ގިރާވަރުފަޅުން ގޯތި ލިބުނު ފަރާތްތަކުގެ ޕްލޮޓް ކަނޑައެޅުމުގެ ގުރުއަތުލުން ފަށައިފި

ގިރާވަރުފަޅުން ގޯތި ލިބުނު ފަރާތްތަކުގެ ޕްލޮޓް ކަނޑައެޅުމުގެ ގުރުއަތުލުން ފަށައިފިއެވެ. ގުރުއަތުލުން ކުރިއަށް ދަނީ، ސޯޝަލް ސެންޓަރުގައެވެ.

ގުރުއަތުލުމުގެ ކަންކަން ކުރިއަށްދާނީ ހާޒިރީންގެ ކުރިމަތީގައި އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ މުވައްޒަފުންގެ ބެލުމުގެ ދަށުންނެވެ. އެ ވުޒާރާއިން ވިދާޅުވީ، ގުރުއަތުލާ ހޯލަށް ވަދެވޭނީ ބިން ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް އެއް ފަރާތަށް ކަމަށެވެ. އަދި ގޯތީގެ ވެރިފަރާތަށް ހާޒިރުނުވެވޭނަމަ، ބަދަލުގައި މީހަކު ފޮނުވޭނީ ވެރިފަރާތުގެ އިއުތިރާޒެއް ނެތްކަމުގެ ލިޔުމަކާއި އައިޑީ ކާޑުގެ ކޮޕީއަކާ އެކުގައި ކަމަށެވެ.

ގުރުއަތުލުން ކުރިއަށްދާއިރު، ކޮންމެ ފަރާތަކަށްވެސް ލިބޭ ޕްލޮޓްގެ މަޢުލޫމާތު 'ހިޔާވެހި ޕޯޓަލް' މެދުވެރިކޮށް ވަގުތުން ފެންނަން ހުންނާނެއެވެ. އަދި އެ ފަރާތަކަށް ލިބޭ ޕްލޮޓް ނަންބަރު އެސް.އެމް.އެސްގެ ޒަރިއްޔާއިންވެސް އަންގަމުންދާނެއެވެ. މި ގުރުއަތުލުން ޕަބްލިކް ސަރވިސް މީޑިއާ (ޕީ.އެސް.އެމް) ގެ ޔެސް ޓީވީ އިންނާއި މިނިސްޓްރީގެ ސޯޝަލް މީޑިއާ ޕޭޖްތަކުން ދަނީ، ވަގުތުން ދުރަށް ދައްކަމުންނެވެ.

އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ވިދާޅުވީ، ގުރުއަތުލުން ނިމުމުން ގޯތި ހަވާލުކުރުމާއި، އެއްބަސްވުމުގައި ސޮއިކުރުމާއި ރަޖިސްޓަރީގެ މަސައްކަތް ކުރިއަށްދާނެ ގޮތް ފަހުގެ ތާރީޚެއްގައި އިޢުލާން ކުރާނެ ކަމަށެވެ. މިއީ ގިރާވަރުފަޅުން ގޯތި ލިބުނު ފަރާތްތަކަށް ބިން ކަނޑައެޅުމުގެ މުހިންމު މަރުހަލާއެކެވެ.

ގިރާވަރުފަޅުގެ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން، ގޯތި ލިބޭ ފަރާތްތަކުގެ މެދުގައި އަލުން ގުރުއަތުލުން ބޭއްވުމަށް ކަނޑައެޅުމުން އަލަށް އެކުލަވާލި ޕްލޭންގައި ޖުމްލަ 4072 ގޯތި ހިމަނާފައިވެއެވެ. މީގެ ތެރޭގައި ކުރިން މަދުވި 610 ގޯތިވެސް މިހާރު ވަނީ ހިމަނާފައެވެ. މީގެ އިތުރުން ގިރާވަރުފަޅު ހިއްކުމުގެ މަޝްރޫޢަށް އިތުރު 113 ހެކްޓަރު އިތުރުކުރުމަށް ނިންމައި، ބިން ހިއްކުމުގެ މަސައްކަތް ސަރުކާރުން މިހާރު ވަނީ ފައްޓަވާފައެވެ.