ވިކްޓަރީ ބަލިކޮށް ޓީސީން ފޯމު ދަމަހައްޓައިފި

ދިރާގު ދިވެހި ޕްރިމިއަރ ލީގުގައި ވިކްޓަރީ ސްޕޯޓްސް ކުލަބް ބަލިކޮށް ޓީސީ ސްޕޯޓްސް ކުލަބުން ދެވަނަ ބުރުން ފެށިގެން އެޓީމުގެ ރަނގަޅު ފޯމު ދަމަހައްޓައިފިއެވެ.

ލީގުގެ ރެލިގޭޝަން ޒޯނުން ސަލާމަތްވެ އަންނަ ސީޒަންގެ ދިވެހި ޕްރިމިއަރ ލީގުގެ ޕްލޭއޮފްއަށް ކޮލިފައިވެފަވާ ޓީސީން ވިކްޓަރީގެ މައްޗަށް ކުރި ހޯދީ 1-0 ލަނޑުންނެވެ.

މި ނަތިޖާ އެކު ޓީސީ ލީގުގަ ކުޅުނު 17 މެޗުން ވަނީ 18 ޕޮއިންޓް ހޯދާފައެވެ. އެޓީމު އޮތީ ލީގުގެ 7 ވަނައިގައެވެ. ރަސްމީ ބޯޅަދަނޑުގައި ކުޅުނު މެޗުގެ ފުރަތަމަ ހާފުގައި ދެޓީމަށް ވެސް ރަނގަޅު ކުޅުމެއް ދެއްކިފަ އެއް ނުވެއެވެ.

މެޗުގެ ދެވަނަ ހާފު ފަށައިގެން ދެޓީމުން ވެސް އެޓޭކުގަ ވަނީ ހަމަލާތައް އުފައްދާފައެވެ. އެގޮތުން ވިކްޓަރީގެ ހުސެއިން ނިޔާޒް އޭރިއާ ތެރެއަށް ވަދެ ފޮނުވާލި ބޯޅަ ގޯލާ ވަނީ އަމާޒު ނުވެފައެވެ.
ދެވަނަ ހާފުގައި ވިކްޓަރީގެ ސްލޮވާކިޔާ ފޯވާޑް މިލޯސް ލަޗްނޭ އަށް ލނޑު ޖަހަން ރަނގަޅު ފުރުސަތެއް ލިނުނު އިރު ޓީސީގެ ފޮވާޑް އިބްރާހިމް ޖިމޯއަށް ލިބުނު ފުރުސަތުގެ ބޭނުން ވަނީ ނުހިފިފައެވެ. އޭގެ ފަހުން މެޗުގެ 63 ވަނަ މިނީޓުގައި ޓީސީގެ އަހުނަފް މުހައްމަދު ތަސްނީމް ފޮނުވާލި ހަމަލާ ދިއައީ ދަނޑި މަތިންނެވެ.

ޓީސީ ލަނޑުޖެހީ މެޗުގެ 67 ވަނަ މިނިޓުގައި ބޮއަޑޫ ޕްރިންސް އޭރިއާ ތެރެއިން ބޯޅަ ހިފައިގެން ދަނިކޮށް ވިކްޓަރީގެ އަމްދާން އަލީ ކުރި ފައުލަކަށް ދިން ޕެނެލްޓީން ކާމިޔާބު ކުރި ލަނޑެކެވެ. މި ލަނޑު ޕްރިންސް ކާމިޔާބު ކުރީ 69 ވަނަ މިނިޓުގައެވެ.

މި ލަނޑަށް ފަހު ޓީސީޣެ ސްރީލަންކާ ޑިފެންޑަރ ޗަލަނަ ޗަމީރާ ފޮނުވާލި ހިލޭ ޖެހުމެއް ވަނީ ދަނޑިއަށް އަމާޒުވެފައެވެ.

މިއީ މި ލީގުގައި ވިކްޓަރީ ބަލިވި 8 ވަނަ މެޗެވެ.