ޣިޔާސުއްދީން އިންޓަރނޭޝަނަލް ސްކޫލްގެ އަހަރީ އިނާމުދިނުމުގެ ޖަލްސާ ބާއްވައިފިއެވެ.
މިޖަލްސާގައި އެ ސްކޫލްގެ ދަރިވަރުންގެ ތެރެއިން އިތުރު ހަރަކާތްތަކާއި ތަޢުލީމީ ދާއިރާގައި ފާހަގަކޮށްލެވޭ ވަނަތައް ޙާޞިލްކުރި ދަރިވަރުންނަށް ވަނީ އިނާމް ދީފައެވެ. މިޙަފްލާ ޝަރަފްވެރި ކޮށްދެއްވާ އެކި ވަނަތައް ޙާޞިލްކުރި ދަރިވަރުންނަށް އިނާމު ޙަވާލުކޮށްދެއްވީ އިންޓަރނޭޝަނަލް ސެންޓަރ ފޯރ އެންވަޔަރަމެންޓް ޑިވަލޮޕްމެންޓް އެންޑް އޮޕަރޭޝަން ރިސާރޗް އޮފް މޯލްޑިވްސް، (އެންޑަރވޯ)ގެ ފައުންޑަރ އަދި އެގްޒެކެޓިވް ޑިރެކްޓަރ ޑރ. ޢަބްދުއްސައްތާރު ޔޫސުފެވެ.
މިޖަލްސާ ޝަރަފްވެރި ކޮށްދެއްވައި ވާހަކަދައްކަވަމުން ޑރ. ޢަބްދުއްސައްތާރު ޔޫސުފް ވިދާޅުވީ ޒަމާނަށް އަންނަމުންދާ ބަދަލުތަކާއެކު ހަމައެކަނި ތަޢުލީމު އުނގެނިގެން ކުރިއަށްދެވެން ނެތްކަމަށާއި، ދިރިއުޅުމުގެ އެކި ކަންކަން ދަސްކޮށް، ސްކޫލް މަރުހަލާ ނިމިގެންދާއިރު ދަރިވަރުން ދުނިޔެއާ ކުރިމަތިލުމަށް ފުރިހަމައަށް ތައްޔާރުވާން ޖެހޭކަމަށެވެ. އަދި މިދާއިރާގައި ޣިޔާސުއްދީން ސްކޫލުން ބޮޑެތި ކުރިއެރުންތަކެއް ހޯދާފައިވާ ކަމަށް ޑރ. ޢަބްދުއްސައްތާރު ވިދާޅުވިއެވެ.
ޣިޔާސުއްދީން އިންޓަރނޭޝަނަލް ސްކޫލުގެ އިނާމު ދިނުމުގެ ޖަލްސާގައިވަނީ ވޭތުވެދިޔަ އަހަރު އެ ސްކޫލް ނިންމި ދަރިވަރުންގެ ތެރެއިން ޚާއްޞަ ވަނަތައް ހޯދި ދަރިވަރުންނަށް، ތައުލީމާއި ބައިވެރިވި އިތުރު ހަރަކާތްތަކަށް ބަލައި އެކުދިންނަށް ޙައްޤުވާ ރޭންކް އަރުވާފައެވެ.