މިހާތަނަށް 12،274 މަސްދަޅު ކޭސް ބަހައިފި
-
މާލެ ސަރަހައްދުގައި 65،230 ޑޮމެސްޓިކް ކަރަންޓް މީޓަރު ރަޖިސްޓްރީކޮށްފައިވޭ
-
މިފަހަރު ޖުމްލަ 118،673 ގޭބިސީއަށް މަސްދަޅު ކޭސް ދޫކުރަން ވަނީ ނިންމާފައި
މިއަހަރުގެ ރޯދަ ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދޭން ނިންމާފައިވާ މަސްދަޅު ކޭހުގެ ތެރެއިން މިހާތަނަށް 12،274 މަސްދަޅު ކޭސް ދޫކޮށްފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވުޒާރާއިން ވިދާޅުވެއްޖެއެވެ.
އެ ވުޒާރާއިން ވިދާޅުވީ، މާލެ ސަރަޙައްދުގައި 65،230 ޑޮމެސްޓިކް ކަރަންޓް މީޓަރު ރަޖިސްޓްރީކޮށްފައިވާ ކަމަށެވެ. ރޯދަ ހަދިޔާގެ ގޮތުގައި ބަހާ މަސްދަޅު ކޭސް ދޫކުރަނީ މި އަދަދަށެވެ. އެއީ، ކޮންމެ ކަރަންޓު މީޓަރަކަށް އެއް މަސްދަޅު ކޭހުގެ ރޭޓުންނެވެ.
ސިޓީތަކާބެހޭ ވުޒާރާއިން ވިދާޅުވީ، މާލެ ސަރަހައްދުގައި ރަޖިސްޓްރީކޮށްފައިވާ ޑޮމެސްޓިކް ކަރަންޓް މީޓަރުތަކުގެ ތެރެއިން މިހާތަނަށް 12،274 ގޭބިސީއަށް މަސްދަޅު ކޭސް ހަދިޔާކޮށް ނިމިފައިވާ ކަމަށެވެ. އެއީ، މާލެ ސަރަޙައްދުގައި ބަހަންޖެހޭ މަސްދަޅު ކޭހުގެ %18.8އެވެ.
މާލެ ސަރަހައްދުގައި މަސްދަޅު ކޭސް ބަހަން ފަށާފައިވަނީ، މިދިޔަ ހޮނިހިރު ދުވަހުގެ ރެއިން ފެށިގެންނެވެ. އަތޮޅުތަކުގައި މަސްދަޅު ކޭސް ބެހުމަށް މިހާރު ދަނީ، ތައްޔާރުވަމުންނެވެ. އެސްޓީއޯއިން މަސްދަޅު ކޭސްތައް އަތޮޅުތަކަށް ފޮނުވުމުގެ މަސައްކަތް މިހާރު ފަށާފައިވާއިރު، މަސްދަޅު ކޭސް ބެހުމަށް ފަހިވާ ގޮތަށް މިހާރުވެސް އެކި ސަރަޙައްދުތަކުގައި ގުދަން ކުރެވޭނެ އިންތިޒާމްތައް ހަމަޖެހިފައިވާ ކަމަށް އެ ކުންފުނިން ވިދާޅުވެއެވެ. އަދި އެ ތަންތަނުން ރަށްތަކަށް މަސްދަޅު ކޭސް ބެހުމުގެ މަސައްކަތް ވަރަށް އަވަހަށް ފެށިގެންދާނެ ކަމަށްވެސް ވިދާޅުވިއެވެ.
ރަށްތަކުގައި ރޯދަ ހަދިޔާ ބެހުމުގެ މަސައްކަތް ކުރިއަށް ގެންދާނީ، އެ ރަށެއްގެ ކައުންސިލުގެ ބެލުމުގެ ދަށުންނެވެ.
ރޯދަ ހަދިޔާގެ ގޮތުގައި މިފަހަރު ޖުމްލަ 118،673 ގޭބިސީއަށް މަސްދަޅު ކޭސް ދޫކުރަން ވަނީ ނިންމާފައެވެ.
މާލެ ސަރަހައްދުގައި މަސްދަޅު ކޭސް ބެހުމަށް 15 ސަރަހައްދެއް ވަނީ ކަނޑައަޅާފައެވެ. އެ ތަންތަނުން މަސްދަޅު ކޭސް ދޫކުރާނީ، ޕޯޓަލް މެދުވެރިކޮށް ޓޯކަން ނެގުމުންނެވެ.
މާލޭގައި މަސްދަޅު ކޭސް ބަހާ ތަންތަން:
މިފްކޯ މަރުކަޒު
ސޯޝަލް ސެންޓަރު
އެމްޓީސީސީ ސޯމިލު
ހެންވޭރު ބޯޅަދަނޑު
ގަލޮޅު ދަނޑު
ހުޅުމާލެ ފޭސް1 ގައި މަސްދަޅު ކޭސް ބަހާ ތަންތަން:
ޢުމަރު ޒާހިރު ބިލްޑިން
ޕޮލްކޯ ޓަވަރ
މުޙައްމަދު ޤާސިމް ޕްރީ ސްކޫލް
ހުޅުމާލެ ފޭސް 2ގައި މަސްދަޅު ކޭސް ބަހާ ތަންތަން:
ކާމިލު ދީދީ ސްކޫލް
ހިޔާ ޓަވަރު 10
އެމްޕީއެލް ޓަވަރު ޕީ
ވިލިމާލޭގައި މަސްދަޅު ކޭސް ބަހާ ތަންތަން:
ވެމްކޯ ސައިޓު