ވެސްޓް ހޭމްގެ މިޑްފީލްޑަރ ލޫކަސް ޕަކޭޓާ ފުލެމިންގޯއަށް

ވެސްޓް ހޭމް ޔުނައިޓެޑްގެ މިޑްފީލްޑަރ ލޫކަސް ޕަކޭޓާ 35.5 މިލިޔަން ޕައުންޑަށްވުރެ ބޮޑު އަގަކަށް އޭނާގެ ފުރަތަމަ ކުލަބު، ފުލެމިންގޯއަށް ބަދަލުވެއްޖެއެވެ.

28 އަހަރުގެ ޕަކޭޓާ ޒުވާން އުމުރުގައި ބްރެޒިލްގެ ކުލަބުތަކަށް ކުޅުމަށްފަހު ވެސްޓް ހޭމްއަށް ބަދަލުވީ 2022 ވަނަ އަހަރު ލިޔޯންއިންނެވެ. އޭގެ ފަހުން އޭނާ ވަނީ އެކުލަބަށް 139 މެޗު ކުޅެ 23 ގޯލް ޖަހާދީފައެވެ. އަދި 15 ގޯލު ޖަހަން އެސިސްޓު ކޮށްދީފައިވެއެވެ.

ޕަކޭޓާއަށް އެނބުރި ގައުމަށް ދިއުމަށްޓަކައި، ޓްރާންސްފަރ މުއްދަތު 2 ފެބުރުއަރީއަށް ހަމަވުމުގެ ކުރިން ކުލަބު ބަދަލުކުރުމުގެ ފުރުސަތު ދީފައިވަނީ މިދިޔަ ހަފްތާގައެވެ.

ބްރެޒިލްގެ ކުޅުންތެރިޔާއަށް ލަންޑަން ސްޓޭޑިއަމްގައި ލޯނު އެއްބަސްވުމުގެ ދަށުން މި ސީޒަން ނިމެންދެން ކުޅުމުގެ ފުރުސަތު ދިނުމަށް ވެސްޓްހޭމްއިން އޮތީ ނިންމާފައެވެ. އެހެންނަމަވެސް އޭނާ ފްލެމިންގޯއަށް ގެންގޮސް އެ ކުލަބުން ވަނީ ޑިސެންބަރު 2030 އާއި ހަމައަށް އޭނާ އެކުލަބުގައި މަޑުކުރާ ގޮތަށް އެއްބަސްވުން ހަދާފައެވެ.

ޕަކޭޓާއަށް އަދި ވެސްޓްހޭމްގެ އެއްބަސްވުމުގައި ބާކީ 18 މަސް ދުވަސް އެބައޮތެވެ. އޭނާވަނީ މި ސީޒަނުގައި ޕްރިމިއާ ލީގުގައި 18 މެޗު ކުޅެ ހަތަރު ގޯލު ކާމިޔާބުކޮށްދީފައެވެ.

ވޭސްޓް ހޭމްއިން ވަނީ 2023 ވަނަ އަހަރުން ފެށިގެން ޕަކޭޓާ އާއި ނުލާ 3 މެޗު ކާމިޔާބުކޮށްފައެވެ. އެހެންނަމަވެސް އެކްލަބުގެ ކޯޗު ނޫނޯ ބުނީ ޕަކޭޓާއަކީ ވޭސްޓް ހޭމަށް ވަރަށް މުހިންމު ކުޅުންތެރިއެއް ކަމަށެވެ.

"އަހަންނަށް ލޫކަސް އަކީ ވަރަށް ޚާއްސަ ކުޅުންތެރިއެއް. ޚާއްސަ މީހެއް. އޭނާއަކީ 10 ނަމްބަރު، އަހަންނަށް ހީވަނީ ހުރިހާކަމެއްވެސް ތަފާތުވާނެހެން. ހުރިހާ އެއްޗަކީވެސް ހާލަތު. އޭނާ ބޭނުންވީ ބްރެޒިލަށް ދާން އަދި ކުރިއަށްދާން. ޚާއްސަ ކުޅުންތެރިއެއްކަން އެނގިހުރެ އަހަރެމެން އޭނާއަށް އެދެނީ ކާމިޔާބީއަށް" ނޫނޯ ބުންޏެވެ.

ވޭސްޓްހޭމްއިން ބުދަ ދުވަހު ނެރެފައިވާ ބަޔާނެއްގައި ބުނެފައިވަނީ ޕަކޭޓާ އެނބުރި ގައުމަށްދާން ބޭނުންވަނީ އޭނާގެ އަމިއްލަ އަދި އާއިލީ ސަބަބުތަކާއި ހުރެ ކަމަށެވެ.