މީގެ ދެ އަހަރެއްހާ ދުވަސް ކުރިން، ފަލަސްޠީންގެ ޣައްޒާއަށް ޔަހޫދީންގެ ނިރުބަވެރި ފައުޖުން ދޭން ފެށި ޢުދުވާނުތަކުގައި ޝަހީދުކޮށްލާފައިވާ މީހުންގެ ޖުމްލަ ޢަދަދު 70،000އަށް ވުރެ މައްޗަށް އަރާފައިވާކަމަށް ޣައްޒާގެ ސިއްޙީ ވުޒާރާއިން ބުނެފިއެވެ.
އެ ވުޒާރާއިން ބުނި ގޮތުގައި، މިދިޔަ ބުރާސްފަތި ދުވަހުން ފެށިގެން ޔަހޫދީންގެ ނިރުބަވެރި ޙަމަލާތަކުގައި ޝަހީދުވި 301 މީހުން ހިމަނައިގެން، ޖުމްލަ ޢަދަދު މިހާރު ވަނީ 70،100އަށް މިހާރު ވަނީ އަރައިފައެވެ.
ޔަހޫދީންގެ ޢުދުވާންތަކަށް ކެތް ނުކުރެވިގެން 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޣައްޒާގައި ވެރިކަންކުރާ ޙަމާސް ޖަމާޢަތުން ޔަހޫދީންނަށް އަމާޒު ކޮށް ދިން ޖިހާދީ ޙަމަލާއަކާ ގުޅިގެން، އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީ ފައުޖުން ވަނީ ޣައްޒާގެ ރައްޔިތުންގެ ނަސްލުހޭދު ކުރުމަށް ޤަތުލުޢާންމެއް ފަށާފައެވެ.
ހުއްޓުމެއްނެތި ދެމުންދާ ޙަމަލާތަކުގެ ސަބަބުން، ޝަހީދުވާ މީހުންގެ މަޢުލޫމާތު އަދާހަމަކުރަން ދަތިކަމަށް ސިއްޙީ ވުޒާރާއިން ބުނެފައިވެއެވެ.
ދެ އަހަރު ދުވަހަށް ފަހު ހަނގުރާމަ ނިމުމަކަށް އައީ މި އަހަރުގެ އޮކްޓޯވަރު މަހުގެ 10ވަނަ ދުވަހު އެ އެއްބަސްވުމަށް ޢަމަލުކުރަން ފެށުމުންނެވެ. ނަމަވެސް ހަނގުރާމަ ހުއްޓައިލުމުގެ އެއްބަސްވުމަށް ޢަމަލުކުރަން ފެށި ފަހުން ވެސް ޔަހޫދީން ދަނީ ޣައްޒާއަށް ޙަމަލާދީ ކޮންމެ ދުވަހަކު އެތައް ބަޔަކު ޝަހީދުކުރަމުންނެވެ.