10 އަހަރު ފަހުން ޔޫވީ ރެލިގޭޓްވެއްޖެ

ދިރާގު ދިވެހި ޕްރިމިއަރ ލީގުގައި ކުލަބް ވެލެންސިއާ ދެކޮޅަށް ކުޅުނު މެޗު އެއްވަރުވުމުން ޔުނައިޓެޑް ވިކްޓަރީ (ޔޫވީ) ދެވަނަ ޑިވިޝަނަށް ރެލިގޭޓް ވެއްޖެއެވެ.

މި ދެޓީމު ވާދަކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ. މީގެ 10 އަހަރު ކުރިން ފުރަތަމަ ޑިވިޝަންގަ ވާދަކުރި ޔޫވީ 10 އަހަރު ތެރޭގައި ލީގުގައި ވަނީ އެވްރެޖް ކުޅުމެއް ދައްކާފައެވެ.

ލީގުގެ ފޯމެޓް ރޭވިފައި އޮތްގޮތުން، 10 ޓީމު ވާދަކުރާ މި ފަހަރުގެ މުބާރާތުގެ ދެ ބުރުގެ ކުޅުން ނިމޭއިރު ފުލަށް ދާ ދެ ޓީމެއް އޮޓޮމެޓިކުން ރެލިގޭޓްވާނެ އެވެ. އަދި، ހަތް ވަނަ އަށް ދާ ޓީމާއި އަށް ވަނައިގައި ނިންމާ ޓީމުން ރެލިގޭޝަން ޕްލޭއޮފްގައި ކުޅެން ޖެހޭނެ އެވެ.

މި ނަތީޖާ އެކު ޔޫވީ ރެލިގޭޓްވީ ކުޅުނު 17 މެޗުން ހޯދި 8 ޕޮއިންޓާއެކުއެވެ. މި މެޗުން މޮޅު ނުވެވުމާ އެކު ވެލެންސިއާގެ ވެސް އަމިއްލަ ބާރުގައި ޕްލޭއޮފް ކޮލިފިކޭޝަން ގެއްލުނު އިރު ވެލެންސިއާ ތާވަލުގެ 9 ވަނައިގަ އޮތީ 17 މެޗުން ހޯދި 9 ޕޮއިންޓާއެކުއެވެ.

ލީގުގެ ރެލިޣޭޝަނުން ސަލާމަތްވުމަށް މިވަގުތު މަސައްކަތް ކުރަމުންދާ ދެޓީމަކީ ކުލަބު ގްރީން ސްޓްރީޓްސް އާއި ވެލެންސިއާ އެވެ. ވެލެންސިއާ ފަހު މެޗުގައި ނުކުންނާނީ ކުލަބު އީގަލްސްއާ ދެކޮޅަށެވެ. ގްރީން ނުކުންނާނީ ނިއުއާ ދެކޮޅަށެވެ.

ރަސްމީ ބޯޅަދަނޑުގައި ކުޅުނު މެޗުގައި ފުރަތަމަ ހާފުގައި ލަނޑުޖަހަން ދެ ޓީމަށް ވެސް ފުރުސަތު ތަނަވަސް ވެގެންދިޔައެވެ. އެގޮތުން މެޗުގެ 10 ވަނަ މިނިޓުގައި ވެލެންސިއާގެ ފްރާންސް ފޯވާޑް ސްޓެފަން ބްލެންކަށް ވަނީ ރަނގަޅު ފުރުސަތެއް ލިބިފައެވެ.

މެޗުގެ 24 ވަނަ މިނިޓުގެ ވެލެންސިއާގެ ކެޕްޓަން އީތަން އިބްރާހިމް ޒަކީ ފޮނުވާލި ބޯޅަ ކީޕަރު ދިފާއު ކުރިއިރު 31 ވަނަ މިނިޓުގައި އީތަން ފޮނުވާލި ހަމަލާއެއް ދިއައީ ދަނޑިމަތިންނެވެ. ފުރަތަމަ ހާފުގެ އިތުރު ވަގުތުގެ ތެރޭގައި ޔޫވީގެ ހުސެއިން ޝުހާދު އަށް ވަނީ ލަނޑުޖަހަން ރަނގަޅު ފުރުސަތެއް ލިބިފައެވެ.

މެޗުގެ 67 ވަނަ މިނިޓުގައި އިބްރާހިމް ޒިޔާން އޭރިއާ ބޭރުން ފޮނުވާލި ބޯޅައެއް ދަނޑިމަތިން ދިޔައިރު 71 ވަނަ މިނިޓުގައި ވެލެންސިއާގެ އީތަން އަށް ވަނީ ލަނޑު ޖަހަން ރަނގަޅު ފުރުސަތެއް ލިބިފައެވެ. މެޗުގެ އިތުރު ވަގުތުގައި ވެލެންސިއާގެ މިސްރު ޑިފެންޑަރ އަބްދުލްލާތީ ބަސަލް ފަހަތުން ޔޫވީ ކުޅުންތެރިއެއް ޖާޒީގަ ހިފެހެއްޓުމުން ލާސްޓް މޭން ފައުލް ކުރިކަމަށް ބަލައި ރެފްރީ ވަނީ ބަސަލް އަށް ރަތްކާޑު ދައްކާފައެވެ.

މި ނަތީޖާ އެކު ޔޫވީ ރެލިގޭޓް ވިއިރު އެޓީމުން ފުރަތަމަ ޑިވިޝަންގަ ވާދަކުރަން ފެށީ 2016 ވަނަ އަހަރުންފެށިގެންނެވެ.