ޝަހީދު ޢަލީ ސްކޫލް ހުޅުވަން ތައްޔާރު; 1950 ކުދިންނަށް ޖާގަ
-
މިހާރު ކުރިއަށްދަނީ އެންމެ ފަހުގެ ތައްޔާރީތައް
-
230 މީހަކަށް ވަނީ ވަޒީފާ ހަމަޖައްސާފައި
ހުޅުމާލެ ދެވަނަ ފިޔަވަހީގައި އަލަށް ތަރައްޤީ ކޮށްފައިވާ "ޝަހީދު ޢަލީ" ސްކޫލް މާދަމާ ހުޅުވާނެއެވެ. މި ސްކޫލް މާދަމާ ރަސްމީކޮށް ހުޅުވާއިރު އެ ސްކޫލް ހުޅުވަނީ 2 ދަންފަޅިިއަށް ކިޔަވާދޭގޮތަށެވެވެ. ތަޢުލީމީ ވުޒާރާއިން ވިދާޅުވީ "ޝަހީދު ޢަލީ" ސްކޫލްގައި ކިޔެވުމަށްޓަކައި މިހާތަނަށް 1950 ދަރިވަރަކަށް ޖާގަ ދީފައިވާކަމަށެވެ.
ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ މި ސްކޫލަކީ މި ސަރުކާރުން ތަރައްޤީކޮށް ހުޅުވާ ފުރަތަމަ ސްކޫލްއެވެ. އާރްސީސީއާ ހަވާލުކޮށްގެން ތަރައްޤީކުރި މި ސްކޫލްގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވީ 2023 ވަނަ އަހަރުގެ ޑިސެމްބަރު މަހުގައެވެ. އަދި 2 އަހަރުގެ ތެރޭގައި ސްކޫލްގެ މަސައްކަތް ނިންމާ ކިޔަވައިދިނުމަށް މިހާރު ވަނީ ތައްޔާރުވެފައެވެ.
ސްކޫލް ހުޅުވުމަށް ވާންޖެހޭ އެންމެ ފަހުގެ ތައްޔާރީތައް ބައްލަވާލެއްވުމަށް ތަޢުލީމީ ވަޒީރު ޑރ.އިސްމާޢީލް ޝަފީއު އެ ސްކޫލަށް ކުރެއްވި ޒިޔާރަތުގައި ނޫސްވެރިންނަށް މަޢުލޫމާތު ދެއްވަމުން ވިދާޅުވީ އެ ސްކޫލްގައި ކިޔެވުމަށްޓަކައި 1950 ދަރިވަރަކަށް ޖާގަ ދީފައިވާކަމަށެވެ. އަދި 230 މުވައްޒަފުން ނަގާފައިވާކަމަށްވެސް ވަޒީރު ވިދާޅުވިއެވެ. ވަޒީރު ވިދާޅުވީ އެ ސްކޫލްއަކީ އެންމެ ޒަމާނީ ފެންވަރަށް ތަރައްޤީކޮށްފައިވާ ސްކޫލްއެއްކަމަށާއި މާދަމާ ކިޔެވުން ފެށޭއިރު އެއްވެސް ދަތިކަމެއް ކުރިމަތި ނުވެ ކިޔަވައިދިނުމަށް ތައްޔާރުވެފައިވާކަމަށެވެ.
" ދަރިވަރުންނަށް ދަތިކެއް ދިމާނުވާނެ ހެން މިހާރު ވަނީ ތައްޔާރުވެފައި. ކްލާސްރޫމްތަކާއި ފަރުނީ ޗަރުތައްވެސްވަނީ ނިމިފައި. ލެބޯޓަރީތަކާއި ކޮމްޕިޓުރަ ލެބްގެ މަސައްކަތްތައް ވަނީ ނިމިފައި. ޖުމުލަކޮށް ހުރިހާކަމެއްހެން ވަނީ ފުރިހަމަވެފައި. މިއީ 2 ދަންފަޅިއަށް ކިޔަވައިދޭނެ ސްކޫލްއެއް. " ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވިއެވެ.
ޝަހީދު ޢަލީ ސްކޫލަކީ 5 ފަންގިފިލާއަށް ތަރައްޤީ ކޮށްފައިވާ، 50 ކްލާސްރޫމުގެ ސްކޫލެކެވެ. މިސްކޫލްގައި މަލްޓިޕާޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ ގޮތްވެސް ވަނީ ހަމަޖައްސާފައެވެ. މި ސްކޫލަކީ 1،500 ކުދިންގެ ޖާގައިގެ ސްކޫލެއްނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް ތަޢުލީމީ ވުޒާރާއިން ވަނީ ކުރިން ވިދާޅުވެފައެވެ.
މި ސްކޫލަށް ޝަހީދު ޢަލީ ނަމުން ނަންދީފައިވާއިރު އެންމެ ފާހަގަކުރެވިފައިވަނީ މަދަރުސާގެ ލޯގޯއެވެ. ޝަހީދު ޢަލީ ސްކޫލް ލޯގޯ ފަރުމާކޮށްފައިވަނީ އަރަބިވަންތަ ނިކަން ރީތި ތާނަ ފޮންޓަކުންނެވެ. ލޯގޯއިން ފެންނަނީ ޝަހީދު ޢަލީ ދިވެހިން ލިޔެފަ އޮންނައިރު، އެ ދެ ނަން ފެށޭ ތާނައިގެ "ޝ" އަދި "ޢ" އަކުރެވެ. ޝަހީދު ޢަލީ ސްކޫލަކީ، ހުޅުމާލެ ދެވަނަ ފިޔަވަހީގައި ތަރައްޤީ ކުރާ ދާއިމީ 2 ވަނަ ސުކޫލެވެ. ދެވަނަ ފިޔަވަހީގައި ހުޅުވި ފުރަތަމަ ސްކޫލަކީ، ޞަލާޙުއްދީން ސްކޫލެވެ.