އީރާނަށް ޙަމަލާއެއް ދިނުމުގައި ސަޢޫދީ ޢަރަބިއްޔާގެ ވައިގެ ސަރަޙައްދު ބޭނުން ކުރުމުގެ ފުރުޞަތު ރިޔާޟުން އެއްވެސް ފަރާތަކަށް ނުދޭނެ ކަމުގެ ޔަގީން ކަން ސަޢޫދީ ވަލީއަޙުދު މުޙައްމަދު ބިން ސަލްމާން އަރުވައިފިއެވެ. އޭނާ މި ކަން ހާމަ ކުރައްވާފައި ވަނީ އީރާނުގެ ރައީސް މަސްޢޫދު ޕީޒިޝްކިޔާނަށް ފޯނުން ގުޅުއްވައި ވާހަކަފުޅު ދައްކަވަމުންނެވެ. އަދި އީރާނަށް ޙަމަލާއެއް ދިނުމަށް އެމެރިކާއިން ތައްޔާރުވަމުންދާ ކަމުގެ އަޑުތައް ގަދަވެފައިވާ ދަނޑިވަޅެއްގައެވެ.
ފޯނުން ގުޅުއްވައި މުޙައްމަދާއި ޕީޒިޝްކިޔާން ވާހަކަފުޅު ދައްކަވާފައިވާ ކަން ހާމަކުރަމުން ސަޢޫދީ ޢަރަބިއްޔާގެ ދައުލަތުގެ މީޑިޔާ، ސަޢޫދީ ޕްރެސް އޭޖެންސީ (އެސްޕީއޭ)ން ބުނީ، ސަރަޙައްދީ ސުލްޙައާއި ހަމަޖެހުން ދެމެހެއްޓުމާ ގުޅޭ ގޮތުން ދެ ޤައުމުގެ ދެމެދުގައި މަޝްވަރާ ކުރުމަށް ތައްޔާރަށް ހުންނެވި ކަމުގައި ވަލީއަޙުދު ވިދާޅުވި ކަމުގައެވެ. އީރާނުގެ މީޑިޔާއިން ބުނީ، ހަނގުރާމައެއް ފެށުނަ ނުދިނުމަށް ބައިނަލްއަޤްވާމީ ޤާނޫނުތަކުގެ ތެރެއިން މަސައްކަތް ކުރުމަށް އެ ޤައުމުން ތައްޔާރަށް އޮތް ކަން ޕީޒިޝްކިޔާން ވެސް ހާމަކުރައްވާފައިވާ ކަމުގައެވެ.
އީރާނަށް ޙަމަލާއެއް ދިނުމުގައި ސަޢޫދީ ޢަރަބިއްޔާގެ ވައިގެ ސަރަޙައްދު ބޭނުން ކުރުމުގެ ފުރުޞަތު ނުދޭނެ ކަމުގައި ރިޔާޟުން ހާމަކޮށްފައި މި ވަނީ، އެކުވެރި ޢަރަބި ޢިމާރާތް (ޔޫއޭއީ)ން ވެސް އެއްވެސް ފަރާތަކަށް އެ ފަދަ ފުރުޞަތެއް ނުދޭނެ ކަން އިޢުލާނު ކޮށްފައިވާ ދަނޑިވަޅެއްގައެވެ. ޔޫއޭއީން ވެސް ބުނެފައި ވަނީ، އީރާނަށް ޙަމަލާ ދިނުމަށް އެ ޤައުމުގެ ވައިގެ އަދި ކަނޑުގެ ސަރަޙައްދު ބޭނުން ކުރުމުގެ ފުރުޞަތު އެއްވެސް ފަރާތަކަށް ނޯންނާނެ ކަމުގައެވެ.
އީރާނަށް ޙަމަލާ ދޭން ޖެހިދާނެ ކަމުގައި ވިދާޅުވެ، އެ ޤައުމަށް އިންޒާރު ދެއްވާފައި ވަނީ އެމެރިކާގެ ރައީސް ޑޮނަލްޑް ޓްރަމްޕެވެ. ހުސްވި ހަފުތާގައި ވާހަކަފުޅު ދައްކަވަމުން ޓްރަމްޕް ވިދާޅުވީ، އެމެރިކާގެ އަސްކަރީ މަނަވަރުތައް ހިމެނޭ ބިޔަ ލަޝްކަރެއް މެދުއިރުމައްޗަށް ދަތުރު ކުރަމުންދާ ކަމުގައެވެ. އަދި، އެ ލަޝްކަރުގެ ބޭނުން ހިފައި، އީރާނަށް ޙަމަލާއެއް ދޭން ނުޖެހޭނެ ކަމަށް އުންމީދު ކުރައްވާ ކަމުގައި ވެސް އޭނާ ވިދާޅުވިއެވެ.
އީރާން ކައިރިއަށް އަސްކަރީ ލަޝްކަރެއް ފޮނުވުމަށް ޓްރަމްޕް ނިންމަވާފައި ވަނީ، އީރާންގެ ސަރުކާރާ ދެކޮޅަށް އެ ޤައުމުގެ ޢާންމު ރައްޔިތުންގެ ތެރެއިން ގިނަ އަދަދެއްގެ ބަޔަކު ފެށި މުޒާހަރާތަކަކާ ގުޅުވައެވެ. އެ މުޒާހަރާތައް މި ވަގުތު ކޮންމެ ވެސް ވަރަކަށް މަޑުޖެހިފައިވީ ނަމަވެސް، މުޒާހަރާތައް ހުއްޓުވުމުގެ ނަމުގައި އީރާންގެ ސަރުކާރާއި ސަލާމަތީ ބާރުތަކުން ހިންގި އޮޕަރޭޝަންތަކުގެ ތެރެއިން ޢާންމުންގެ ގިނަ އަދަދެއްގެ ބަޔަކު މަރުވެފައިވާ ކަމުގައި އިންސާނީ ޙައްޤުތަކަށް ވަކާލާތު ކުރާ ޖަމުޢިއްޔާތަކާއި ހުޅަނގުން ތުހުމަތު ކުރެއެވެ.