އާގުބޯޓުފަހަރަށް 24 ގަޑިއިރުގެ ޚިދުމަތް: އިޤްތިޞާދީ ކުރިއެރުމަށް މުހިންމު ފިޔަވަޅެއް!

ރާއްޖެ އަންނަ އާގު ބޯޓުފަހަރަށް ޕޯޓް މިއަދުން ފެށިގެން ޕޯޓް ލިމިޓް އޭރިޔާއަށް 24 ގަޑިއިރު ވަދެވޭގޮތައް ވަނީ ބަދަލުގެނެސްފައެވެ.

1988ވަނަ އަހަރުގެ ނޮވެންބަރު މަހުން ފެށިގެން މާލޭ ވިޔަފާރި ބަނދަރަށް އަންނަ ބައިނަލްއަގުވާމީ އުޅަނދުތަކުން އަމަލުކުރަންޖެހޭ އުސޫލުގެ ދަށުން ރޭގަނޑު 12ގެ ފަހުން އަންނަ އުޅަނދެއް ނަމަ، ހެނދުނު 6 ޖަހަންދެން ބޭރުގައި މަޑުކުރަންޖެއެވެ. މިއީ ބޮޑެތި ތަކުލީފުތަކެއް އުފުލަންޖެހުނު ކަމެކެވެ. އަދި އޭގެ ސަބަބުން ގިނަ ވަގުތުތަކެއް ގެއްލިގެންދެއެވެ.

ރާއްޖެއަށް އަންނަ އުޅަނދުތައް ގިނަވަމުންދާތީ، މި މައްސަލަ ހައްލުކޮށް، ގައުމުގެ އިގްތިސާދަށް ފައިދާވާނެހެން ކޮންމެ ވަގުތެއްގައިވެސް ބަނދަރަށް ވަދެވޭނެ އިންތިޒާމުތައް ގާއިމުކުރުމަށް ސަރުކާރުން ނިނެމެވިއެެވެ. އަދި މި ބަދަލަށް މިހާރު ވަނީ އަމަލުވެސް ކުރަން ފަށާފައެވެ. މިއީ މީގެ އެތައް އަހަރެއް ކުރިން ފެށިގެން އަމަލުކުރަމުން އައި އުސޫލު ބަދަލުކޮށް، އިޤްތިޞާދީ ގޮތުން އެޅުނު މުހިންމު ފިޔަވަޅެކެވެ.

މި ނިންމުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގެންގުޅުއްވާ ހަރުދަނާ ސިޔާސަތުތަކުގެ ދަށުން ގެނެވުނު މުހިންމު ހެޔޮ ބަދަލެއް ކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ވަނީ ވިދާޅުވެފައެވެ.

މިބަދަލާއެކު، ކުރިންވެސް އުޅަނދުފަހަރަށް ދެމުންއައި ކްލިޔަރެންސް ދިނުމާއި ޕައިލޮޓޭޖުގެ ޚިދުމަތް ދިނުމުގެ ކަންކަންވެސް 24 ގަޑިއިރު ހިނގަމުން ދާނެއެވެ.

މި އައު ބަދަލާއެކު، އުޅަނދުފަހަރުގެ ރައްކާތެރިކަން ކަށަވަރުކުރުމާއި، އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ ކޯޑުގެ މިންގަނޑުތަކާ އެއްގޮތަށް ދޭންޖެހޭ ހުއްދަތަކާއި ޕައިލޮޓޭޖްގެ ޚިދުމަތްތައް މެދުނުކެނޑި ލިބޭނެއެވެ. މީގެ ސަބަބުން ބޯޓުފަހަރު ދުއްވާ ފަރާތްތަކުން ބޭރުގައި މަޑުކުރަންޖެހުމުން ކުރިން ހިނގާ އިތުރު ޚަރަދުތައް ސަލާމަތްވެ، ވަގުތު ސަލާމަތްކުރުމަށް ބޮޑު ލުޔެއް ލިބިގެންދާނެކަމަށް ދަތުރުފަތުރާއި ބެހޭ ވުޒާރާއިން ވިދާޅުވިއެވެ.

މި ނިންމުމަކީ މާލޭ ކޮމާޝަލް ޕޯޓަކީ ބައިނަލްއަގުވާމީ ފެންވަރުގެ އިތުބާރު ހުރި ތަނަކަށް ހެދުމަށް އެޅުނު މުހިންމު ފިޔަވަޅެކެވެ. އަދި މިއީ ރާއްޖޭގެ ކަނޑުގެ ދަތުރުފަތުރުގެ ދާއިރާ ތަރައްގީވެ، ރާއްޖެ އަންނަ އުޅަނދުފަހަރުގެ އަދަދު އިތުރުވުމަށް މަގުފަހިވެގެންދާނެ ކަމެއްގެ ގޮތުގައި ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ސިފަކުރައްވައެވެ.

މި ސަރުކާރުން ގެންދަވަނީ ރާއްޖޭގެ އިޤްތިޞާދު ސިންދަފާތުކޮށް ވިޔަފާރިތަކަށް ފަހި މާހައުލެއް ގާއިމްކުރުމަށް މަސައްކަތްކުރައްވަމުންނެވެ. އެގޮތުން ވިޔަފާރިތަކަށް ދަތިވާގޮތައް ހުރި ކަންކަން ލުއި ފަސޭހަގޮތައް ދަނީ ބަދަލުކުރަމުންނެވެ. އެގޮތުން މިދިޔަ ޑިސެމްބަރ މަހުގެ ތެރޭގައި ވަނީ ވައިގެމަގުން އަންނަ މުދާ ކްލިއަރކުރުމަށް ކަސްޓަމްސްއިންދޭ ޚިދުމަތްތައްވެސް 24 ގަޑިއިރަށް ބަދަލުކޮށްފައެވެ. އަދި ވިޔަފާރިތަކަށް ފަސޭހަކޮށްދިނުމަށްޓަކައި ޑެމަރޭޖް ނާރާގޮތައް ފްރީކޮށް އޮންނަ 80 ގަޑިއިރުވެސް 124 ގަޑިއިރަށް ބަދަލުކޮށްދޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ވިދާޅުވެފައެވެ.