އިގްތިސާދީ ވާދަވެރިކަމަށް ބިޔަ އިންވެސްޓްމަންޓްތައް މުހިއްމު

އިގްތިސާދީ ވާދަވެރިކަމުގެ އޮއިވަރުގައި ފައިތިލަ ސާބިތުކުރުމަށް "އައިލާ ސަސްޓެއިނަބަލް ޓައުންޝިޕް" މަޝްރޫޢު ފަދަ މަޝްރޫޢުތައް މުހިންމުކަމަށް ވިޔަފާރިއާއި އިގްތިސާދީ ތަރައްގީއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ނ. އަތޮޅުގައި ތަރައްޤީކުރާ 'އައިލާ ސަސްޓެއިނަބަލް ޓައުންޝިޕް' މަޝްރޫޢުގެ އަމަލީ މަސައްކަތް ފެށުމާ ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ.

ވިޔަފާރި އާއި އިގްތިސާދީ ތަރައްގީއާބެހޭ ވަޒީރު މުޙައްމަދު ސަޢީދު ވިދާޅުވީ ރާއްޖޭގެ އިގްތިސާދުގެ ހުރިހާ ހަރަކާތެއްވެސް ފެތުރިފައިވަނީ ފަތުރުވެރިކަމުގެ ސިނާޢަތުގެ ވަށައިގެން ކަމަށެވެ. ފާއިތުވި އަހަރުތަކުގައި އެ ސިނާޢަތަށްވެސް ބަދަލުތައް އައިސްފައިވާއިރު ރާއްޖެއަށް އާމްދަނީ ހޯދޭނެ އިތުރު، ގިނަ ގޮތްތައް ހޯދުން މުހިންމު ކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ ނ. އަތޮޅުގައި ފަށާފައިވާ އައިލާ ސަސްޓެއިނަބަލް ޓައުންޝިޕް މަޝްރޫއުގެ ސަބަބުން ރާއްޖެއަށް އެކި ގޮތްގޮތުން ފައިދާވެގެންދާނެ ކަމަށެވެ. އެގޮތުން، މި އިންވެސްޓްމަންޓަކީ 800 މިލިޔަން ޑޮލަރަށްވުރެ ބޮޑު އިންވެސްޓްމަންޓަކަށްވާއިރު މި މަޝްރޫއުގެ ދަށުން ތަރައްގީ ކުރާ ޓައުންޝިޕްގައި ދުނިޔެ ޤަބޫލުކުރާ ޒަމާނީ ފެންވަރުގެ ސިއްޙީ ޚިދުމަތްދެވޭނެ ތަނެއް ތަރައްގީކުރަންޖެހޭކަމަށާއި މީގެ ސަބަބުން ހެލްތު ޓޫރިޒަމް ރާއްޖޭގައި ފުޅާ ކުރުމަށްވެސް ފުރުސަތު ފަހިވެގެންދާނެ ކަމަށް ވިދާޅުވިއެވެ.

މީގެ އިތުރުން މި މަޝްރޫއުގެ ދަށުން ތަރައްގީ ކުރާ ޓައުންޝިޕްގައި ދިވެހި ޒުވާނުންނާއި ރާއްޖެއަށް ޒިޔާރަތް ކުރާ ފަރާތްތައް ތަމްރީން ކުރެވޭނެ ބައިނަލްއަގުވާމީ ފެންވަރުގެ ފެސިލިޓީއެއް ގާއިމުކުރަންޖެހޭ ކަމަށާއި ޓައުންޝިޕް ހިންގަން ޖެހޭނީ %60 އިއާދަކުރަނިވި ހަކަތައިން ކަމަށްވެސް ވަޒީރު ވިދާޅުވިއެވެ. އަދި ރާއްޖެއަށް އެތެރެކުރާ ކާނާގެ ބާވަތެއް ރާއްޖޭގައި އުފައްދައި ބާޒާރަށް ނެރެވޭނެ ފެސިލިޓީއެއް ގާއިމުކުރެވޭނެ ކަމަށާއި ދުނިޔޭގެ ވާދަވެރި މާކެޓުގައި ފައިތިލަ ސާބިތުކުރުމަށް މިފަދަ މަޝްރޫޢުތައް ރާއްޖެއަށް މުހިންމު ކަމަށް ވިދާޅުވިއެވެ.

"މިފަދަ ޕްރޮޑަކްޓެއް މުހިންމުވާ ސަބަބަކީ ބަދަލުވަމުން މިއަންނަ އަދި ވާދަވެރިކަމުގެ އޮއިވަރުގައި ސަރަހައްދާއި އަދި ސަރަހައްދުން ބޭރުގައި އުފެދެމުން މިއަންނަ ކޮމްޕެޓިޝަންގައި ދިވެހިރާއްޖެ ފައިތިލަ ސާބިތުކުރަންޖެހޭ. އަދި އެކަން ކުރުމަށްޓަކައި ރާއްޖޭގެ ރީތިކަމުގެ ފުރިހަަމަ ބޭނުން ހިފަންޖެހޭ،" އިގްތިސާދީ ތަރައްގީއާބެހޭ ވަޒީރު މުޙައްމަދު ސަޢީދު ވިދާޅުވިއެވެ.

ވަޒީރު ވިދާޅުވީ ސަރުކާރުގެ އަމާޒަކީ މިފަދަ އެކި ޓައުންޝިޕް މަޝްރޫޢުތައް ރާއްޖޭގެ އެކި ސަރަހައްދުތަކުގައި ކުރިއަށް ގެންދިއުންކަމަށެވެ.

"މިއީ ފުރަތަަމަ ސަސްޓެއިނަބަލް ޓައުންޝިޕް. 2028ގައި އިރާދަކުރެއްވިޔާ ހުޅުވޭ ގޮތަށް އެ މީހުން މަސައްކަތް ކުރިއަށްގެންދަނީ. ވަރަށް ބޮޑު ޕްރޮޖެކްޓެއް މިއީ. ރާއްޖޭގެ ތާރީޚުގައި ހިންގޭ އެންމެ ބޮޑު ޕްރޮޖެކްޓު މިއީ. މި ސަސްޓެއިނަބަލް ޓައުންޝިޕް ޕްރޮޖެކްޓް ގޮތަށް އަޅުގަނޑުމެން އިންތިޒާރު މިކުރަނީ، ބޭނުންވަނީ އެކި ސަރަހައްދުތަކުގައި ހަމަ މިފަދަ ސަސްޓެއިނަބަލް ޓައުންޝިޕްތައް ޑިވެލޮޕްވެގެންއައުން،" ވަޒީރު މުޙައްމަދު ސަޢީދު ވިދާޅުވިއެވެ.

އައިލާ ސަސްޓެއިނަބަލް ޓައުންޝިޕް މަޝްރޫއަކީ ރާއްޖޭގެ ސްޕެޝަލް އިކޮނިމިކް ޒޯން، އެސްއީޒެޑްގެ ދަށުން ހިންގާ ފުރަތަމަ ބޮޑު މަޝްރޫޢެވެ. ސަރުކާރުން މި މަޝްރޫޢުގެ ހުއްދަ ރަސްމީކޮށް ހަވާލުކުރީ މިދިޔަ އަހަރުގެ ޑިސެމްބަރު 11 ގައެވެ. މި މަޝްރޫޢު ކުރިއަށްގެންދިއުމަށް ހަމަޖެހިފައިވަނީ ނ. އަތޮޅުގެ ދިގުފަރު ފަޅާއި، ދެކުނުފަރު އަދި ކުރަމާދޫ ހިމެނޭ ސަރަހައްދުގައެވެ.