"ދެކުނުގެ ވައިގެ ގުޅުމަކީ ދަތުރުފަތުރަށް ގެނުވި އިންގިލާބެއް"

ދެކުނުގެ 4 އަތޮޅު ވައިގެމަގުން ގުޅާލުމަށް ފެށި ދަތުރުތަކަކީ މުޅި ދިވެހިރާއްޖޭގެ ދަތުރުފަތުރުގެ ނިޒާމު ބަދަލުކޮށްލާނެ އިންގިލާބެއް ގެންނާނެ ކަމަކަށް ވެގެންދާނެކަމަށް އިމާރާތްކުރުމާއި ގެދޮރުވެރިކަމާއި ބިނާރާއި ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވެއްޖެއެވެ. ވަޒީރު މިހެން ވިދާޅުވީ، ދެކުނުގެ 4 އަތޮޅު ވައިގެމަގުން ގުޅާލުމަށް ގދ. ކާޑެއްދޫއަށް ބޭއްވި ދަތުރު އިފްތިތާހުކުރުމަށް ބޭއްވި ހަފްލާގައި ވާހަކަދައްކަވަމުންނެވެ.

އިމާރާތްކުރުމާއި ގެދޮރުވެރިކަމާއި ބިނާރާއި ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވީ، ދެކުނުގެ 4 އަތޮޅު ގުޅުވައިލެވިގެން މިދިޔައީ ރައީސުލްޖުމްހޫރިއްޔާ މިފަދަ ކަމެއް ކުރެއްވުމުގެ ބޭނުން ވަރަށް ބޮޑަށް ހުންނެވުމާއިއެކު އެގޮތައް ވިސްނުން ގެންގުޅުމުންކަމަށެވެ. ދިވެހިރާއްޖެއަކީ ވޮލިއުމް ބޭސްޑް ޓްރާންސްޕޮޓޭޝަން އޮތް ތަނެއް ނޫންކަން ފާހަގަކުރައްވައި ވަޒީރު ވިދާޅުވީ، ދިވެހިރާއްޖެއަކީ ފްރިކުއެންސީ ބޭސްޑް ޓްރާންސްޕޮޓޭޝަންއެއް ބޭނުންވާ ގައުމެއްކަމަށެވެ. ރާއްޖެއަށް ބޭނުންވަނީ ބޮޑެތި ބޯޓުފަހަރު ނޫންކަމަށެވެ. ރާއްޖެއަށް ބޭނުންވަނީ ގިނަ އަދަދަކަށް ޕްލައިޓް އެޅޭނެ މަގެއްކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، މި ފެށިގެން ދިޔައީ ދެކުނުގެ 4 އަތޮޅު ވައިގެ މަގުން ގުޅުވާލުމުގެ ޕައިލެޓް ޕްރޮޖެކްޓެއްކަމަށެވެ. މި ޕްރޮޖެކްޓް ކާމިޔާބު ވެއްޖެނަމަ މިކަން ވެގެންދާނީ މުޅި ދިވެހިރާއްޖޭގެ ދަތުރުފަތުރުގެ ނިޒާމު ބަދަލުކޮށްލާނެ އިންގިލާބެއް ގެންނާނެ ކަމަކަށްކަމަށް ވަޒީރު ވިދާޅުވިއެވެ.

"ދެކުނުގެ 4 އަތޮޅު ޕައިލެޓް ޕްރޮޖެކްޓެއްގެ ގޮތުގައި ފެށިގެން މިދަނީ. މި ކާމިޔާބު ވެއްޖެނަމަ މިއީ މުޅި ދިވެހިރާއްޖޭގެ ދަތުރުފަތުރުގެ ނިޒާމު ބަދަލުކޮށްލާނެ އިންގިލާބެއް ގެންނާނެ ކަމަކަށް ވެގެންދާނެ. މި ސައިޒްގެ ފްލައިޓެއް ޖެއްސުމަށް ބޭނުންވާ ރަންވޭއަކީ ވަރަށް ކުޑަ ރަންވޭއެއް. އެއަށް ބޭނުންވާ އިންފްރާސްޓްރަކްޗަރ ގާއިމްކުރުމަށް ބޭނުންވާ ފައިސާއަކީ މިހާރު ކުރާ އިންވެސްޓްމަންޓްތަކަށް ބަލާއިރު ކުޑަ އަދަދެއް. މިހާރު އެއަރޕޯޓެއް އަޅަން އަޅުގަނޑުމެން ހަރަދުކުރަން 600 މިލިޔަނަށްވުރެ ގިނައިން. އެންމެ އެއަރޕޯޓެއް ތަރައްޤީކުރުމަށްޓަކައި. ބައެއް އެއަރޕޯޓްތަކަށް އެއަށްވުރެވެސް ގިނައިން ބިން ހިއްކުމާއި މި ހުރިހައި ކަމަކާއި އެއްކޮށް". ވަޒީރު ވިދާޅުވިއެވެ.

މޯލްޑިވިއަނުން ވިދާޅުވީ، މި ދަތުރުތަކާއެކު މި ސަރަޙައްދުގެ ރަށްތަކުގައި ދިރިއުޅޭ ރައްޔިތުންނަށް ލުއިފަސޭހައެއް ލިބިގެންދާނެ ކަމަށެވެ. އަދި އަމިއްލަ ދަތުރުތަކާއި، ތަޢުލީމާއި އެނޫންވެސް ޒަރޫރީ ބޭނުންތަކަށް މި އަތޮޅުތަކުގެ މެދުގައި ކުރާ ދަތުރުތަކަށް ފަސޭހަވާނެ ކަމަށެވެ. މީގެ އިތުރުން ބޭސްފަރުވާއަށް ދަތުރުކުރާ ފަރާތްތަކަށް އައްޑޫ ގަން މެދުވެރިކޮށް ދަތުރު ކުރުމަށް މީގެ ސަބަބުން މަގުފަހިވެގެންދާނެ ކަމަށް މޯލްޑިވިއަނުން ވިދާޅުވިއެވެ.

މިދަތުރުތައް ފެށުމުން މި ސަރަޙައްދުގެ ރައްޔިތުންގެ އިތުރުން ފަތުރުވެރިކަމުގެ ސިނާޢަތަށްވެސް ކުރިއެރުން ލިބޭނެއެވެ. އެގޮތުން ގަމަށް އަންނަ ފަތުރުވެރިން މި ސަރަޙައްދުގެ އެހެން ރަށްތަކަށް ދަތުރު ކުރުމަށް އެއް ވިއުގާއެއްގެ ތެރެއިން މަގުފަހި ވެގެންދާނެއެވެ. މީގެ ސަބަބުން މި ސަރަޙައްދުގެ ރިސޯޓުތަކާއި، ގެސްޓް ހައުސްތަކާއި އަދި ފަތުރުވެރިކަމާއި ގުޅުންހުރި އެހެން ޚިދުމަތްތައް ފޯރުކޮށްދޭ ފަރާތްތަކަށް ފައިދާވާނެ ކަމަށްވެސް މޯލްޑިވިއަނުން ވިދާޅުވިއެވެ.