ރާއްޖެއާއި އިންޑިއާއިން އަބަދުވެސް މަސައްކަތްކުރާނީ ރައްޔިތުންގެ ފައިދާއަށް

އިންޑިއާ އާއި ރާއްޖޭގެ ގުޅުމަކީ ދެ ޤައުމުގެ ރައްޔިތުންގެ ފައިދާއަށް މަސައްކަތްކުރުމުގެ މައްޗަށް ބިނާވެފައިވާ ޤުޅުމެއްކަމަށް ޚާރިޖީ ވަޒީރު ޑރ.ޢަބްދުﷲ ޚަލީލް ވިދާޅުވެއްޖެއެވެ.

ޚާރިޖީ ވަޒީރު މިހެން ވިދާޅުވީ، އިންޑިއާގެ ޖުމްހޫރީ ދުވަހުގެ މުނާސަބަތުގައި، ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އިންޑިއާގެ 77ވަނަ ޖުމްހޫރީ ދުވަހުގެ މުނާސަބަތުގައި ސޯޝަލް ސެންޓަރުގައި ބޭއްވި ރަސްމިއްޔާތުގައި ޚާރިޖީ ވަޒީރު ދެއްކެވި ވާހަކަފުޅުގައި އިންޑިޔާގެ ޖުމްހޫރީ ދުވަހުގެ މުނާސަބަތުގައި އިންޑިޔާގެ ރައީސް ޝްރީ ޑްރައުޕަދީ މުރްމު އަށާއި، ބޮޑުވަޒީރު ނަރެންދުރަ މޯދީ ގެ އިތުރުން، އިންޑިއާގެ އެންމެހާ ރައްޔިތުންނަށް ތަހުނިޔާ ވިދާޅުވިއެވެ. އަދި ރާއްޖެއާއި އިންޑިއާއާ ދެމެދުއޮތް ޒަމާންވީ ގުޅުމުގެ މައްޗަށް އެމަނިކުފާނު އަލިއަޅުއްވާލެއްވިއެވެ.

ވަޒީރު ވިދާޅުވީ އިންޑިއާ އާއި ރާއްޖޭގެ އެކުވެރިކަމަކީ ހަމައެކަނި ތާރީޚީ ގުޅުމެއް ނޫންކަމަށާއި، އެއީ ދެގައުމުގެ ރައްޔިތުންނަށްވެސް ފައިދާވާނެހެން، ގުޅިގެން މަސައްކަތްކުރުމުގެ މައްޗަށް ބިނާވެފައިވާ ގުޅުމެއްކަންވެސް ފާހަގަކުރެއްވިއެވެ. އަދި އިންޑިއާއަކީ ރާއްޖެއަށް އަބަދުވެސް އެހީތެރިވެދޭ ގައުމެއްކަމަށާއި، އިންޑިއާއިން ފޯރުކޮށްދޭ އެހީގެ ސަބަބުން ރާއްޖެއަށް އެތައްގޮތަކުން ފައިދާވާކަން ވަޒީރު ފާހަގަކުރެއްވިއެވެ.

"އިންޑިއާއަކީ ޒަމާނުއްސުރެ ރާއްޖެއަށް އެހީތެރިވެދޭ ގައުމެއް. އަދި އިންޑިއާއިން ފޯރުކޮށްދޭ އެހީތަކުގެ ސަބަބުން ދިވެހިންނަށް އެތަކެއް ފައިދާތަކެއް ލިބޭ. ރާއްޖޭގެ މިހާރުވެސް އެތަކެއް އިންޑިއާ މީހުން އެބަތިބި ޚިދުމަތް ކުރަން. އިންޑިއާގެ ޑޮކްޓަރުންނާއި، ނަރުހުންނާއި، ޓީޗަރުންގެ ފަރާތުން ފެނިގެންދަނީ، ރާއްޖެއަށް އޮންނަ ލޯތްބާއި އިޚްތިރާމް" ވަޒީރު ވިދާޅުވިއެވެ.

އިންޑިޔާގެ ޖުމްހޫރީ ދުވަސް ފާހަގަކުރަނީ އެ ޤައުމުގެ ޤާނޫނު އަސާސީ އެކުލަވާލާ، ޢަމަލުކުރަން ފެށި ދުވަހާއި ގުޅުވާއިގެންނެވެ. އެއީ 1950 ވަނަ އަހަރުގެ ޖެނުއަރީމަހުގެ 26 ވަނަ ދުވަހެވެ. އަދި އެ ދުވަހަކީ އިންޑިޔާގެ ފުރަތަމަ ރައީސް ޑޮކްޓރ ރަޖެންދްރާ ޕްރަސާދް، ރައީސްކަމުގެ ހުވާކުރެއްވި ދުވަހެވެ.