އިތުރު އަތޮޅަކަށް އަންނަ މަހު އާރްޓީއެލް ފަށަން ތައްޔާރުވަނީ

އިތުރު އަތޮޅަކަށް އާރްޓީއެލްގެ ޚިދުމަތް ފެބްރުއަރީ މަހު ފެށުމަށް ތައްޔާރުވަމުން އަންނަ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވެއްޖެއެވެ.

އާރްޓީއެލްގެ ޚިދުމަތް ރާއްޖޭގައި ދެނީ 6 ޒޯނަކަށް ބަހާލައިގެންނެވެ. މި ޚިދުމަތް މިހާތަނަށް 4 ޒޯނެއްގައި ވަނީ ފަށާފައެވެ.

ޚިދުމަތް ނުފަށާ އޮތީ، ޒޯން 4 އަދި ޒޯން 3ގައެވެ. ޒޯން 4ގައި ހިމެނެނީ، މ، ފ، ދ އަދި ލ.އަތޮޅުއެވެ. ޒޯން 3ގައި ހިމެނެނީ ކ، އއ، އދ އަދި ވ.އަތޮޅެވެ.

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވީ، އަންނަ މަހު އިތުރު އަތޮޅެއްގައި ފެރީގެ ޚިދުމަތް ފެށުމަށް ތައްޔާރުވަމުން އަންނަ ކަމަށެވެ. ޚިދުމަތް ފަށާ އަތޮޅުތަކާއި އޭގެ އުސޫލުތައް ކަނޑައަޅަނީ ވުޒާރާއިންނެވެ. ދެން އެންމެ އަވަހަށް ޚިދުމަތް ފަށާނެ އަތޮޅުތައް ކަނޑައެޅުމުގެ މަސައްކަތް ކުރަމުންދާ ކަމަށް އެ ވުޒާރާއިން ވިދާޅުވިއެވެ.

ފެރީގެ ޚިދުމަތް ދެނީ، އެމްޓީސީސީއާ ހަވާލުކޮށްގެންނެވެ. އެމްޓީސީސީން ވިދާޅުވީ، ބާކީ ހުރި އަތޮޅުތަކަށް ޚިދުމަތް ދިނުމަށް ބޭނުންވާ ހުރިހާ ފެރީތައް ބަނުމުގެ މަސައްކަތް މިހާރު ކުރިއަށްދާ ކަމަށެވެ. އަދި އެ މަސައްކަތް ކަނޑައެޅިފައިވާ ތާވަލާ އެއްގޮތަށްދާއިރު، މަސައްކަތް ނިމެމުންދާ ވަރަކުން އަތޮޅުތަކަށް ދަތުރުތައް ފަށާނެ ކަމަށެވެ.

އެންމެ ފަހުން އާރްޓީއެލްގެ ޚިދުމަތް ފެށީ، ތ.އަތޮޅުގައެވެ. މިހާތަނަށް ޖުމުލަ 12 އަތޮޅެއްގައި މި ޚިދުމަތް ވަނީ ފަށާފައެވެ.

އާރްޓިއެލްގެ ޚިދުމަތް ފެށީ، 2022ވަނަ އަހަރުގައެވެ. ދަތުރުފަތުރުގެ ދާއިރާއިން ޚާއްޞަ އިސްކަމެއް ދޭ މަސައްކަތްތަކުގެ ތެރެއިން، ކަނޑައަޅާފައިވާ ތާވަލާ އެއްގޮތަށް މި ސަރުކާރުންވެސް އަންނަނީ މި މަސައްކަތް ކުރިއަށް ގެންދަމުންނެވެ.

ރައީސުލްޖުމްހޫރިއްޔާ މިދިޔަ އޮކްޓޯބަރު މަހު އަތޮޅުތަކަށް ކުރެއްވި ދަތުރުފުޅުގައި، އެމަނިކުފާނު ވަނީ މާރިޗު މަހުގެ ނިޔަލަށް ހުރިހާ އަތޮޅެއްގައި އާރްޓީއެލް ފެރީގެ ޚިދުމަތް ނިންމުމަށް ސަރުކާރުން މަސައްކަތް ކުރަމުންދާ ކަމަށް ވިދާޅުވެފައެވެ.

މި ޚިދުމަތަކީ، ހައި ސްޕީޑް ފެރީ ނިޒާމުން މުޅި ރާއްޖެ ގުޅާލުމަށް ފަށާފައިވާ މަސައްކަތެކެވެ. މިއީ، އަގުހެޔޮ އަދި ރައްޔިތުންނަށް ބަރޯސާވެވޭ ޚިދުމަތެކެވެ.