މާލޭގައި ޞުލްޙަވެރިކަމާއެކު އެއްވެ އުޅުން ހުއްދަކުރައްވާ ތަނެއްގެ ގޮތުގައި ހެންވޭރު ކާނިވާ ސަރަޙައްދު ހޯމް މިނިސްޓްރީން ކަނޑައަޅުއްވައިފިއެވެ.
ހޯމް މިނިސްޓްރީން ވިދާޅުވީ ޞުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނުގެ ދަށުން ފުލުހުން ދޭ ޙުއްދައަކާއެކު ފިޔަވައި، މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއް ނުވަތަ އުޅަނދުބުރެއް ބޭއްވޭނީ ކާނިވާ ސަރަޙައްދުގައިކަމަށެވެ. މިކަން މިގޮތަށް މި އިޢުލާންކުރެއްވީ، ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނަށް މިދިޔަ އޯގަސްޓްމަހުގެ 17 ވަނަ ދުވަހު ރައްޔިތުންގެ މަޖިލީހުން ފާސްކުރައްވައި، އޯގަސްޓްމަހުގެ 23 ގައި ރައީސުލްޖުމްހޫރިއްޔާ ތަޞްދީޤުކުރެއްވި އިޞްލާޙާ ގުޅިގެން، އެ ޤާނޫނުގައިވާ ހަމަތަކުގެ މަތިންނެވެ.
މޯލްޑިވްސް ޕޮލިސް ސަރވިސްއިން ލިޔުމުން ދެއްވާ ހުއްދައަކާއެކު ފިޔަވައި، މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއް ނުވަތަ އުޅަނދުބުރެއް ބޭއްވޭނީ، މިނިސްޓްރީ އޮފް ހޯމް އެފެއަރޒުން ކަނޑައަޅުއްވައި ޢާންމުކޮށް އިޢުލާންކޮށްފައިވާ ތަންތަނުގައި އެކަނިކަމަށް ޤާނޫނަށް ގެންނެވި އިޞްލާޙުގައިވެއެވެ.