މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއް ބޭއްވޭނީ ހޯމް މިނިސްޓްރީން ޢާންމުކޮށް އިޢުލާންކުރައްވާފައިވާ ތަންތަނުގައި އެކަނިކަމަށް ކަނޑައެޅުއްވުމަށް ޤާނޫނަށް ގެންނެވި އިޞްލާޙް ރައީސުލްޖުމްހޫރިއްޔާ މިއަދު ތަސްދީޤްކުރައްވައިފިއެވެ.
ޞުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނުގެ އިޞްލާޙުގައި ވަނީ، މޯލްޑިވްސް ޕޮލިސް ސަރވިސުން ލިޔުމުން ދެއްވާ ހުއްދައެއް ލިބިގެން ނޫނީ، މާލޭގައި އެއްވެސް ބާވަތެއްގެ، އެއްވުމެއް ނުވަތަ ހިނގާލުމެއް ނުވަތަ އުޅަނދުބުރެއް ބޭއްވޭނީ ހޯމް މިނިސްޓްރީން ކަނޑައަޅުއްވައި، ޢާންމުކޮށް އިޢުލާންކުރައްވާފައިވާ ތަންތަނުގައި އެކަނިކަމަށެވެ. އެގޮތުން އެއްވެ އުޅެވޭނެ ތަންތަނުގެ ލިސްޓް މި ޤާނޫނަށް ޢަމަލުކުރަން ފަށާތާ 30 ދުވަހުގެ ތެރޭގައި ހޯމް މިނިސްޓްރީން ޢާންމުކޮށް އިޢުލާންކުރައްވައި ސަރުކާރުގެ ގެޒެޓްގައި ޝާއިޢުކުރައްވަން ޖެހޭނެކަމަށް އިޞްލާޙުގައިވެއެވެ. އަދި އެ ލިސްޓަށް އެއްވެސް އުނިއިތުރެއް ގެނެވޭނީ އެ އުނިއިތުރަކަށް ޢަމަލުކުރަން ފެއްޓެވުމުގެ 30 ދުވަހުގެ ކުރިން ހޯމް މިނިސްޓްރީއިން އެކަން ޢާންމުކޮށް އިޢުލާންކުރައްވައި ގެޒެޓްގައި ޝާއިޢުކުރެއްވުމަށްފަހުގައިކަމަށްވެސް އިޞްލާޙުގައިވެއެވެ.