ކުޅުދުއްފުށީ ރީޖަނަލް ހޮސްޕިޓަލަށް އެކޮމޮޑޭޝަން ބްލޮކެއް

ހދ. ކުޅުދުއްފުށީ ރީޖަނަލް ހޮސްޕިޓަލުގައި އެކޮމޮޑޭޝަން ބްލޮކެއް ތަރައްޤި ކުރުމަށް، އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ޞިއްޙީ ވުޒާރާގެ ފަރާތުން ސޮއިކުރެއްވީ، އެ ވުޒާރާގެ ސްޓޭޓް މިނިސްޓަރ، ޚަދީޖާ އަބްދުއްސަމަދު ޢަބްދުﷲއެވެ. އަދި އަލްޓެކް މޯލްޑިވްސްގެ ފަރާތުން އެއްބަސްވުމުގައި ސޮއިކުރެއްވީ، ޖެނެރަލް މެނޭޖަރ، ޙުސައިން ތަސްމީންއެވެ.

ކުޅުދުއްފުށީ ރީޖަނަލް ހޮސްޕިޓަލަކީ، މާލޭގެ ހޮސްޕިޓަލްތައް ފިޔަވައި އެންމެ ގިނަ ބަޔަކަށް ފަރުވާދޭ އެއް ހޮސްޕިޓަލެވެ. ހއ، ހދ.އަތޮޅުގެ އިތުރުން ށ.އަތޮޅުގެ ރައްޔިތުންވެސް މި ހޮސްޕިޓަލުން ފަރުވާ ހޯދައެވެ. މިހޮސްޕިޓަލުގައި މިހާރުވެސް 700އެއްހާ މުވައްޒަފުން މަސައްކަތް ކުރެއެވެ.

އެހެންކަމުން ސްޕެޝަލިސްޓުންނާއި ސުޕަރ ސްޕެޝަލިސްޓުންގެ ޚިދުމަތް އެ ހޮސްޕިޓަލުގައި އިތުރުކޮށް، ކުޅުދުއްފުށީ ރީޖަނަލް ހޮސްޕިޓަލުން ދޭ ޚިދުމަތްތައް ހަރުދަނާވުމަކީ، ރާއްޖޭގެ ޞިއްޙީ ނިޒާމު ތަރައްޤީ ކުރުމަށްޓަކައި ކޮންމެހެންވެސް މުހިންމު ކަމެއް ކަމަށް ސަރުކާރުން ޤަބޫލުކުރައްވައެވެ.

ކުޅުދުއްފުށީ ރީޖަނަލް ހޮސްޕިޓަލުގައި ތަރައްޤީ ކުރުމަށް ހަމަޖެހިފައިވާ އިމާރާތުގައި ޑަޔަލިސިސް ރޫމަކާއި، އިމަރޖެންސީ ރޫމަކާއި، މެޑިކަލް ސްޓޯރގެ އިތުރުން، ޖެނެރަލް ސްޓޯރ، ނާސް ސްޓޭޝަން، އެޑްމިން ރޫމް، ބްރީފިން ރޫމް، ނަމާދުކުރާ ކޮޓަރި އަދި މުވައްޒަފުންނަށް ބޭނުންވާ ކާ ކޮޓަރި ފަދަ މުހިންމު އަސާސީ ވަސީލަތްތައް ހިމެނޭނެ ކަމަށް ޞިއްޙީ ވުޒާރާއިން ވިދާޅުވެއެވެ.

މި މަޝްރޫޢާ ގުޅޭގޮތުން ވާހަކަ ދައްކަވަމުން ޞިއްޙީ ވަޒީރު ޢަބްދުﷲ ނާޘިމް އިބްރާހީމް ވިދާޅުވީ، މި މަޝްރޫޢުގެ ދަށުން ޚާއްޞަ އެހީތެރިކަމަށް ބޭނުންވާ ފަރާތްތަކަށްވެސް ބޭނުންވާނެ ކަންކަން ހިމެނޭ ވަސީލަތްތަކެއް ގާއިމުކުރެވޭނެ ކަމަށެވެ.

"މި އެއްބަސްވުމުގެ ދަށުން ބިނާކުރާ ފެސިލިޓީގައި 14 ޕްރައިވެޓް ރޫމް ހިމެނޭނެ. މި ކޮޓަރިތަކަކީ ބަލި މީހުންނާއި، އެހިތެރިންނަށް އެކުގައި ތިބޭވޭނެހެން، އެކަމަށް ބޭނުންވާ ފާޚާނާ ފަދަ ޒަރޫރީ ވަސީލަތްތަކާއި، ޒަމާނީ ފެންވަރަށް ފަރުމާކޮށްފައިވާ ކަންކަން ހިމެނިގެންދާނެ ތަންތަން. މީގެއިތުރުން، ޚާއްޞަ އެހީތެރިކަމަށް ބޭނުންވާ ފަރާތްތަކަށްވެސް ބޭނުންވާނެ ކަންކަން ހިމެނޭ ފެސިލިޓީސްތަކެއް ހިމެނޭނެ". ވަޒީރު ވިދާޅުވިއެވެ.

މި މަޝްރޫޢަށް ސަރުކާރުން 53 މިލިޔަނަށްވުރެ ގިނަ ރުފިޔާ ޚަރަދު ކުރެއެވެ. މި މަޝްރޫޢަކީ، އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކުން ފަންޑު ކޮށްގެން ކުރިއަށްގެންދާ މަޝްރޫޢެކެވެ.

މި މަޝްރޫޢުގެ މަސައްކަތް ނިމުމާއެކު، ކުޅުދުއްފުށީ ރީޖަނަލް ހޮސްޕިޓަލުން ޚިދުމަތް ހޯދާ ފަރާތްތަކަށް ލުއިފަސޭހަތަކެއް ލިބިގެންދާނެ ކަމަށް ސަރުކާރުން ޤަބޫލުކުރައްވައެވެ. އަދި މިއީ ކުޅުދުއްފުށީ ރީޖަނަލް ހޮސްޕިޓަލް ޓާޝައަރީ ފެންވަރަށް ތަރައްޤީ ކުރުމަށް މި ސަރުކާރުން ކުރާ މުހިންމު މަސައްކަތެއް ކަމަށްވެސް ޞިއްޙީ ވުޒާރާއިން ވިދާޅުވެއެވެ.