އެމެރިކާއިން އަޅާފައިވާ ހަރުކަށި ދަތިކުރުމުގެ ފިޔަވަޅުތަކާ އެކު، ކިއުބާގައި ކާބޯތަކެއްޗާއި، ތެލާއި ގިނަ އަސާސީ ޚިދުމަތްތައް ނުލިބި، އާންމު ރައްޔިތުން ގިނަ ގޮންޖެހުންތަކާއި ނިކަމެތި ތަޙައްމަލުކުރަމުންދާ ކަމަށް ރިޕޯޓުތައް ބުނެފިއެވެ.
ރޮއިޓަރސް ނޫހާ ވާހަކަ ދެއްކި ގިނަ ޢަދަދެއްގެ އާންމު ރައްޔިތުން ބުނި ގޮތުގައި، ތެޔޮ ލިބުން ދަތިވުމުގެ ސަބަބުން، ގިނަ ސަރަޙައްދުތަކުން ދޭތެރެއަކުން ކަރަންޓުގެ ޚިދުމަތް ކެނޑެއެވެ. އަދި ކާބޯތަކެތީގެ އަގުތައް އަތް ނުފޯރާ ފަށަށް މަތިވެފައިވާކަމަށް އެ މީހުން ބުންޏެވެ.
އެމެރިކާ ސިފައިން ވެނެޒުއޭލާއަށް އަރައި، އެ ޤައުމުގެ ރައީސް ނިކޮލަސް މަދޫރޯ ހައްޔަރުކޮށްގެން ގެންދިޔުމާ ގުޅިގެން، ވެނެޒުއެލާއިން ވެސް މިހާރު ވަނީ ކިއުބާއަށް ތެޔޮ ފޯރުކޮށްދިނުން ހުއްޓާލައިފައެވެ.
ކިއުބާއަށް ތެޔޮ ފޯރުކޮށްދޭ ޤައުމުތަކަށް ޑިޔުޓީ ބޮޑުކުރާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރާ ގުޅިގެން، ވެނެޒުއެލާގެ އިތުރުން މެކްސިކޯއިން ވެސް މިހާރު ވަނީ ކިއުބާއަށް ތެޔޮ ސަޕްލައިކުރުން މެދުކަނޑާލައިފައެވެ.
ދަތިކުރުމުގެ ހަރުކަށި ފިޔަވަޅުތަކުގެ ތެރޭގައި، ކިއުބާގެ ޕޭސޯގެ އަގު ވަނީ ފާއިތުވި ތިން ހަފްތާގެ ތެރޭގައި އިތުރު 10 އިންސައްތައިން ދަށަށް ގޮސްފައެވެ. އެއާ އެކު ލިބޭ އާމްދަނީ އާ ނުބައްދަލު މިންވަރަށް ކާބޯތަކެތީގެ އަގުތައް ވަނީ އުފުލިފައެވެ.
ތެޔޮ ލިބުން ދަތިވުމުގެ ސަބަބުން، ޕަބްލިކް ޓްރާންސްޕޯޓާއި ޓެކްސީގެ ޚިދުމަތް ދިނުމަށް އުނދަގޫވެ، ދަތުރުފަތުރުގެ ނިޒާމަށް ވެސް ވަނީ ބުރޫއަރައިފައެވެ.
ކާބޯތަކެއްޗާއި އަސާސީ ޚިދުމަތްތައް ނުލިބި، ކިއުބާގެ ޙާލަތު، އިންސާނީ ކާރިޘާއަކަށް ބަދަލުވުމުގެ ނުރައްކާ ބޮޑުކަމަށް ބައިނަލްއަޤުވާމީ ބައެއް ޖަމްޢިއްޔާތަކުން ވަނީ ބުނެފައެވެ.
ކިއުބާގެ ސަރުކާރާ ދެކޮޅަށް އާންމުންގެ އެތައް ހާސް ބަޔަކު ނުކުމެ 2021 ވަނަ އަހަރު ކުރި މުޒާހަރާ ފުލުހުން ވަނީ ބާރުގެ ބޭނުންކޮށްގެން ހުއްޓުވައިފައެވެ. އެ ހަމަނުޖެހުންތަކުގައި އެކަކު މަރުވެ، އެތައް ބަޔަކު ޒަޚަމްވިއެވެ. އެ މުޒާހަރާތަކާ ގުޅިގެން 700 އަށް ވުރެ ގިނަ މީހުން ހައްޔަރުކޮށް، ޖަލަށްވެސް ލާފައިވެއެވެ.
އޭގެފަހުން، ސަރުކާރާ ދެކޮޅަށް ޙަރަކާތްތައް ހިންގުން ކިއުބާގެ ސަރުކާރުން ވަނީ ހިފަހައްޓައިފައެވެ. އެހެންކަމުން، އާންމު ދިރިއުޅުމުގެ ޙާލަތު މި ދަރަޖައަށް ވެއްޓިފައިވީނަމަވެސް، އާންމުން މަގުތަކަށް ނުކުމެ އަދި އަޑުއުފާލަފައެއް ނުވެއެވެ.