްތާއަކުވެސް ކޮންމެވެސް އަދަދެއް އެބަދެން. އަޅުގަނޑުމެން އިސްކަން މިދެނީ ކުދި އެމައުންޓްސްތަކުން ޕޭކުރަންހުރި ވެންޑާސްތަކަށް. މިއަންނަ ހަފުތާގައި އަޅުގަނޑުމެން ދޭނީ 1 މިލިޔަން ރުފިޔާއަށްވުރެ މަދުން ފައިސާ ދޭންހުރި ބިލްތަކަށް." ރައީސް ވިދާޅުވިއެވެ.

ކުދި އަދި މެދު ފަންތީގެ ވިޔަފާރިތައް މާލީ ގޮތުން ކުރިއެރުވުމަށް މިދިޔަ އަހަރުގެ ތެރޭގައިވެސް އެ ފަރާތްތަކަށް ފައިސާ ދޫކުރުމަށް ގިނަގުނަ މަސައްކަތްތަކެއް ސަރުކާރުން ވަނީ ކޮށްފައެވެ. އެގޮތުން ސަރުކާރުން ރާއްޖޭގެ ވިޔަފާރިތަކުގެ ބިލުތަކަށް މިދިޔަ އަހަރު 6.3 ބިލިޔަނަށްވުރެ ގިނަ ރުފިޔާ ދައްކާފައިވެއެވެ.

ސަރުކާރުން ކުރައްވަމުން ގެންދަވާ މަސައްކަތާއިއެކު ކުދި އަދި މެދު ފަންތީގެ ވިޔަފާރިތައް މާލީ ގޮތުން ބާރުވެރިކުރެވިގެންދާނެކަމަށް ސަރުކާރުން ވިދާޅުވެއެވެ. އަދި މީގެ ސަބަބުން މިއަހަރަކީ ކުދި އަދި މެދު ފަންތީގެ ވިޔަފާރިތަކުގެ އަހަރަށް ވެގެންދާނެ ކަމަށްވެސް ސަރުކާރުން ވަނީ ވިދާޅުވެފައެވެ.