ދައުލަތުގެ ފައިސާއަށް ޚިޔާނާތްވެވަޑައިގެންފައިވާ ކަމަށް އޮޑިޓް ރިޕޯޓްތަކުން ފާހަގަކުރައްވާފައިވާ ބައެއް ބޭފުޅުން ދައުލަތަށް ދައްކަވަން ޖެހިވަޑައިގަންނަވާ ފައިސާ 7 ދުވަހުގެ ތެރޭގައި ދައްކަވައި ޚަލާޞްކުރެއްވުމަށް ފިނޭންސް މިނިސްޓްރީން އެބޭފުޅުންނަށް މުހުލަތު ދެއްވައިފިއެވެ.
ދައުލަތަށް ފައިސާ ދައްކަވަންޖެހިވަޑައިގަންނަވާ ބޭފުޅުންގެ ތެރެއިން 7 ބޭފުޅެއްގެ ނަންފުޅު ފިނޭންސް މިނިސްޓްރީން ވަނީ ހާމަކުރައްވާފައެވެ.
ފިނޭންސް މިނިސްޓްރީން ނަން ހާމަކުރައްވައި މުހުލަތު ދެއްވި ބޭފުޅުންގެ ތެރޭގައި ކުރީގެ ރައީސް ގ.ކެނެރީގެ މުޙައްމަދު ނަޝީދާއި، ކުރީގެ ފޮރިންގ މިނިސްޓަރ ހ.ހިކިފިނިފެންމާގެ އަޙްމަދު ނަސީމާއި، ކުރީގެ ފޮރިންގ މިނިސްޓަރ މއ.ރޯޒްވިލާ އަޙްމަދު ޝަހީދާއި، ކުރީގެ ހޯމް މިނިސްޓަރ މ.ބަގީޗާގެ މުޙައްމަދު ޝިހާބް ހިމެނިވަޑައިގަންނަވައެވެ. އަދި ކުރީގެ ހައުސިންގ މިނިސްޓަރ ގދ.ފަރެސްމާތޮޑާ ގުލްފާމްގެ މުޙައްމަދު އަސްލަމާއި، ކުރީގެ ކަސްޓަމްސްގެ ކޮމިޝަނަރ ޖެނެރަލް ގ.ސަމަންތާ މުޙައްމަދު އަސްވާނާއި ވ.މިޔަރެސް ޙުސައިން ރަޝީދު އަޙްމަދުވެސް ހިމެނިވަޑައިގަންނަވައެވެ.
ދައުލަތަށް ދައްކަވަންޖެހޭ ފައިސާ އެ މުއްދަތުގައި ނުދައްކަވައިފިނަމަ ޝަރީޢަތަށް ފޮނުވަން ކުރައްވަންޖެހިވަޑައިގަންނަވާ ކަންކަން ކުރައްވަން އެޓަރނީ ޖެނެރަލް އޮފީހަށް ފޮނުވަން ނިންމާފައިވާ ކަމަށްވެސް ފިނޭންސް މިނިސްޓްރީން ވިދާޅުވެއެވެ.
މިފައިސާ ހޯއްދެވުގެ މަސައްކަތް ފިނޭންސް މިނިސްޓްރީން ފަށްޓަވާފައި ވަނީ ދައުލަތުގެ މާލިއްޔަތުގެ ޤާނޫނާ ޚިލާފަށް ދައުލަތުގެ ބައެއް އިދާރާތަކުން ބައެއް ފަރާތްތަކަށް ދައުލަތުގެ ފައިސާ ދީފައިވާކަމަށް އޮޑިޓަރ ޖެނެރަލްގެ އޮޑިޓް ރިޕޯޓްތަކާއި އޭސީސީގެ ތަޙްޤީޤު ރިޕޯޓްތަކުގައި ފާހަގަކުރައްވައި އެ ފައިސާ ހޯދުމަށް އެރިޕޯޓްތަކުގައި ލަފާދެއްވާފައިވާތީކަމަށް ފިނޭންސް މިނިސްޓްރީގެ ބަޔާނުގައި ވިދާޅުވެފައިވެއެވެ.