ޝަހީދު އަލީ ސްކޫލުގައި ކިޔެވުން ފެށުމުގެ ފަހުގެ ތައްޔާރީތައް ކުރިއަށް

ހުޅުމާލެ ދެވަނަ ފިޔަވަހީގައި އަލަށް ހުޅުވާ ޝަހީދު ޢަލީ ސްކޫލަށް ވަނުމަށް އެދުނު 1800 އަށްވުރެ ގިނަ ކުދިންނަށް އެފުރުޞަތު ދީފައިވާ ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

ވަޒީރު ވަނީ، ޝަހީދު ޢަލީ ސްކޫލުގެ މަސައްކަތްތައް ކުރިއަށްދާ ގޮތް ބައްލަވާލައްވާފައެވެ.

ޕީއެސްއެމް ނިއުސްއަށް ދެއްވި އިންޓަވިއުއެއްގައި ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ، ސަރުކާރުން ކަނޑައެޅި ގޮތަށް ދިރާސީ އައު އަހަރާއެކު ޝަހީދު ޢަލީ ސްކޫލުގައި ކިޔެވުން ފަށާނެ ކަމަށެވެ. އަދި ސްކޫލަށް ކުދިން ހޯދުމާ ގުޅޭ މަސައްކަތްތައް މިދިޔަ އަހަރުގެ މެދު ތެރެއިން ފެށިގެން ފަށާފައިވާ ކަމަށެވެ. ވަޒީރު ވިދާޅުވީ، އެންމެ ފުރަތަމަ ބަލާފައިވަނީ ދެވަނަ ފިޔަވަހިން މާލެއަށް ކިޔަވަން އަންނަ ދަރިވަރުންގެ އަދަދާއި، ފޭސް ދެއަކަށް ކުދިން ބަދަލުކުރަން ބޭނުންވާ މިންވަރަށްކަމަށެވެ.

"800-900 ކުދިން މާލެއަށް ކިޔަވަން އެބަ އާދޭ. އަހަރުގެ މެދު ތެރޭގައި ބެލެނިވެރިންނަށް ރިކުއެސްޓް ކުރިން، ހުޅުމާލެ ފޭސް 2އަށް ކުދިން ބަދަލު ކުރަން ބޭނުންވާ ބެލެނިވެރިންނަކީ ކޮބާތޯ. އޭރުވެސް 500 ބެލެނިވެރިން އެކަމަށް ބޭނުންވި" ވަޒީރު ވިދާޅުވިއެވެ.

އާ ސްކޫލު ހުޅުވުމަށް ތައްޔާރު ވަމުންދާއިރު، މިހާތަނަށް 1800 ދަރިވަރުންނަށް ވަނީ ޖާގަ ދީފައެވެ. ވަޒީރު ވިދާޅުވީ، ދެވަނަ ފިޔަވަހީގެ ސްކޫލުތަކަށް ކުދިން ވައްދަން ބޭނުންވާނަމަ އަދިވެސް އެފުރުޞަތު ދެމުންދާކަމަށެވެ.

ޝަހީދު ޢަލީ ސްކޫލަކީ 5 ފަންގިފިލާއަށް ތަރައްޤީ ކޮށްފައިވާ، 50 ކްލާސްރޫމުގެ ސްކޫލެކެވެ. ދިރާސީ އަހަރު ކިޔެވުން ފެށާއިރު މި ސްކޫލް ހުޅުވާއިރު، އިމާރާތުގެ ހުރިހާ މަސައްކަތްތައް މިހާރު ވަނީ ނިންމާފައެވެ. ވަޒީރު ވިދާޅުވީ ސްކޫލަށް ބޭނުންވާ ވަސީލަތްތައް ހަމަކުރުމާއި، މުދަރިސުންނާއި، ސްޓާފުން ހަމަޖެއްސުމުގެ މަސައްކަތްތައްވެސް ވަރަށް ފުރިހަމައަށް ކުރިއަށްދާ ކަމަށެވެ. އަދި ސްކޫލު ހުޅުވުމަށް ވަމުންދާ ތައްޔާރީތަކާމެދު ވަރަށް ހިތްހަމަޖެހޭ ކަމަށްވެސް ވަޒީރު ވިދާޅުވިއެވެ.

"މި ސްކޫލާއެކު ދަރިވަރުންގެ ބޮޑެތި ތަކުލީފުތަކަކަށް ލުޔެއް ލިބިގެން މިދަނީ. މާލޭގެ އެހެން ސްކޫލުތަކެކޭ އެއްގޮތަށް، ފެންވަރު ރަނގަޅު މުދަރިސުން ކިޔަވައިދޭނީ." ވަޒީރު ވިދާޅުވިއެވެ.

ހުޅުމާލޭ 2 ވަނަ ފިޔަވަހީގައި އަލަށް ބިނާކުރެވުނު ޝަހީދު ޢަލީ ސްކޫލު، ހުޅުވުމަށްޓަކައި ވަމުންދާ އެންމެފަހުގެ ތައްޔާރީތައް ބައްލަވައިލެއްވުމަށް، މިނިސްޓަރ ޑރ. އިސްމާޢީލް ޝަފީޢު އެ ސްކޫލަށް މިއަދު ޒިޔާރަތްކުރެއްވުން. pic.twitter.com/3vEqQk7mQ3

— Ministry of Education (@MoEdumv) January 11, 2026

ވަޒީރު ވިދާޅުވީ، ކުދިންގެ ޔުނީފޯމުގެ ކަންކަންވެސް ރަނގަޅަށްދާ ކަމަށެވެ. ނަމަވެސް މިއީ މުޅިން އަލަށް ހުޅުވާ ސްކޫލެއްކަމުން، ކޮންމެވެސް ވަރެއްގެ ދަތިކަމެއް ހުރުން އެކަށީގެންވާ ކަމަށެވެ. ނަމަވެސް ކިޔެވުމުގެ ކަންކަމަށް ބުރޫ އަރާ ފަދަ ދަތިތަކެއް ނާންނާނެ ކަމުގެ ޔަޤީންކަން ދޭ ކަމަށެވެ.

ޝަހީދު ޢަލީ ސްކޫލަކީ، ހުޅުމާލެ ދެވަނަ ފިޔަވަހީގައި ތަރައްޤީ ކުރާ ދާއިމީ 2 ވަނަ ސުކޫލެވެ. ދެވަނަ ފިޔަވަހީގައި ހުޅުވި ފުރަތަމަ ސްކޫލަކީ، ޞަލާޙުއްދީން ސްކޫލެވެ. މި ސްކޫލު ހުޅުވީ، 2023 ވަނަ އަހަރުގެ ދިރާސީ އަހަރަށެވެ.