ޖަޕާނުގައި ފެބުރުވަރީ 8ވަނަ ދުވަހު ބޭއްވި އެ ޤައުމުގެ ޤާނޫނު ހަދާ މަޖިލީހުގެ އިންތިޚާބުގައި ބޮޑުވަޒީރު ސަނައެ ތަކައިޗީގެ އިއްތިޙާދުން ބޮޑު ކާމިޔާބީއެއް ހޯދައިފިއެވެ. މިއީ، ޖަޕާނުގެ ބޮޑުވަޒީރު ކަމުގެ މަޤާމު ފުރުއްވާ ފުރަތަމަ އަންހެން ބޭފުޅާ، ތަކައިޗީއަށް ލިބިވަޑައިގެންނެވި މުހިންމު ކާމިޔާބީއެކެވެ.
އިންތިޚާބުގައި ތަކައިޗީގެ ލިބަރަލް ޑިމޮކްރެޓިކް ޕާޓީ (އެލްޑީޕީ)ން ވަނީ ޤާނޫނު ހަދާ މަޖިލީހުގެ ތިރިގޭގެ 465 ގޮނޑީގެ ތެރެއިން 316 ގޮނޑި ކާމިޔާބުކޮށްފައެވެ. އަދި، އެލްޑީޕީ އިއްތިޙާދުގެ ބައިވެރިޔާ، ޖަޕާނު އިނޮވޭޝަން ޕާޓީން ކާމިޔާބީ ހޯދާފައިވާ ދާއިރާތަކާ އެކު، ތަކައިޗީގެ އިއްތިޙާދުން ވަނީ 352 ދާއިރާގެ ކޮންޓުރޯލު ނަގާފައެވެ. މިއީ ޤާނޫނު ހަދާ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތެވެ. ޤާނޫނު ހަދާ މަޖިލީހުގެ މަތިގޭގެ ބާރު ނެތް ނަމަވެސް، ތިރިގެއިން ހޯދާފައިވާ ތާޢީދާ އެކު، ޤާނޫނުތައް ފާސް ކުރުމަށް ތަކައިޗީގެ އިއްތިޙާދަށް އޮތް ހުރަސްތައް ވަނީ ނެތިގެން ގޮސްފައެވެ.
ތަކައިޗީ ވަނީ އިޤްތިޞާދީ އަދި ސަލާމަތީ ސިޔާސަތުތަކަށް ބޮޑެތި އިސްލާޙުތަކެއް ގެންނެވުމަށް ވަޢުދުވެ ވަޑައިގަންނަވާފައެވެ. އޭގެ ތެރޭގައި ކާބޯތަކެތިން ނަގާ %8ގެ ސޭލްސް ޓެކުސް ކަނޑައިލުން ހިމެނެއެވެ. ނަމަވެސް، އެ ފަދަ ފިޔަވަޅަކާ އެކު، މިހާރު ވެސް ދަރަނި ބޮޑު ޤައުމެއް ކަމުގައިވާ ޖަޕާނަށް މާލީ ދަތިތަކެއް ކުރިމަތިވާނެ ކަމަކީ ވުނޭރުންގެ މެދުގައި އޮތް ކަންބޮޑުވުމެކެވެ. ތަކައިޗީ ވިދާޅުވީ ޓެކުސް ކުޑަކުރުމުގެ މަސައްކަތް ފެށްޓެވުމަށް އިސްކަން ދެއްވާނެ ކަމަށާއި، އެ ސިޔާސަތު ތަންފީޒު ކުރެއްވުމުގައި އެ ޤައުމުގެ މާލީ ހާލަތަށް ރިއާޔަތް ކުރައްވާނެ ކަމުގައެވެ.
މީގެ އިތުރުން، ދިފާޢީ ދާއިރާގެ ބަޖެޓު އިތުރުކޮށް، އަސްކަރިއްޔާގެ ޤާބިލުކަން އިތުރު ކުރުމަށް ވެސް ތަކައިޗީ ވަނީ ވަޢުދުވެ ވަޑައިގަންނަވާފައެވެ. އަދި، ތައިވާނާ މެދު ތަކައިޗީގެ ސަރުކާރުން ގެންގުޅޭ އައު ސިޔާސަތާ ގުޅިގެން، ޖަޕާނާއި ޗައިނާއާ ދެމެދު އޮތް ގުޅުންތައް ވަނީ ހީނަރުވެފައެވެ. މަސްރަޙް ދިރާސާ ކުރާ ފަރާތްތަކުން ބުނީ، އިންތިޚާބުގައި ތަކައިޗީއަށް ލިބިވަޑައިގެންނެވި ކާމިޔާބީގެ އަސްލަކީ، ޒުވާނުންގެ މެދުގައި އޭނާއަށް އޮތް ތާޢީދާއި މަޤުބޫލުކަން ކަމުގައެވެ.