އުއްމީދަކީ ކާވާ ކަޕުގެ ފައިނަލްގައި ރާއްޖޭގެ ޓީމު ކުޅުން: ލަތީފް

މި މަހުގެ 22 އިން 28 އަށް ބަންގްލަދޭޝްގައި ބޭއްވުމަށް ހަމަޖެހިފައިވާ ކާވާ މެންސް ނޭޝަން ކަޕުގެ ފައިނަލްގައި ރާއްޖޭގެ ގައުމީ ވޮލީބޯޅަ ޓީމުން ވާދަކުރާނެ ކަމަށް އުއްމީދުކުރާ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފް ވިދާޅުވެއްޖެއެވެ.

ބައިނަލްއަގުވާމީ ތިން މުބާރާތެއްގައި ބައިވެރިވާ ގައުމީ ވޮލީބޯޅަ ޓީމުތައް އިއުލާންކުރުމަށް ބޭއްވި ރަސްމިއްޔާތަށްފަހު ޕީއެސްއެމް ނިއުސްއަށް ދެއްވި އިންޓަވިއުއެއްގައި ލަތީފް ވިދާޅުވީ ކާވާ މެންސް ނޭޝަން ކަޕަށް ސީނިއަރ ގައުމީ ވޮލީ ޓީމުން ވަނީ ވަރަށް ބޮޑަށް ތައްޔާރުވެފައި ކަމަށެވެ. އަދި އެ މުބާރާތުގައި ވާދަކޮށް ފައިނަލްގައި ރާއްޖޭގެ ގައުމީ ޓީމު ކުޅޭނެ ކަމުގެ އުއްމީދު ވަރަށް ބޮޑު ކަމަށް ވިދާޅުވިއެވެ.

"އެންމެ އަވަހަށް މިއޮތީ ކާވާ ކަޕް ބަންގްލަދޭޝްގައި. އަޅުގަނޑުމެންގެ ސީނިއަރ ޓީމު އިރާދަކުރެއްވިއްޔާ ވަރަށް ރަނގަޅަށް ތައްޔާރުވެފައި މިވަނީ. މިހާރު އަޅުގަނޑުމެންގެ ޓީމު ތައިލެންޑަށް ދިއުމަށްފަހު ޓްރެއިނިންގ ކޭމްޕް ނިންމުމަށްފަހު އިއްޔެ މާލެއައީ" ލަތީފް ވިދާޅުވިއެވެ.

ކާވާ މެންސް ނޭޝަން ކަޕަށްފަހު މިއަންނަ ނޮވެމްބަރު މަހުގެ 3 އިން 10 އަށް ސްރީ ލަންކާގައި ބާއްވަން ތާވަލުކޮށްފައިވާ 19 އަހަރުން ދަށުގެ ކާވާ ވިމެންސް ޗެމްޕިއަންޝިޕުގައިވެސް ރާއްޖޭގެ 19 އަހަރުން ދަށުގެ ގައުމީ ވޮލީ ޓީމު ވާދަކުރާނެއެވެ. ކުރިއަށް އޮތް މުބާރާތަށް އެކުޅުންތެރިންވެސް ތައްޔާރުވެފައިވާ ކަމަށާއި، އެމުބާރާތުން ރާއްޖޭގެ އެތުލީޓުންނަށް ރަނގަޅު ތަޖުރިބާއެއް ލިބގެންދާނެކަމަށް ގަބޫލުކުރައްވާ ކަމަށް ލަތީފް ވިދާޅުވިއެވެ.

"އަޅުގަނޑުމެންގެ އަންޑަރ 19 ޓީމު މިވަނީ ވަރަށް ރަނގަޅަށް ތައްޔާރުވެފަ. އިރާދަކުރެއްވިއްޔާ އެމުބާރާތުގަވެސް އަޅުގަނޑުމެން ވަރަށް މަސައްކަތްކުރާނަން އެކުދިންނަށް ރަނގަޅު ތަޖުރިބާއެއް ހޯދަދެވޭތޯ. އެމުބާރާތުން މޮޅު ނުވޭދާނެ. އެހެންނަމަވެސް އެކުދިންނަކީ މާދަމާގެ މުސްތަގުބަލު" ލަތީފް ވިދާޅުވެފަވެއެވެ.

2026 ވަނަ އަހަރު ޕާކިސްތާނުގައި ބޭއްވުމަށް ހަމަޖެހިފައިވާ ސާފް ގޭމްސްގައިވެސް ރާއްޖޭގެ 23 އަހަރުން ދަށުގެ ގައުމީ ފިރިހެން ޓީމު ވާދަކުރާނެއެވެ. އެ މުބާރާތަށް ވަރަށް ޒުވާން ސްކޮޑެއް ތައްޔާރުކުރަމުން އަންނަކަން ހާމަކުރައްވަމުން ލަތީފް ވިދާޅުވީ އެ މުބާރަތުންވެސް އެންމެ ދަށްވެގެން ރިހި މެޑެއްޔެއް ހޯދުމަށް މަސައްކަތްކުރަމުން އަންނަ ކަމަށެވެ. އަދި މިއަހަރުގެ ޑިސެމްބަރު މަހުގެ 12 އިން 18 އަށް ރާއްޖޭގައި ބޭއްވުމަށް ހަމަޖެހިފައިވާ ކާވާ ކަޕް ފޯ ވިމެންސްގެ ވޮލީ މުބާރާތަށް ރާއްޖޭގެ އަންހެން ވޮލީ ޓީމުން ތައްޔާރުވަނީ ތަށި ހިއްލާލުމުގެ އަޒުމުގައި ކަމަށް ލަތީފް ވިދާޅުވިއެވެ.

"ދެން އޮތީ އަޅުގަނޑުމެންގެ ސީނިއަރ އަންހެން ޓީމު، މިދިޔަ އަހަރުވެސް އިރާދަކުރެއްވިއްޔާ މާލޭގައި ބޭއްވުނު ކާވާ ޗެލެންޖް ކަޕުގައި އަޅުގަނޑުމެން ފައިނަލްގައި ފަސް ސެޓު ކުޅެގެން ބަލިވީ. އެހެންވީމަ އެ މުބާރާތުގައި އަޅުގަނޑުމެންގެ އަންހެން ޓީމު މަސައްކަތް މިކުރަނީ އިރާދަކުރެއްވިއްޔާ ދިވެހިރާއްޖެއަށް ތަށި ގެނެވޭތޯ" ލަތީފް ވިދާޅުވިއެވެ.

ބަންގްލަދޭޝްގައި ބޭއްވުމަށް ތައްޔާރުވަމުން އަންނަ ކާވާ މެންސް ނޭޝަން ކަޕުގައި ހަ ގައުމަކުން ވާދަކުރެއެވެ. ރާއްޖެއިން މި މުބާރާތުގައި ކުޅޭ ފުރަތަމަ މެޗު ތާވަލުކޮށްފަވަނީ މި މަހުގެ 22 ވަނަ ދުވަހަށެވެ. އެ ދުވަހު ގައުމީ ވޮލީ ޓީމުން ނުކުންނާނީ މުބާރާތް ބާއްވާ ގައުމު ކަމަށްވާ ބަންގްލަދޭޝްއާ ދެކޮޅަށެވެ.