"ޕީ.އެސް.އެމް ޢީދު އުފާ 1437" ގެ ހަރަކާތްތަކުގައި ބައިކް މޯލްޑިވްސްގެ ފަރާތުން ރަސްމީކޮށް ބައިވެރިވުމަށް ނިންމާ، އެކަމުގެ އެއްބަސްވުމުގައި ޕީ.އެސް.އެމްއާއެކު ސޮއިކޮށްފިއެވެ.
ޕީ.އެސް.އެމްގެ ފަރާތުން މިއަހަރުގެ އަޟްހާ ޢީދު ލ. ފޮނަދޫގައި ކުލަގަދަކޮށް ފާހަގަކުރުމަށް ވާންޖެހޭ ތައްޔާރީތައް ފޮނަދޫ ކައުންސިލާއި ގުޅިގެން ދަނީ ކުރަމުންނެވެ.
ޕީ.އެސް.އެމް ޢީދު އުފާ 1437ގައި "ފައިން އަނބުރާ އަނބުރާ 17 ކިލޯމީޓަރު"ގެ ނަމުގައި ބައިކް މޯލްޑިވްސްގެ ފަރާތުން ބާއްވާ ޙާއްސަ ބައިސިކަލު ބުރު ޕީ.އެސް.އެމްއާއި ގުޅިގެން ކުރިއަށްގެންދިއުމުގެ އެއްބަސްވުމުގައި ޕީ.އެސް.އެމްގެ ފަރާތުން ސޮއިކުރެއްވީ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް ޢަބްދުއްލަތީފްއެވެ. އަދި ބައިކް މޯލްޑިވްސްގެ ފަރާތުން ސޮއިކުރެއްވީ އެޖަމިއްޔާގެ ފައުންޑިންގ މެމްބަރެއް ކަމަށްވާ އަޙްމަދު ޙަސަން ދީދީއެވެ.
img:http://s1.psmnews.mv/images/660x400/14724829026984.jpg|ބައިކް މޯލްޑިވްސްއިން ޢީދުގެ ހަރަކާތްތަކުގައި ބައިވެރިވުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މި އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން ޕީ.އެސް.އެމްގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް ޢަބްދުއްލަތީފް ވިދާޅުވީ، ބައިކް މޯލްޑިވްސްގެ ފަރާތުން މިފަދަ ހަރަކާތެއް ހިންގުމަކީ، އެކަމުގެ ސަބަބުން މުޖުތަމައުގެ ތެރޭގައި އެކުވެރިކަމާއި އެއްބާރުލުން ބަދަހިވެގެންދާނެ ހަރަކާތެއްކަމަށް ދެކެވަޑައިގަންނަވާކަމަށެވެ. އަދި ޒަމާނުއްސުރެއް ދިވެހިންގެ ތެރޭގައި ޢީދު ހަރަކާތްތައް ބޮޑަށް މަޤުބޫލުވެފައި ވަނީ ސަޤާފީ އެކި ކަހަލަ ކުޅިވަރުތައް ކުޅިވަރުތައް ފެނިގެންދާ ހަރަކާތެއްގެ ގޮތުގައިކަމަށާއި، މިފަދަ ހަރަކާތްތަކުގެ ތެރެއިން ޢާއްމުންގެ މެދުގައި ދުޅަހެޔޮ ސިއްޙަތެއްގައި ތިބުމަށާއި، ތިމާވެއްޓާ ރައްޓެހިގޮތްތައް ހިޔާރުކުރުމަށް ބާރުއެޅުން ފަދަ ކަންކަން ކުރުންވެސް މުހިއްމުކަމަށެވެ.
ބައިކް މޯލްޑިވްސްގެ ފަރާތުން ވާހަކަދައްކަވަމުން އެޖަމިއްޔާގެ ފައުންޑިންގ މެމްބަރު އަޙްމަދު ޙަސަން ދީދީ ވިދާޅުވީ، އެޖަމިއްޔާއިން މީގެ ކުރިންވެސް ހިންގާފައިވާ މިފަދަ ހަރަކާތްތަކަށް އާއްމުންގެ ފަރާތުން ލިބިގެންދިޔަ ފަދަ އެއްބާރުލުމެއް، މިފަހަރުގެ ހަރަކާތަށްވެސް ލިބިގެންދާނެކަމަށް އުއްމީދުކުރައްވާކަމަށެވެ. އަދި މިފަހަރުގެ ހަރަކާތުގައި ބައިކް މޯލްޑިވްސްގެ ފަރާތުން އެކި އުމުރުފުރާއަށް ނިސްބަތްވާ، 70 ވުރެއް ގިނަ ބައިވެރިންގެ ތަފާތު ހުނަރުތައް ފެނިގެންދާނެކަމަށް އޭނާ ވިދާޅުވިއެވެ.
img:http://s1.psmnews.mv/images/660x400/14724829677907.jpg|ބައިކް މޯލްޑިވްސްއިން ޢީދުގައި ބާއްވާ ހަރަކާތުގެ ސްޕޮންސަރަކާއެކު އެއްބަސްވުން ސޮއިކުރުމުގެ ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މި ރަސްމިއްޔާތުގައި ބައިކް މޯލްޑިވްސްގެ ހަރަކާތުގައި ސްޕޮންސަރުންގެ ގޮތުގައި ބައިވެރިވާ ފަރާތްތަކާއެކުވެސް ސޮއިކުރުން ކުރިއަށްދިޔައެވެ. އެގޮތުން "ފައިން އަނބުރާ އަނބުރާ 17 ކިލޯމީޓަރު" ހަރަކާތުގެ މެއިން ސްޕޮންސަރގެ ގޮތުގައި ހަމަޖައްސާފައިވަނީ އަމީން ގްރޫޕް އޮފް ކޮމްޕެނީޒްއެެވެ. ކޯ – ސްޕޮންސަރަކީ ވިލާ ހަކަތައެވެ. އަދި އޮފިޝަލް ޓެލެކޮމް ޕާޓްނަރަކީ ދިރާގެވެ.