ގުޅިފަޅުގައި ޤާއިމްކުރާ "ލޭބަރ ޕާރކް" ތަރައްޤީކުރުމުގެ މަޝްރޫއު ނިމޭއިރު ފަނަރަހާހެއްހާ ބިދޭސީންނަށް އެތަނުގައި ދިރިއުޅެވޭނެ ކަމަށް ގުޅިފަޅު އިންވެސްޓްމަންޓް ލިމިޓެޑުން ހާމަކޮށްފިއެވެ.
ލޭބަރ ކްއާރޓަރަކާއި، ކައްކާ ތަންނަކާއި، މެސް ރޫމަކާއި މުނިފޫހިފިލުވުމަށް ޚާއްޞަ ތަންތަނާއެކު ގުޅިފަޅުގައި ތަރައްޤީކުރާ ލޭބަރ ޕާރކަކީ ރާއްޖޭގައި މަސައްކަތްކުރާ ބިދޭސީ މުވައްޒަފުން ދިރިއުޅޭނެ ރަނގަޅު މާޙައުލެއް ޤާއިމުކުރުމަށްޓަކައި ދިވެހި ސަރުކާރުގެ އިސްނެންގެވުމަށް ޤާއިކުރައްވާ ތަނެކެވެ. އަދި ގުޅިފަޅުގައި ލޭބަރ ޕާރކެއް ޤާއިމުކުރުމަށް ޝައުޤުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް ހުށަހެޅުމުގެ ފުރުޞަތު މިހާރު ހުޅުވާލާފައެވެ. ގުޅިފަޅު ލޭބަރ ޕާކާ ގުޅޭގޮތުން މަޢުލޫމާތުދެއްވަމުން ގުޅިފަޅު އިންވެސްޓްމަންޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ ފަޒީލް ވިދާޅުވީ ލޭބަރ ޕާރކު ތަރައްޤީކުރުމުގެ ފުރަތަމަ ފިޔަވަހީގައި އެތަނުގައި ހުރި ފްލެޓްތަކުގައި ގާތްގަނޑަކަށް ހަތްހާސް ބިދޭސީންނަށް ދިރިއުޅެވޭނެ ކަމަށެވެ.
img:http://s1.psmnews.mv/images/660x400/14731678130210.jpg|ގުޅިފަޅު /
ފަޒީލް ވިދާޅުވީ ލޭބަރ ކުއަރޓަރގައި ބިދޭސީން ދިރިއުޅެން ފެށުމުން މާލެއަށް ވަރަށް ބޮޑު ލުޔެއް ލިބިގެންދާނެ ކަމަށެވެ. ލޭބަރ ޕާކް ހިންގާ ފަރާތުން އިންޓަރނޭޝަނަލް ލޭބަރ އޮގަނައިޒޭޝަން، އައިއެލްއޯ، ގެ ޤަވާޢިދަށް ޢަމަލުކުރަން ޖެހޭނެ ކަމަށެވެ. އެގޮތުން ކޮޓަރިއެއްގައި އެންމެ ގިނަވެގެން އުޅެވޭނީ ކިތަށް މީހުންނަށްކަންވެސް އެ ޤަވާޢިދުގައިވާނެ ކަމަށެވެ. އަދި އެއަށް ޢަމަލުކުރޭތޯ އެ ކުންފުނީގެ ފަރާތުން ބަލާނެކަމަށްވެސް ފަޒީލް ވިދާޅުވިއެވެ.
ފަޒީލް ވިދާޅުވީ ލޭބަރ ޕާކު ހުންނާނީ އެރަށުގެ އެހެން ސަރަޙައްދުތަކާއި ވަކިން ކަމާއި ވަކި ޖެޓީއެއްވެސް ލޭބަރ ޕާކެއް ހުންނާނެ ކަމަށެވެ. ވިލިމާލޭގެ ހުޅަނގު ފަރާތުގައި އޮންނަ ގުޅިފަޅަކީ ތިލަފުއްޓަށްފަހު މާލެ ސަރަޙައްދުގައި ހަދަމުންދާ ދެވަނަ ސިނާޢީ ރަށެވެ.