ރައީސްގެ ތަޢުޒިޔާގެ މެސެޖެއް ފިލިޕީންސްގެ ރައީސަށް!

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފިލިޕީންސްގެ ރައީސް، ހިޒް އެކްސަލަންސީ ފާޑިނަންޑް ރޮމުލްޑޭޒް މާކޯސް ޖޫނިއަރއަށް ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ، ފިލިޕީންސްގެ ރައީސަށް ތައުޒިޔާގެ މެސެޖެއް ފޮނުއްވީ އެ ޤައުމުގެ ދެކުނު ބެސިލާންގައި ފެރީއެއް ބަންޑުންޖަހާލި ހިތާމަވެރި ހާދިސާއާ ގުޅިގެނެވެ.

ރައީސުލްޖުމްހޫރިއްޔާގެ މެސެޖުގައި، އެތައް ބަޔަކު މަރުވެ، ގިނަ ބަޔަކު ގެއްލުނު މި ނުރައްކާތެރި ހާދިސާއާއި ގުޅިގެން ނުހަނު ފުން ހިތާމައެއް ލިބިވަޑައިގެންނެވިކަން ހާމަކުރައްވާފައި ވެއެވެ.

އެމަނިކުފާނުގެ މެސެޖުގައި ފިލިޕީންސްގެ ރައީސް ހިޒް އެކްސަލަންސީ ފާޑިނަންޑް ރޮމުލްޑޭޒް މާކޯސް އާއި، އެޤައުމުގެ ސަރުކާރަށާ، ރައްޔިތުންނާއި، ޙާދިސާގައި ނިޔާވި މީހުންގެ ޢާއިލާތަކަށް، ދިވެހި ސަރުކާރާއި ރައްޔިތުންގެ ނަމުގައި، ހަމްދަރުދީ ފާޅުކުރައްވައި، ތަޢުޒިޔާ ފޮނުއްވާފައި ވެއެވެ.

އަދި މި ހާދިސާގައި، ޒަޚަމްވި މީހުންނަށް އަވަސް ޝިފާއަކަށް އެދިވަޑައިގެން، ގެއްލިފައިވާ މީހުން ހޯދުމަށް، ކުރަމުންދާ މަސައްކަތްތައް ކާމިޔާބު ވުމަށްވެސް، އެދިވަޑައިގެންފައިވެއެވެ.